Examinado o expediente instruído por instancia da empresa Nutrimentos del Campo, S.A., con enderezo para efectos de notificacións na Rocha-Dozón, 36500 Lalín (Pontevedra), resultan os seguintes
Antecedentes de feito.
Primeiro.-Con data do 26 de agosto de 1998, a citada empresa solicitou a autorización administrativa e o recoñecemento da condición de instalación acollida ó réxime especial de producción de enerxía eléctrica creado polo R.D. 2818/1998, do 23 de decembro, sobre producción de enerxía eléctrica por instalacións abastecidas por recursos ou fontes de enerxía renovables, residuos e coxeración, actualmente vixente, da súa planta de coxeración.
Segundo.-As características básicas da planta de coxeración serán as seguintes:
-Dous grupos motoxeradores de 1.521 kVA, 400 V de gasóleo. Equipo de control, sincronización, etc.
-Dous transformadores de 1.750 kVA.
-Dous tanques de 75.000 l.
-Unha caldeira de recuperación de calor de 3.000 kg/h.
-Dous intercambiadores de calor.
Terceiro.-De conformidade co establecido no Decreto 2617/1966, do 20 de outubro, sobre autorización de instalacións eléctricas, de aplicación ó presente expediente en virtude do establecido na disposición transitoria primeira da Lei 54/1997, do 27 de novembro, do sector eléctrico, a Delegación Provincial da Consellería de Industria e Comercio de Pontevedra dictou Resolución do 1 de decembro de 1998 pola que se someteu a información pública a autorización administrativa da instalación de referencia, que se publicou no DOG do 15-1-1999 e no BOP de Pontevedra do 18-1-1999, sen que se presentase no período legalmente establecido para iso ningunha alegación.
Cuarto.-O proxecto está informado favorablemente pola Delegación Provincial da Consellería de Indus
tria e Comercio de Pontevedra e cumpre coas esixencias regulamentarias fixadas no Decreto 2617/1966, do 20 de outubro, e coas demais que lle son de aplicación.
Fundamentos de dereito.
Primeiro.-A Dirección Xeral de Industria é competente para resolver este expediente con fundamento no Estatuto de autonomía de Galicia, o Real decreto 2563/1982, do 24 de xullo, o Decreto 132/1982, do 4 de novembro, e o Decreto 99/1998, do 26 de marzo, modificado polo Decreto 181/1999, do 17 de xuño, polo que se establece a estructura orgánica da Consellería de Industria e Comercio, en relación co Decreto 2617/1966, do 20 de outubro, e o Real decreto 2818/1998, do 23 de decembro, xa citados.
Segundo.-No expediente instruído para o efecto cumpríronse os trámites regulamentarios.
Esta dirección xeral, de acordo con todo o que antecede e no exercicio das competencias que ten atribuídas,
RESOLVE:
-Autoriza-la instalación da planta de coxeración á empresa Nutrimentos del Campo, S.A., que se situará nas súas instalacións do termo municipal de Lalín, na provincia de Pontevedra.
-Recoñecerlle á planta de coxeración autorizada a condición de instalación acollida ó réxime especial do R.D. 2818/1998 e incluíla no grupo a.1 do artigo 2 do dito real decreto.
Calquera modificación das instalacións autorizadas requirirá unha nova solicitude de autorización administrativa, de acordo co indicado no artigo 17.4º do Real decreto 1775/1967, do 22 de xullo, que fixa o réxime de instalación, ampliación e traslado das industrias en xeral.
O promotor presentará ante a Delegación Provincial da Consellería de Industria e Comercio de Pontevedra, no prazo dun ano contado a partir da data de publicación no DOG da presente resolución, o proxecto de execución da planta de coxeración autorizada, o cal conterá os datos e condicións técnicas para a realización das instalacións de conexión da central á rede, que serán facilitados pola empresa que distribúa enerxía eléctrica na zona, así como o punto de interconexión.
Así mesmo, a instalación interconectarase co sistema centralizado que para o réxime especial estableza, se é o caso, a Dirección Xeral de Industria.
Contra esta resolución, que non é definitiva en vía administrativa, poderase interpor recurso de alzada ante o conselleiro de Industria e Comercio da Xunta de Galicia, no prazo dun mes contado a partir do día seguinte ó da súa publicación.
Santiago de Compostela, 8 de outubro de 1999.
Joaquín del Moral Crespo
Director xeral de Industria