Con data do 9 de decembro de l998 publicouse unha Resolución do 12 de novembro, da Dirección Xeral de Patrimonio Cultural, pola que se incoaba expediente para a declaración de ben de interese cultural con categoría de monumento, a favor do cemiterio de San Francisco, localizado no concello de Ourense.
A tramitación do expediente levouse a cabo de acordo coa Lei 8/1995, do 30 de outubro, do patrimonio cultural de Galicia e demais desposicións concordantes.
Por proposta do conselleiro de Cultura, Comunicación Social e Turismo e logo de deliberación do Consello da Xunta de Galicia do día once de febreiro de dous mil,
DISPOÑO:
Primeiro.-Declarar ben de interese cultural, con categoría de monumento, a favor do cemiterio de San Francisco, localizado no concello de Ourense.
Segundo.-A zona da delimitación é a comprendida no anexo I e no plano do anexo II.
Terceiro.-Este decreto será notificado ó Rexistro Xeral de Bens de Interese Cultural do Estado, ó Rexistro de Bens de Interese Cultural de Galicia, ó concello e os interesados.
Disposición derradeira
Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, once de febreiro de dous mil.
Manuel Fraga Iribarne
Presidente
Jesús Pérez Varela
Conselleiro de Cultura, Comunicación Social
e Turismo
ANEXO I
O punto l sitúase na rúa Emilia Pardo Bazán, á altura das escaleiras que conducen á antiga capela da Orde Terceira.
Tramo l-2. Liña coincidente co eixe da rúa Emilia Pardo Bazán e a rúa da Granxa ata o cruzamento coa rúa Juan de la Coba Gómez.
Tramo 2-3. Liña coincidente coa aliñación da beirarrúa para as edificacións da rúa Juan de la Coba Gómez, fronte ó cemiterio, ata o seu encontro coa rúa da Canle.
Tramo 3-4. Liña coincidente co eixe da rúa da Canle ata ó vértice NE do cemiterio.
Tramo 4-1. Liña coincidente co muro que separa o cemiterio do antigo cuartel de San Francisco e sae á rúa Emilia Pardo Bazán, incluíndo na delimitación a antiga capela da Orde Terceira.
