A Axencia Galega de Desenvolvemento Rural (Agader) adoptou o 31 de marzo de 2017 o acordo de cesión, mediante adxudicación directa e a título gratuíto, dun inmoble situado no concello de Lourenzá a favor do Concello de Lourenzá.
De conformidade co artigo 86.1 do Decreto 50/1989, do 9 de marzo, polo que se aproba o Regulamento para a execución da Lei 3/1989, do 12 de abril, do patrimonio da Comunidade Autónoma de Galicia, procede publicar o dito acordo.
Por todo isto,
RESOLVO:
Publicar o Acordo do 31 de marzo de 2017 da Presidencia da Agader, polo que se cede en propiedade, mediante adxudicación directa e a título gratuíto, un inmoble situado no concello de Lourenzá que se incorpora a esta resolución como documento anexo.
Santiago de Compostela, 20 de abril de 2017
Miguel Ángel Pérez Dubois
Director xeral da Axencia Galega de Desenvolvemento Rural
ANEXO
Acordo do 31 de marzo de 2017 da presidenta da Axencia Galega
de Desenvolvemento Rural (Agader) polo que cede en propiedade
mediante adxudicación directa e a título gratuíto un inmoble situado
no concello de Lourenzá
A Axencia Galega de Desenvolvemento Rural (Agader) é propietaria dun predio integrante dunha masa común, resultado dun procedemento de concentración o reestruturación parcelaria.
O Concello de Lourenzá solicitou a cesión do inmoble, mediante adxudicación directa e a título gratuíto.
O 21 de xullo de 2016 a presidenta da Agader acordou que se iniciara o procedemento para a transmisión en propiedade, mediante adxudicación directa e a título gratuíto, do inmoble.
O 18 de agosto de 2016 e o 19 de xaneiro de 2017 a Subdirección de Mobilidade de Terras da Agader emitiu informes favorables á transmisión en propiedade do inmoble.
O 1 de setembro de 2016 a Secretaría Xeral Técnica e do Patrimonio da Consellería de Facenda emitiu informe favorable á transmisión en propiedade do inmoble, conforme o previsto no artigo 14.2 da Lei 6/2011, do 13 de outubro, de mobilidade de terras.
O 19 de setembro de 2016 a Asesoría Xurídica emitiu informe favorable á transmisión en propiedade do inmoble.
O 28 de decembro de 2016 a Secretaría Xeral Técnica da Consellería do Medio Rural propuxo a transmisión en propiedade do inmoble, conforme o previsto no artigo 14.1.a) da Lei 6/2011, do 13 de outubro, de mobilidade de terras.
O 26 de decembro de 2016 a Intervención Xeral da Comunidade Autónoma emitiu informe favorable á transmisión en propiedade do inmoble, conforme o previsto no artigo 11 do Decreto 101/2014, do 1 de agosto, polo que se establece a estrutura orgánica da Consellería de Facenda.
O 29 de decembro de 2016 o Consello da Xunta de Galicia, autorizou a transmisión en propiedade do inmoble, conforme o previsto no artigo 17.3 da Lei 6/2011, do 13 de outubro, de mobilidade de terras.
O 11 de xullo de 2013 o Consello de Dirección da Agader delegou na persoa titular da Presidencia de Agader as competencias para o alleamento e cesión de bens inmobles e dereitos reais ao que fan referencia os artigos 74.2 e 83.2 da Lei 5/2011, do 30 de setembro, do patrimonio da Comunidade Autónoma de Galicia, segundo fixo público a Resolución do 24 de xullo de 2013 (DOG núm. 148, do 5 de agosto).
Tendo en conta o exposto, de acordo cos artigos 14 a 17 da Lei 6/2011, do 13 de outubro, de mobilidade de terras e 82 e seguintes da Lei 5/2011, do 30 de setembro, do patrimonio da Comunidade Autónoma de Galicia, e logo da proposta do director xeral da Agader,
DISPOÑO:
Primeiro. Acórdase a cesión, a título gratuíto, a favor do Concello de Lourenzá, da propiedade do ben inmoble, de carácter patrimonial, sito no concello de Lourenzá, que se describe a continuación:
Predio 1298 do polígono 5 da zona de concentración parcelaria de Lourenzá Norte, no concello de Lourenzá, cunha extensión superficial de trinta áreas e cincuenta centiáreas. Limita norte con Carmen Arias Rodríguez e outros (1299), sur con Carmen Arias Rodríguez e outros (1299), leste con Carmen Arias Rodríguez e outros (1299), e oeste con camiño.
Sobre este predio localízase o depósito de augas de Soutelo.
Referencia catastral: 27027B005012980000LF.
Titular catastral: terreo sobrante figura como titular catastral.
Inscrición rexistral: inscrita no Rexistro da Propiedade de Mondoñedo, a nome da Comunidade Autónoma de Galicia, tomo 696, libro 82, folio 68, nº rexistral predio 9.296, inscrición 1ª.
Segundo. A cesión en propiedade queda sometida ás seguintes cláusulas:
1ª. O inmoble destinarase a ubicación de depósito de augas de abastecemento.
2ª. A persoa cesionaria, con coñecemento da situación física e legal do ben, adquíreo, xunto coas obras, construcións e instalacións existentes neste que sexan da Agader, como corpo certo, ao seu risco e ventura, renunciando ao saneamento por evicción, por vicios ou defectos ocultos e por gravames ocultos que lle concede o Código civil. No caso de obras, construcións e instalacións das que a Agader manifesta ser a titular en aplicación do artigo 359 do Código civil, corresponderá á persoa cesionaria a procedente regularización xurídica no caso de reclamacións de terceiras persoas, para que o inmoble, as obras, as construcións e as instalacións sexan dun só titular (ben da persoa cesionaria, ben de terceiras persoas no caso dunha accesión invertida). Non poderá transmitir en propiedade o ben a terceiras persoas. Debe remitir cada tres anos a persoa cedente a documentación que acredite o destino do ben.
3ª. De conformidade cos artigos 85 e 86 da Lei 5/2011, do 30 de setembro, do patrimonio da Comunidade Autónoma de Galicia, se o ben cedido non se aplica ao fin sinalado no prazo de dous anos desde o outorgamento do documento de cesión, ou deixa de estalo con posterioridade, se se descoida ou utiliza con grave quebrantamento ou se incumpren as condicións do acordo, considerarase resolta a cesión e o ben reverterá á entidade cedente.
Serán por conta da persoa cesionaria o detrimento ou a deterioración sufridos polo ben cedido, sen que sexan indemnizables os gastos nos que incorra para cumprir as cargas ou condicións impostas.
A resolución da cesión será declarada polo órgano competente para o seu outorgamento, e na resolución que declare a extinción da cesión determinarase, se é o caso, a indemnización polas deterioracións que sufrise o ben, logo da determinación da súa contía mediante taxación pericial.
Na resolución que declare a extinción da cesión a persoa cedente poderá optar por que o ben reverta, libre de cargas e gravames, sen dereito a indemnización á persoa cesionaria:
a) Repoñendo o ben ao estado anterior a calquera uso construtivo e/ou non construtivo.
b) Nas mesmas condicións de uso, construtivo e/ou non construtivo, nas que se entregou, repoñendo o ben ao estado anterior, coa accesión do construído ao predio.
c) Nas condicións de uso, construtivo e/ou non construtivo, nas que se atope no momento da extinción da cesión, coa accesión do construído ao predio.
d) De ser o caso, as obras, as construcións e as instalacións que revertan, que non fosen da titularidade da persoa cedente no momento da cesión, serán adquiridas gratuitamente pola persoa cedente.
4ª. A persoa cesionaria realizará pola súa conta a correspondente alta, baixa ou modificación no Catastro inmobiliario, as inscricións, as anotacións e as altas no Rexistro da Propiedade ou noutros rexistros que correspondan, aínda que éstas sexan facultativas e non obrigatorias, así como a declaración de obra nova, se for o caso, inscrita no Rexistro da Propiedade.
Todos os custos e impostos que se deriven da cesión serán de conta da persoa cesionaria, incluso o imposto sobre o incremento de valor dos terreos de natureza urbana (plusvalía), se o houbera.
5ª. A persoa cesionaria declara coñecer a situación urbanística do inmoble que se cede, así como os deberes legais e as obrigas pendentes de cumprir no caso de levarse a cabo actuacións de transformación urbanística, renunciando polo tanto á facultade de rescindir o contrato e exixir as indemnizacións que procedan a que alude o artigo 27 do Real decreto lexislativo 7/2015, do 30 de outubro, polo que se aproba o texto refundido da Lei do solo e rehabilitación urbana, por non ter feito constar a dita situación urbanística, deberes e obrigas, despois de serlle requirida a súa expedición pola persoa cedente.
Terceiro. A cesión formalizarase en documento administrativo subscrito polo órgano unipersoal de goberno da Agader, ou funcionario en quen delegue, debendo constar nel o acordo de cesión e a aceptación do cesionario.
Cuarto. A Agader, a través da Subdirección de Mobilidade de Terras, realizará todos os trámites necesarios para a efectividade de canto se dispón no presente acordo.
