Galego | Castellano

DOG - Xunta de Galicia -

Diario Oficial de Galicia
DOG Núm. 133 Venres, 11 de xullo de 1997 Páx. 6.856

I. DISPOSICIÓNS XERAIS

CONSELLERÍA DA PRESIDENCIA E ADMINISTRACIÓN PÚBLICA

DECRETO 179/1997, do 10 de xullo, polo que se regula a coordinación nos edificios administrativos da Xunta de Galicia.

A conveniencia de concentrar en áreas administrativas únicas diferentes organismos e delegacións da Xunta de Galicia, de xeito que se poida garantir un mellor servicio ós administrados evitando a dispersión de dependencias; acada-los desexables niveis de economía e racionalidade do gasto derivados da inmediatez das dependencias e o uso común dos diferentes servicios así como prosegui-la política de incremento patrimonial primando o investimento sobre o gasto corrente en alugueiros, son, entre outras, razóns que xustifican o esforzo da nosa Administración para, dentro dunha razoable xerarquización do gasto de investimento, non descoida-la concentración de servicios que así mesmo se inscribe dentro do máis amplo obxectivo da reforma administrativa.

En tal sentido, a experiencia, durante un xa longo período, de uso compartido da sede dos servicios centrais da Administración autonómica aporta suficientes elementos de racionalidade no desenvolvemento do traballo e na facilidade na realización de trámites e xestións interdepartamentais, ó tempo que facilita igualmente considerables aforros de tempo e de accesibilidade ás informacións e procedementos por parte dos administrados.

Por outra parte, a existencia tamén de edificios administrativos de uso múltiple en servicios periféricos, esixe o establecemento das normas e criterios que regulen o funcionamento e a coordinación dos ditos recintos para que, sen menoscabo da autonomía dos diferentes organismos respecto do desempeño das tarefas e o exercicio das funcións e competencias que lle son propias, se establezan as canles de coordinación, comunicación e responsabilidade en canto ó uso compartido dos ditos complexos administrativos.

Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día dez de xullo de mil novecentos noventa e sete,

DISPOÑO:

Primeiro.-Os edificios que por calquera título a Xunta de Galicia utilice como sede de delegacións provinciais/territoriais; direccións provinciais/territoriais ou nos que estean localizados servicios dependentes doutras consellerías recibirán a denominación xenérica de edificio administrativo da Xunta de Galicia, debendo ser este o indicativo de localización e sinalización do complexo administrativo no seu conxunto.

O réxime interior común a tódalas dependencias, así como o uso compartido de servicios axustarase ó establecido no presente decreto.

Segundo.-Terán a consideración e denominación expresada no artigo anterior os edificios actualmente sitos na Praza Luís Seoane, sen número, na Coruña e na Ronda da Muralla, número 70, en Lugo.

Terceiro.-En cada un dos edificios administrativos da Xunta de Galicia créase unha Comisión Coordinadora do Edificio Administrativo que estará presidida polo delegado provincial da Consellería da Presidencia e Administración Pública e da que formarán parte, como vicepresidente o delegado provincial da Consellería de Economía e Facenda, e como vocais os delegados, directores provinciais/territoriais das consellerías ou titulares dos organismos e entidades que teñan a súa sede no edificio. A comisión poderá requiri-la asistencia, con voz pero sen voto, de técnicos especializados por razón da materia, que se consideren convenientes. Actuará como secretario o da Delegación Provincial da Consellería da Presidencia e Administración Pública.

A comisión axustará o seu funcionamento ó artigo 22 e seguintes, referidos a órganos colexiados, da Lei de réxime xurídico das administracións públicas e procedemento administrativo común.

Cuarto.-Serán funcións da Comisión Coordinadora do Edificio Administrativo as seguintes:

1. A coordinación, se é o caso, das cuestións que afecten ó persoal en relación co seu traballo e que

resulten de común aplicación no réxime interior, tales como o uso das dependencias, instalacións e servicios; horarios ordinarios ou extraordinarios; accesos, saídas e circulación interior; circuítos de emerxencia; elementos de identificación de acceso e circulación interior, tanto referido a persoal como a vehículos; estacionamento de vehículos alleos ós parques móbiles provinciais; uniformidade de subalternos e calquera outra do mesmo carácter.

2. A autorización previa á realización de calquera clase de obras de remodelación ou adaptación das dependencias, sen prexuízo das competencias que sobre patrimonio lle corresponden á Secretaría Xeral e do Patrimonio da Consellería de Economía e Facenda. A mesma autorización será esixible no caso de instalación de elementos de compartimentación ou moblaxe, aínda que non implique a realización de obras e especialmente no que atinxe á obstaculización ou impedimento dos circuítos de evacuación ou instalacións de tipo xeral do edificio.

3. O establecemento, con carácter xeral, das normas para a utilización dos servicios comúns, tanto se trate de dependencias administrativas, locais, servicios ou actividades de convocatoria concreta, das que ordinariamente exerza o control a Delegación da Consellería da Presidencia.

4. Velar polo estado de conservación do edificio, o mantemento dos seus servicios e o melloramento das instalacións.

5. Ter coñecemento dos ingresos e gastos que se deriven do funcionamento común dos servicios e dependencias, así como os proxectos ou programas de obras e remodelacións que sexan precisas.

Quinto.-A administración do edificio e a xestión dos ingresos e realización dos pagamentos ocasionados pola conservación, mantemento, consumos e outros de carácter xeral común a tódalas delegacións ou organismos localizados no edificio recaerá sobre o secretario, da Delegación Provincial da Consellería da Presidencia e Administración Pública, quen será auxiliado por un funcionario da dita delegación nestas tarefas.

Sexto.-A administración do edificio terá os seguintes cometidos:

a) A xestión dos ingresos constituídos polas cantidades procedentes das distintas delegacións ou servicios que con carácter mensual lle sexan requiridos pola administración do edificio e que se corresponderán co rateo dos gastos de conservación, mantemento, consumos e material segundo a superficie ocupada ou outros parámetros de repercusión do gasto.

b) A preparación das ordes de pagamento contra a conta bancaria autorizada a nome da administración do edificio para sufragar ós provedores o importe dos gastos polos conceptos e períodos que figuran no parágrafo anterior. O presidente da comisión será o ordenador dos pagamentos á vista da proposta que

lle presente o administrador do edificio, quen reflictirá os gastos por rateo correspondentes ás delegacións e organismos situados no edificio.

Sétimo.-Corresponderá á Delegación Provincial da Consellería da Presidencia e Administración Pública, a dirección e control inmediatos dos seguintes servicios:

1. Rexistro xeral.

2. Oficina de Información e Atención ó Cidadán.

3. Oficina de compulsas.

4. Sistema de control horario.

5. O establecemento dos medios para a identificación do persoal que preste servicios no edificio, así como dos vehículos alleos ó parque móbil provincial.

6. Sinalazación interior e exterior.

7. Servicio médico.

8. Salón de actos, salas de reunións ou aulas de uso xeral.

9. Relación coa oficina de Correos e Telégrafos e servicios postais ou de valixa.

10. Servicio de cafetería.

11. Dependencias e garaxes dos parques móbiles provinciais.

12. Limpeza, mantemento, conservación e servicios e redes de servicios de instalacións comúns.

13. Relación coa xunta de persoal de funcionarios.

14. En relación coas redes de voz e datos para uso administrativo, o exercicio das funcións que lle son encomendadas á Consellería da Presidencia e Administración Pública nos decretos 262/1994, do 29 de xullo e 252/1996, do 20 de xuño.

15. Establecemento das medidas que correspondan en cumprimento da Lei de prevención de riscos laborais e da normativa da Xunta de Galicia sobre o dito particular, sen prexuízo das competencias da Consellería de Xustiza, Interior e Relacións Laborais en materia de seguridade e hixiene no traballo.

Oitavo.-Con carácter anual e antes do 31 de marzo, a comisión presentará á Secretaría Xeral da Consellería da Presidencia e Administración Pública informe-memoria do ano anterior, así como estado de contas a 31 de decembro.

Disposición adicional

Primeira.-Facúltase o conselleiro da Presidencia e Administración Pública para outorga-la consideración de edificio administrativo a aqueles recintos administrativos que se axusten ás condicións anteriormente establecidas.

Disposicións derradeiras

Primeira.-O presente decreto non supón incremento do gasto.

Segunda.-Facúltase o conselleiro da Presidencia e Administración Pública para dicta-las instruccións que conveñan para o desenvolvemento do presente decreto.

Terceira.-O presente decreto entrará en vigor o día seguinte ó da súa publicación no Diario Oficial de Galicia.

Santiago de Compostela, dez de xullo de mil novecentos noventa e sete.

Manuel Fraga Iribarne

Presidente

Dositeo Rodríguez Rodríguez

Conselleiro da Presidencia e Administración Pública

97-5545