Galego | Castellano

DOG - Xunta de Galicia -

Diario Oficial de Galicia
DOG Núm. 196 Mércores, 11 de outubro de 1995 Páx. 7.564

III. OUTRAS DISPOSICIÓNS

CONSELLERÍA DE POLÍTICA TERRITORIAL, OBRAS PÚBLICAS E VIVENDA

ORDE do 27 de setembro de 1995 pola que se deixa sen efecto, nas concas dos ríos Mera, Landro, Cobo, Ouro e Masma e na ría de Ribadeo, a suspensión temporal a que se refire a disposición adicional segunda do Decreto 144/1994, do 19 de maio.

Polo Decreto 144/1994, do 19 de maio, declarouse prioritaria a realización das actuacións necesarias para o desenvolvemento do Plan Hidrolóxico das Concas Intracomunitarias de Galicia, o que implicou, segundo o establecido na disposición adicional segunda, a suspensión temporal da tramitación administrativa das solicitudes da concesión de aproveitamentos de augas públicas, mentres non se dispuxese dos estudios precisos para o desenvolmento do plan.

Os estudios para a planificación hidrolóxica realizados engloban distintos campos entre os que salientan a ordenación e protección do recurso cun enfoque da devandita planificación de cara a unha caracterización e definición hidrolóxica de cada conca, propiciando en definitiva unha utilización prudente, racional e axustada do recurso.

Neste sentido, a auga como recurso fundamental e esencial relaciónase tamén cun contorno no que se sitúan zonas de especial protección, nas que se precisa garantir e fomenta-lo mantemento e o equilibrio da riqueza ecolóxica e paisaxística do medio que se desenvolve ó redor das súas concas fluviais a fin de lograr a súa definitiva consolidación.

Alcanzado nas concas dos ríos Mera, Landro, Cobo, Ouro e Masma e na ría de Ribadeo o grao de desenvolvemento dos traballos e estudios axeitado para a implantación da planificación hidrolóxica e, en particular, obtidos os elementos informativos fundamentais para unha eficaz e acertada toma de decisións administrativas e realizadas as actuacións técnicas necesarias que posibilitan a defensa, protección, conservación e recuperación dos diferentes ámbitos relacionados co medio fronte ás diversas demandas tanto actuais coma previsibles dos usos e aproveitamentos do dominio público hidráulico, cómpre, ó igual que se fixo xa nas concas do Verdugo e Sor mediante a Orde do 30 de maio de 1995, publicada no Diario Oficial de Galicia do 5 de xuño, proceder ó levan

tamento, naquelas, da suspensión provisional de que viñan sendo obxecto polo Decreto 144/1994.

Na súa virtude, esta consellería, ó abeiro da autorización contida no parágrafo segundo da disposición adicional referida e visto o previo informe do servicio competente da Dirección Xeral de Obras Públicas,

DISPÓN:

Primeiro.-Deixar sen efecto, no ámbito xeográfico que comprenden as concas dos ríos Mera, Landro, Cobo, Ouro e Masma e na ría de Ribadeo, a suspensión temporal da tramitación administrativa das solicitudes da concesión de aproveitamentos de augas públicas disposta polo Decreto 144/1994, do 19 de maio, relativo á adopción de medidas urxentes e provisionais en relación coa utilización do dominio público hidráulico competencia da Comunidade Autónoma de Galicia.

Segundo.-A presente orde terá efectos a partir do día seguinte ó da súa publicación no Diario Oficial de Galicia.

Santiago de Compostela, 27 de setembro de 1995.

José Cuíña Crespo

Conselleiro de Política Territorial, Obras Públicas e Vivenda

95-6466