Santiago de Compostela, 2 de xuño de 2023 O presidente da Xunta, Alfonso Rueda, destacou esta mañá o papel do Inventario Forestal Continuo de Galicia como unha ferramenta fundamental para o crecemento de todo o sector forestal-madeira na comunidade e a súa “continuidade no tempo”.

O titular do Executivo galego, acompañado polo conselleiro do Medio Rural, José González, participou na presentación dos primeiros resultados desta iniciativa, na que a Xunta inviste un orzamento superior aos 3 millóns de euros. Neste senso, parte dese financiamento correspóndese a un convenio coas universidades de Vigo e Santiago para o desenvolvemento do inventario e o resto para distintas ferramentas necesarias para a súa correcta elaboración. Rueda explicou que se trata dun “instrumento de control e planificación básico” tanto para a Administración como para todos os actores da industria.

Entre as posibilidades que ofrece está, entre outras, o cálculo preciso da superficie que ocupan as diferentes especies forestais na nosa comunidade e unha cualificación segundo a súa dispoñibilidade. Por exemplo, contémplanse variables como a pendente, a distancia a pistas ou a fragmentación dunha masa forestal

Rueda convidou a todas as empresas e produtores da industria a facer uso desta ferramenta, que supón “un antes e un despois para o sector”, e formar así parte do gran impulso que o Goberno galego quere dar a través do Plan Forestal de Galicia 2021-2040 ‘Cara a neutralidade carbónica’.

Neste sentido, o presidente adiantou que o Inventario Forestal non será a única proposta que a Xunta poñerá en marcha para o sector, posto que neste ano tamén entrará en funcionamento o Plan Estratéxico da Industria Forestal-Madeira, unha estratexia que pretende aliñar os recursos dos que dispoñen os montes coas necesidades que ten a industria.

O sector forestal en datos

Durante a súa intervención, Alfonso Rueda lembrou a importancia do sector forestal galego, que se sitúa como unha referencia a nivel nacional e europeo. Galicia conta cunha superficie de preto de 1,5 millóns de hectáreas arboradas das que se aproveitan anualmente arredor de 10 millóns de metros cúbicos de madeira, o 50% da produción total en España.

Ademais, a cadea monte-industria galega supón o 1,8 % do PIB da comunidade e xera arredor do 12 % do emprego industrial, o que se traduce en 25.000 traballadores. No 2021, a facturación conxunta desta cadea de valor ascendeu a 2578 millóns de euros, un máximo histórico para Galicia desde o 2006.

Datos do Inventario Forestal Continuo

Tal e como recolle o Inventario Forestal Continuo, Galicia conta cunha superficie de preto de 1,5 millóns de hectáreas arboradas, das cales o 42,5 % da superficie correspóndese con frondosas (case 620.000 ha), seguidas por plantacións de coníferas (máis de 422.000 ha) e eucalipto (máis de 409.000 ha).