A orde da Consellería da Presidencia e Administración Pública, do 18 de xaneiro de 1999 (DOG do 25 de xaneiro), pola que se aproban a bases das que se rexerán as convocatorias de axudas de bolsas correspondentes á promoción xeral da investigación se procede á súa convocatoria, prevé, no seu anexo IV, a concesión de bolsas para persoal auxiliar de investigación (técnicos especialistas de FP-2).

De acordo co establecido na base A.3 do dito anexo, desde o 13 ó 23 de abril de 1999 expuxéronse as listas de solicitudes admitidas e excluídas para a selección de centros habilitados; durante ese mesmo período os interesados puideron formular reclamacións para emendar erros e faltas de documentos.

Rematado este prazo e estudiadas as reclamacións presentadas, as solicitudes admitidas foron estudiadas pola Comisión de Selección de Investigación creada por Decreto 37/1998, do 30 de xaneiro (DOG do 6 de febreiro), e orde da Consellería da Presidencia e Administración Pública do 21 de abril de 1998 (DOG do 12 de maio), modificada por orde da Consellería da Presidencia e Administración Pública do 26 de abril de 1999 (DOG do 5 de maio).

Así mesmo, a devandita comisión procedeu ó estudio das solicitudes de prórrogas de bolsas de FP-2 presentadas ó abeiro do anexo IV.C da orde xa citada.

En consecuencia, atendendo a proposta elaborada pola Comisión de Selección de Investigación en relación cos puntos A e C do anexo IV da Orde do 18 de xaneiro de 1999 (selección de centros habilitados e prórroga das bolsas de FP-2), esta secretaría xeral

RESOLVE:

Primeiro.

A. Concederlles prórroga para desfrutar da bolsa durante un novo período dun ano, que se contará a partir do 1 de novembro de 1999 e nos mesmos centros ós que están adscritas, ás persoas que se relacionan no anexo I.

B. A contía destas bolsas será de 80.000 ptas. mensuais durante o período da prórroga, segundo o establecido na base 2 do punto B, anexo IV, da orde de convocatoria.

C. Para calquera incidencia durante o período de desfrute desta bolsa será de aplicación o disposto no punto B.10 do anexo IV da Orde do 18 de xaneiro de 1999.

D. A inobservancia por parte dos beneficiarios de calquera das bases establecidas na orde de convocatoria, suporá a perda do dereito a percibi-la subvención correspondente.

Segundo.

A. Habilitar para a adscrición de bolseiros especialistas de FP-2 ós centros que se relacionan no anexo II da presente resolución, os restantes centros habilitados suplentes figuran por orde decrecente de prioridade relacionados no anexo III.

B. De conformidade co establecido o punto B.4 do anexo IV da orde de convocatoria do 18 de xaneiro de 1999, o prazo para que os titulados de FP-2 (ou de estudios equivalentes) participen no concurso para a selección de novos bolseiros comprenderá desde o día seguinte ó da publicación da presente resolución no DOG ata o 31 de xullo de 1999. As solicitudes deberán axustarse ás bases da convocatoria establecidas no anexo IV, punto B, da citada Orde do 18 de xaneiro de 1999.

C. O prazo de exposición das listas de solicitudes admitidas e excluídas, previsto na base B.5 da convocatoria abranguerá desde o 3 ó 13 de setembro de 1999 (ámbolos dous incluídos ) podendo os interesados, durante o mesmo período, formular reclamacións para emendar erros e faltas de documentos ante a Secretaría Xeral de Investigación e Desenvolvemento, achegando, se é o caso, a documentación necesaria. Transcorrido este prazo sen que se emenden as causas de exclusión, procederase ó arquivo do expediente, notificándollo ó interesado conforme o previsto nos artigos 42 e 71 da Lei 4/1999, do 13 de xaneiro, pola que se modifica a Lei 30/1992, de réxime xurídico das administracións públicas e do procedemento administrativo común.

Terceiro.

Contra a presente resolución poderán os interesados interpoñer recurso de alzada ante o conselleiro da Presidencia e Administración Pública no prazo dun mes contado a partir do día seguinte ó da data da súa publicación no DOG, de acordo co disposto nos artigos 114 e seguintes da Lei 4/1999 pola que se modifica a Lei 30/1992, de réxime xurídico das administracións públicas e do procedemento administrativo común.

Disposición derradeira

A presente resolución entrará en vigor o día seguinte ó da súa publicación no Diario Oficial de Galicia.

Santiago de Compostela, 18 de xuño de 1999.

Miguel A. Ríos Fernández

Secretario xeral de Investigación e Desenvolvemento

ANEXO I

ANEXO II

ANEXO III