Román Rodríguez traslada ao Comité Educativo tres obxectivos principais para o próximo curso: o reforzo das aprendixazes, o benestar emocional e o impulso dun modelo de centros postcovid

O conselleiro de Cultura, Educación e Universidade, Román Rodríguez, presidiu hoxe o Comité Educativo, onde informou sobre as medidas de prevención, hixiene e promoción da saúde fronte á covid-19 para o próximo curso 2021-2022 abordadas onte na reunión conxunta da Conferencia Sectorial de Educación e o Consello Interterritorial de Sanidade. Neste órgano de asesoramento do Goberno galego fronte á pandemia no ámbito académico, o conselleiro sinalou como obxectivos para o vindeiro curso o reforzo das aprendizaxes e contidos e o benestar emocional nun novo modelo de centros poscovid.

Este é o primeiro dunha rolda de encontros sectoriais que se celebrarán nos vindeiros días cos diferentes axentes do sistema educativo para informar das previsións para o protocolo do vindeiro curso, con reunións coa Xunta Autonómica de Directores e o Consello Escolar de Galicia.

O titular do departamento educativo da Xunta de Galicia destacou a posición adiantada de Galicia respecto dalgunhas das medidas propostas na Conferencia Sectorial. Neste sentido, referiuse a cuestións como o investimento por alumno, baremo no que o sistema educativo galego é o primeiro, ou o alumnado por profesor, onde Galicia é segunda Comunidade Autónoma, só por detrás de Estremadura.

Estabilización do profesorado

Así mesmo, o esforzo da comunidade educativa galega e os investimentos realizados permitiron manter a case total presencialidade nas aulas galegas durante todo o curso 2020/2021, algo que supón unha clara vantaxe comparativa respecto doutras CCAA.

Por outra banda, salientou que o Goberno galego está a apostar pola estabilización do profesorado. “De feito temos en marcha procesos selectivos para preto de 6.000 docentes entre as ofertas de 2020 e 2021 e nos últimos anos convocamos máis de 10.000 prazas”.

Plan Recupera para o alumnado

O conselleiro sinalou que, xunto coa seguridade sanitaria, o principal obxectivo da Xunta é blindar o sistema educativo galego como un referente de equidade e calidade, a través dunha perspectiva integral e un protocolo de transición. Ademais, explicou que Galicia leva xa tempo traballando nunha das liñas trasladadas onte polo Ministerio, a posta en marcha de programas de recuperación das competencias non adquiridas durante a pandemia. Na nosa Comunidade desenvolverase a través do Plan Recupera, unha das estratexias prioritarias do Goberno galego para o vindeiro curso.

A Xunta comprométese coa implementación deste programa, malia que o Goberno central aínda non se pronunciou sobre a dispoñibilidade de fondos específicos para desenvolver iniciativas deste tipo, ou da posibilidade de empregar os fondos europeos para financialas. Varias comunidades autónomas amosaron na Conferencia Sectorial de onte a súa preocupación fronte a esta indefinición.

Ademais, recordou que este curso xa está en marcha o Plan de Benestar Emocional, co que se están a combater os efectos negativos que a pandemia poida ocasionar sobre os membros da comunidade escolar neste ámbito.

Aprendizaxes da pandemia

Por outra banda, o conselleiro destacou que Galicia vai aproveitar a oportunidade para aprender dos aspectos positivos e hábitos que a pandemia trouxo. A este respecto, a Xunta está a ultimar xa o Plan de Nova Arquitectura Pedagóxica, a través da que se deseña o novo modelo de centros educativos poscovid, con espazos máis amplos, mellor ventilados e cunha maior relación coa contorna, en definitiva, máis saudables.