A aprobación da relación de postos de traballo do organismo autónomo Instituto Galego de Estatística xustifícase na aprobación, mediante Decreto 60/2016, do 26 de maio, do seu estatuto (DOG núm. 108, do 8 de xuño), nas necesidades funcionais e organizativas actuais, así como na Orde da Consellería de Facenda do 10 de maio de 2017, pola que se modifica a Orde do 21 de novembro de 1989 pola que se fixan os criterios xerais para a elaboración das relacións de postos de traballo da Comunidade Autónoma de Galicia e se aproba o modelo e se ditan instrucións para o cubrir.
En consecuencia, por proposta do director do organismo, unha vez consultadas as organizacións sindicais presentes na Mesa Xeral de Negociación da Comunidade Autónoma e a Comisión de Persoal, o Consello da Xunta de Galicia, na súa reunión do día 11 de maio de 2017, adoptou o seguinte
ACORDO:
Primeiro. Apróbase a relación de postos de traballo do organismo autónomo Instituto Galego de Estatística, nos termos que se sinalan no anexo a este acordo.
Segundo. Clasifícanse de libre designación os postos que a seguir se relacionan, en aplicación do criterio de excepcionalidade que á marxe se indica, de conformidade co previsto na Lei 2/2015, do 29 de abril, do emprego público de Galicia, e co disposto na Resolución do 25 de febreiro de 2016, da Dirección Xeral da Función Pública, pola que se ditan instrucións para a tramitación de relacións de postos de traballo e a determinación dos criterios de excepcionalidade e funcións que definen as características que motivan a especial responsabilidade ou cualificación profesional dos postos de traballo de libre designación, de nivel 28 ou inferior, da Administración da Comunidade Autónoma de Galicia:
|
Código do posto |
Denominación do posto |
Criterio |
|
FC.A01.00.000.15770.050 |
Xefatura Unidade de Modelización Socioeconómica |
Asesoramento e dependencia directa dun alto cargo. |
|
FC.A01.00.001.15770.040 |
Xefatura de Servizo de Informática |
Especial responsabilidade por garantir a protección de datos persoais. |
Terceiro. Ordénase a súa publicación no Diario Oficial de Galicia para os efectos da entrada en vigor a partir do día seguinte ao da súa publicación.
Visto o Acordo adoptado polo Consello da Xunta de Galicia na súa reunión do 11 de maio de 2017, relativo a aprobación da relación de postos de traballo do organismo autónomo Instituto Galego de Estatística, coa finalidade de cumprir o dito acordo, de conformidade coa Orde da Consellería de Facenda do 8 de xullo de 2013 sobre delegación de competencias na Dirección Xeral da Función Pública (DOG núm. 136, do 18 de xullo), dispoño que se publique no Diario Oficial de Galicia como anexo a esta resolución.
Santiago de Compostela, 12 de maio de 2017
O conselleiro de Facenda
P.D. (Orde do 8.7.2013)
José María Barreiro Díaz
Director xeral da Función Pública
