A Xunta colaborará co sector público e privado no impulso dun modelo directivo feminino máis inclusivo

A conselleira de Promoción do Emprego e Igualdade, María Jesús Lorenzana, asinou hoxe un protocolo coa Confederación de Empresarios de Galicia (CEG) e a Asociación de Mujeres en el Sector Público para a posta en marcha dun proxecto piloto, no que colaborará tamén Real Impact, para fomentar o liderado das mulleres directivas a través da formación. Dez mulleres do sector publico e outras dez do privado participarán nesta experiencia que as entidades definiron de “única”, por xuntar mulleres con responsabilidades nestes dous eidos.

Por medio desta colaboración, a Consellería de Promoción do Emprego e Igualdade impulsará “un modelo de liderado inclusivo e diverso” poñendo por diante a igualdade de oportunidades e o talento das persoas, indicou Lorenzana.

Aínda que en Galicia un de cada tres postos directivos ocúpao unha muller, sendo a 3ª  comunidade mellor posicionada -despois de Madrid e Andalucía- Lorenzana remarcou a necesidade de seguir a avanzar. “Que as mulleres ocupen cargos directivos de alta responsabilidade, converténdose en líderes da nosa sociedade, tanto no ámbito público como no privado, é unha prioridade para a Xunta de Galicia”, especificou no acto celebrado en San Caetano a conselleira, no que tamén reivindicou o “poder transformador” das persoas en posición de liderado.

O Goberno galego seguirá a apoiar iniciativas que fomenten a igualdade de oportunidades no territorio e para o que resulta esencial, afirmou a titular de Promoción do Emprego, a colaboración público-privada.

A través do marco hoxe creado, Galicia impulsará o desenvolvemento persoal e profesional das mulleres directivas, tanto no sector público como no sector privado. Trátase de fomentar un modelo que impulse novas ideas e posicións innovadoras, contribuíndo así na busca de solución aos desafíos a que se enfrontan na actualidade as persoas, nomeadamente as mulleres, responsables da toma de decisións.

O protocolo permitirá establecer, así, unha contorna de referencia para a acción coordinada que permita rendibilizar os recursos, metodoloxías, técnicas e procesos.

Dentro das liñas de colaboración e accións que se desenvolverán ata o 31 de decembro de 2023, difundirase entre as federacións e asociacións que integran a Confederación de Empresarios/as de Galicia e entre as mulleres directivas do sector público, a información necesaria sobre as actuacións a desenvolver, para fomentar a participación en programas de desenvolvemento persoal e profesional destas mulleres.