A Consellería de Medio Ambiente é o órgano da Administración da Comunidade Autónoma de Galicia que ten atribuídas as competencias e funcións que en materia de ambiente e conservación da natureza se establecen nos artigos 27.10º, 11º, 15º e 30º e 29.4º do Estatuto de autonomía de Galicia e demais normativa de aplicación, de conformidade co disposto no Decreto 482/1997, do 26 de decembro. En exercicio das devanditas competencias e funcións considérase conveniente o fomento das actividades realizadas na defensa e loita contra os incendios forestais, na conservación do bosque e na conservación da biodiversidade, mediante o seu recoñecemento público
Para tal efecto, no uso das atribucións que me confire o artigo 34 da Lei 1/1983, do 22 de febreiro, modificada pola Lei 11/1988, do 20 de outubro, en relación cos artigos 27.11º e 30 do Estatuto de autonomía para Galicia e o Decreto 482/1997, do 26 de decembro,
DISPOÑO:
Artigo 1º
1. Convoca-los premios Bandeira Verde de Galicia 1998 en recoñecemento ó traballo das institucións, entidades ou organizacións que desenvolvan un labor significativo no coidado do ambiente.
2. En concreto, os premios Bandeira Verde de Galicia 1998 teñen como obxecto recoñecer e recompensa-los méritos polo labor desenvolvido, no período comprendido entre o 1 de xaneiro e o 15 de novembro de 1998 e no ámbito da Comunidade Autónoma de Galicia, na defensa e loita contra os incendios forestais, na conservación do bosque e na conservación da biodiversidade.
Artigo 2º
Os premios que se convocan son os seguintes:
-Premio Bandeira Verde de Galicia 1998 á mellor acción na defensa e loita contra os incendios forestais.
-Premio Bandeira Verde de Galicia 1998 á mellor acción na conservación do bosque.
-Premio Bandeira Verde de Galicia 1998 á mellor acción de conservación da biodiversidade.
Artigo 3º
1. As institucións, entidades ou organizacións que desexen acceder a estes premios, deberán enviar
á Consellería de Medio Ambiente. Centro de Información e Tecnoloxía Ambiental, rúa dos Basquiños, 2. (15071) Santiago de Compostela (A Coruña), unha memoria acreditativa dos traballos realizados no transcurso do ano 1998 e os logros acadados relativos ó obxecto destes premios.
A memoria non excederá de 20 folios por unha cara a dous espacios, con letra de 12 puntos e marxe de 2,5 cm en tódolos seus lados; poderá ser complementada con gráficos, debuxos, fotos ou calquera material audiovisual.
2. O prazo de presentación da devandita memoria rematará o 15 de novembro de 1998.
Artigo 4º
A Consellería de Medio Ambiente poderá solicitar información adicional á presentada e verificar calquera extremo referente á documentación achegada.
Artigo 5º
O xurado que resolverá os anteditos premios Bandeira Verde de Galicia 1998 terá a composición seguinte:
-Presidente: o conselleiro de Medio Ambiente.
-Vocais: o director xeral de Montes, o director da Escola de Enxeñeiros de Montes e un representante da Federación Ecoloxista Galega.
-Secretario: o director xeral do Centro de Información e Tecnoloxía Ambiental.
Artigo 6º
Os premios, que poderán ser declarados desertos, están dotados cunha cantidade de 500.000 ptas. cada un deles, con cargo á aplicación orzamentaria, 15.04.342A.640.2 dos orzamentos xerais da Comunidade Autónoma de Galicia para 1998. A Consellería de Medio Ambiente cederalles durante un ano o uso do logotipo Bandeira Verde de Galicia ós premiados, para a súa utilización en tódalas actividades que realicen.
Disposición derradeira
A presente orde entrará en virgor o día seguinte ó da sua publicación no Diario Oficial de Galicia.
Santiago de Compostela, 29 de maio de 1998.
José Carlos del Álamo Jiménez
Conselleiro de Medio Ambiente
4972