Antecedentes:
O artigo 6.2 da Lei 8/2013, do 28 de xuño, de estradas de Galicia e o artigo 12.2 do Decreto 66/2016, do 26 de maio, polo que se aproba o Regulamento xeral de estradas de Galicia, determinan que os espazos destinados a sendas para peóns ou para a circulación de ciclistas teñan a consideración de elementos funcionais da estrada. Tendo en conta este precepto, a Xunta Galicia elaborou a Estratexia en materia de mobilidade alternativa de Galicia, entre cuxos obxectivos está o fomento dos sistemas de transporte alternativos aos motorizados, que permitan minimizar as repercusións sobre o medio ambiente e os seus impactos sociais e económicos.
Os beneficios esperados con esta iniciativa son, entre outros, a mellora da mobilidade, a mellora da calidade do aire, da saúde, da igualdade e benestar da economía, do patrimonio e do urbanismo.
O obxecto desta actuación é a execución dun itinerario peonil na estrada AC-524, no treito comprendido entre os puntos quilométricos 0+500 e 2+000, no lugar denominado A Costa, no concello de Ordes.
Para a execución desta senda procederase á ampliación da plataforma da estrada cara a marxe dereita, buscando a integración da dita senda na vía actual. Así, a zona de tránsito peonil realizarase en formigón coloreado, cun ancho mínimo de 1,8 m e separada da estrada mediante unha zona verde de 90 cm de ancho e un bordo de formigón. Entre os puntos quilométricos 0+995 e 1+011, proxéctase unha pasarela para salvar o río Cabrón, de 2,24 m de ancho.
Trátase dun treito que conecta co albergue de peregrinos que se está a construír na zona, ademais de con outros focos de atracción, tales como os centros educativos IES nº 1 de Ordes e co Colexio Público Alfonso Rodríguez Castelao, cos pavillóns polideportivos Castelao I e Castelao II, locais comerciais e industriais, farmacias, etc., así como coa senda existente na contorna do p.q. 0+500 (punto de inicio desta actuación).
Considerando todo o exposto e o establecido na normativa vixente,
RESOLVO:
Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia e no artigo 50 do Decreto 66/2016, do 26 de maio, polo que se aproba o Regulamento xeral de estradas de Galicia, o mencionado proxecto de trazado sométese ao trámite de información pública, durante un período de trinta días hábiles, contados a partir do seguinte ao da publicación deste anuncio no Diario Oficial Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.
Segundo. Que simultaneamente ao trámite sinalado no parágrafo anterior, e para os efectos previstos no artigo 56.1 do Decreto do 26 de abril de 1957, polo que se aproba o Regulamento de expropiación forzosa, sométese a información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.
Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no Servizo de Infraestruturas da Coruña (rúa Vicente Ferrer, 2, 15008 A Coruña) e na Casa do Concello de Ordes (Alfonso Senra, 108, 15680 Ordes). Así mesmo, na páxina web da Consellería de Infraestruturas e Mobilidade (https://infraestruturasemobilidade.xunta.gal/organizacion/c/CIV_Axencia_Galega_de_Infraestruturas) está á disposición dos interesados o documento completo do proxecto de construción.
Santiago Compostela, 8 de febreiro de 2019
Francisco Menéndez Iglesias
Director da Axencia Galega Infraestruturas