No desenvolvemento da Estratexia Galega de Seguridade e Saúde no Traballo, o Issga planifica con carácter anual as súas actuacións como órgano técnico na materia e co máximo consenso cos/as interlocutores/as sociais.
É obxecto do plan anual o deseño e a priorización de accións e medidas que se dirixen á promoción, ao asesoramento técnico, á formación, á información e ao seguimento e control en materia de seguridade e saúde no traballo e no desenvolvemento durante 2023 da mencionada Estratexia.
Para a consecución dese obxectivo, este documento de planificación ten unha dobre finalidade:
- Por unha banda, servir de guión para a execución das funcións e o desenvolvemento das actividades técnicas que ten atribuídas o Issga.
- Pola outra, dar a coñecer coa máxima transparencia a todas as persoas e entidades interesadas a planificación das actividades e mesmo a busca de actores que se sumen a estas actuacións.
O plan estrutúrase por eixes e fichas de actividade que abranguen dende a participación en grupos de traballo de especial relevancia na PRL e o laboratorio de hixiene analítica. En sucesivos eixes vanse recollendo dende a actividade estatística da sinistralidade laboral, a investigación de accidentes de traballo e enfermidades profesionais ata a execución de campañas e programas para a redución da sinistralidade e mellora da xestión preventiva nos centros de traballo.
Avaliación e seguimento
Da execución deste plan anual dáse conta con carácter trimestral no Consello Reitor do Issga e na memoria anual de actividades, que se publicará no ano 2024.
Data de aprobación no Consello da Xunta: 31/1/2023
