A Resolución do 29 de xuño de 2016 (DOG núm. 132, do 13 de xullo; corrección de erros no DOG núm. 133, do 14 de xullo) establece, no punto segundo da parte resolutiva, que o prazo de presentación de solicitudes de axuda finalizará o 15 de outubro de 2016 agás que se produza o suposto de esgotamento de crédito. Neste caso informarase do peche adiantado do prazo de solicitudes a través da páxina web do Igape e no Diario Oficial de Galicia.
Estas axudas estaban financiadas con cargo aos orzamentos xerais da Comunidade Autónoma de Galicia para o ano 2016 a través dos créditos consignados na aplicación 09.A1-741A-7802 polo importe global de 2.800.000,00 €.
As solicitudes presentadas ao abeiro da citada resolución ata o día 14 de outubro de 2016 esgotaron o crédito dispoñible para a concesión destas axudas.
Considerando o exposto anteriormente, e de conformidade co establecido no artigo 32 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, procede facer público o esgotamento do crédito consignado na Resolución do 29 de xuño de 2016 pola que se aproban as bases reguladoras das axudas do programa Reforma 16 e se convocan para o ano 2016.
Por todo o exposto e no uso das facultades que me foron conferidas,
DISPOÑO:
Cláusula única.
Comunícase que o día 14 de outubro de 2016 se esgotou o crédito dispoñible para as axudas convocadas mediante a Resolución do 29 de xuño de 2016 pola que se dá publicidade ao acordo do Consello de Dirección que aproba as bases reguladoras para a concesión de axudas, en réxime de concorrencia non competitiva, a particulares para a adquisición de materiais e pezas de mobiliario de cociña e baño (Reforma 16), así como a selección de entidades colaboradoras que participarán na súa xestión, e se procede á súa convocatoria, polo que as solicitudes recibidas a partir da publicación da presente resolución serán inadmitidas.
Santiago de Compostela, 17 de outubro de 2016
Javier Aguilera Navarro
Director xeral do Instituto Galego de Promoción Económica