Mediante a Orde do 16 de setembro de 2016 a Consellería do Medio Rural adoptou unha resolución favorable en relación á solicitude de recoñecemento da indicación xeográfica protexida Ribeiras do Morrazo. Esta orde foi publicada no Diario Oficial de Galicia do día 23 de setembro de 2016.
A dita resolución, xunto co resto do expediente, foi remitida ao entón Ministerio de Agricultura, Alimentación e Medio Ambiente para os efectos da transmisión da solicitude de inscrición á Comisión Europea, de acordo co establecido no Real decreto 1335/2011, do 3 de outubro, polo que se regula o procedemento para a tramitación das solicitudes de inscrición das denominacións de orixe protexidas e das indicacións xeográficas protexidas no rexistro comunitario e a oposición a elas.
A solicitude de inscrición foi transmitida polo Ministerio de Agricultura e Pesca, Alimentación e Medio Ambiente á Comisión Europea, que o recibiu o día 24.11.2016.
A normativa reguladora desta materia permite que os Estados membros outorguen unha protección transitoria a escala nacional, unha vez recibido o expediente pola Comisión e en tanto non adopte esta unha decisión definitiva.
Para os efectos de tramitar a devandita protección nacional transitoria, o número 3 do artigo 17 do citado Real decreto 1335/2011, do 3 de outubro, na redacción dada polo Real decreto 149/2014, do 7 de marzo, establece que, para denominacións de orixe e indicacións xeográficas protexidas cuxo ámbito territorial non exceda unha comunidade autónoma; a dita concesión corresponde ao órgano competente da comunidade autónoma mediante a publicación no Boletín Oficial del Estado do acto administrativo polo que se toma a decisión. A publicación debe incluír o enderezo da páxina web onde se atopa o prego de condicións.
De acordo co anterior, tras a proposta da Dirección Xeral de Gandaría, Agricultura e Industrias Agroalimentarias, e coas competencias atribuídas a esta consellería mediante o Decreto 166/2015, do 13 de novembro, polo que se aproba a estrutura orgánica da Consellería do Medio Rural, e no Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores,
RESOLVO:
Primeiro. Conceder a protección nacional transitoria á indicación xeográfica protexida (IXP) Ribeiras do Morrazo, que só poderá ser empregada na comercialización dos viños que cumpran as especificacións do prego de condicións transmitido á Comisión Europea, que pode ser consultado na seguinte URL:
http://mediorural.xunta.gal/uploads/media/Prego_Condicions_Ribeiras_do_Morrazo_abril_2016_G.pdf
A dita protección transitoria cesará a partir da data en que a Comisión Europea adopte unha decisión sobre a súa inscrición.
Segundo. Publicar no Diario Oficial de Galicia e no Boletín Oficial del Estado esta resolución.
Terceiro. Informar o Ministerio de Agricultura e Pesca, Alimentación e Medio Ambiente desta concesión de protección nacional transitoria.
Esta resolución esgota a vía administrativa e contra ela os interesados poden interpoñer con carácter potestativo recurso de reposición ante a persoa titular da Consellería do Medio Rural no prazo dun mes segundo dispoñen os artigos 123 e 124 da Lei 39/2015, do 2 de outubro, do procedemento administrativo común das administracións públicas, ou recurso contencioso-administrativo ante o Tribunal Superior de Xustiza de Galicia, de conformidade co establecido no artigo 10 da Lei 29/1998, do 13 de xullo, reguladora da xurisdición contencioso-administrativa, no prazo de dous meses. Ambos os prazos se contarán desde o día seguinte ao da publicación desta resolución.
Santiago de Compostela, 21 de febreiro de 2017
Ángeles Vázquez Mejuto
Conselleira do Medio Rural