A Xunta imparte a través da Agasp un curso de loita contra incendios en buques atracados en porto

Vilagarcía de Arousa (Pontevedra), 2 de marzo de 2023 O director xeral de Emerxencias e Interior, Santiago Villanueva, visitou hoxe os 40 participantes no curso de loita contra incendios en buques atracados no porto dirixido a servizos de extinción de incendios e salvamento, servizos de protección civil e emerxencias e grupos de emerxencias supramunicipais (GES). A actividade levarase a cabo nas instalacións do porto de Vilagarcía de Arousa desde hoxe ata o venres cun total de 40 horas.

A formación é un dos cursos convocados pola Academia Galega de Seguridade Pública (Agasp) para os servizos de emerxencias da Comunidade no marco do plan de formación continua da entidade, que tamén é centro de referencia na formación das forzas e corpos de seguridade que traballan en Galicia.

Preto de 300 cursos para persoal de emerxencias

Segundo o plan de formación previsto para 2023, o persoal dos servizos de emerxencias dispón de case 8.300 prazas para realizar máis de 12.000 horas lectivas nas 280 accións formativas programadas para voluntarios de Protección Civil e efectivos dos Grupos de Emerxencias Supramunicipais (GES), así como axentes forestais e ambientais. Inclúese tamén aquí a formación en materia de socorrismo impartida para fomentar a inscrición no Rexistro Profesional de persoal socorrista.

Santiago Villanueva destacou que ás 280 actividades destinadas aos servizos de emerxencias engádense outras 245 no eido da seguridade pública, o que suman máis de medio cento. No caso das forzas e corpos de seguridade, os 245 a axentes de Policía Autonómica, Policía Nacional, Policía Local e Garda Civil dispoñen de 5.750 prazas para recibir máis de 8.300 horas lectivas.