Controlado o incendio forestal rexistrado no concello ourensán de Muíños, parroquia de Prado de Limia
Segundo as últimas estimacións, o lume -que entrou de Portugal- afecta unhas 160 hectáreas de superficie dentro do Parque Natural Baixa Limia-Serra do Xurés
Santiago de Compostela, 7 de febreiro de 2023
A Consellería do Medio Rural informa de que o incendio forestal rexistrado no concello ourensán de Muíños, parroquia de Prado de Limia, quedou controlado ás 18,14 horas desta tarde.
O lume orixinouse sobre as 18,00 h. de onte en Portugal en dous focos diferentes e, posteriormente, entrou en Galicia. Segundo as últimas estimacións, afecta unha superficie provisional dunhas 160 hectáreas dentro do Parque Natural Baixa Limia-Serra do Xurés. Na súa extinción levan traballado ata agora 2 técnicos, 10 axentes, 12 brigadas, 8 motobombas e 2 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.
