A Xunta estará presente no salón do viño e licores galegos de calidade Vinis Terrae a través de diversas catas e charlas formativas
As catas centraranse nos viños -tanto branco como tinto- e nas augardentes e licores tradicionais premiados nas Catas de Galicia 2022
Haberá tamén durante todo o evento un túnel do viño e augardentes e licores tradicionais de Galicia
12 empresas galegas, que foron gañadoras de distincións nas Catas de Galicia 2022, estarán no espazo reservado da Consellería do Medio Rural
A Axencia Galega da Calidade Alimentaria, dependente da Consellería do Medio Rural, participará na décima edición do Salón do Viño e Licores Galegos de Calidade Vinis Terrae organizando unha serie de catas e charlas formativas. Ademais, no espazo reservado para a Consellería do Medio Rural participarán 12 empresas galegas que foron gañadoras de distincións nas Catas de Galicia 2022.
O luns 5 dará comezo a primeira cata, centrada nos viños brancos premiados con Acios de ouro nas Catas de Galicia 2022. A mañá rematará cunha reunión entre Axencia e os consellos reguladores das denominacións de orixe (DO) do viño de Galicia.
Do mesmo xeito, o martes 6, a xornada comezará cunha cata dos viños tintos premiados cos Acios de ouro nas Catas de Galicia 2022. Posteriormente, a Estación de Viticultura e Enoloxía de Galicia presentará o monográfico acerca da sintomatoloxía das enfermidades no viñedo galego. A mañá rematará cunha cata novamente, esta vez das augardentes e licores tradicionais premiados cos Potes nas Catas de Galicia 2022.