O comercio de materiais forestais de reproducción veu incrementándose na medida en que a economía forestal foi adquirindo importancia no desenvolve

mento dos países máis avanzados. Por unha parte, a globalización dos mercados incidiu tamén no comercio dos materiais de reproducción forestal e na medida que as transaccións internacionais destes productos gañaron maior volume de negocio, foi necesario crear normas para facilita-la tipificación dos productos e a súa calidade. Todo iso foi acompañado dunha crecente actividade na producción de sementes, na obtención de clons para a reproducción vexetativa, nas tecnoloxías de viveiros e na producción e elaboración de sementes.

En tal situación, promulgáronse, entre outras, a Directiva 66/404/CEE do Consello, do 14 de xuño de 1966, relativa á comercialización dos materiais froiteiros de reproducción, a Orde do 21 de xaneiro de 1984, do Ministerio de Agricultura, Pesca e Alimentación, pola que se regula a comercialización dos materiais forestais de reproducción, a orde da Consellería de Agricultura, Gandería e Montes, do 3 de agosto de 1994, pola que se regula a comercialización de materiais forestais de reproducción en Galicia e o Real decreto 1356/1998, do 26 de xuño, polo que se establecen as normas aplicables á producción, comercialización e utilización dos materiais forestais de reproducción de especies non sometidas á normativa comunitaria. Máis recentemente, promulgouse a Directiva 1999/105/CEE do Consello, do 22 de decembro de 1999, sobre a comercialización de materiais forestais de reproducción, estando moi próxima a promulgación do real decreto co fin de adaptar esta directiva á lexislación

española.

A medida que se foi promulgando nova lexislación obsérvase que, por un lado, o número de especies que deben cumprir estas disposicións é maior, e por outro, que as variables ou conceptos utilizados para definir ou para comercializar aspectos relativos á calidade exterior son cada vez máis amplos e máis determinantes.

Nestas condicións é oportuno e obrigado coordina-la lexislación da Comunidade Autónoma de Galicia nestes materiais co fin de facilita-lo comercio e o abastecemento da demanda.

Por iso, ante a inadecuación dalgunhas disposicións contidas na Orde do 3 de agosto de 1994 co Real decreto 1356/1998, e de acordo co disposto no Decreto 482/1997, do 26 de decembro, que se establece a estructura orgánica da Consellería de Medio Ambiente, e de acordo co disposto na Lei 1/1983, do 22 de febreiro, reguladora da Xunta e do seu presidente

DISPOÑO:

Artigo único.-Derrógase a Orde do 3 de agosto de 1994, pola que se regula a comercialización de materiais forestais de reproducción en Galicia.

Disposición derradeira

Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 26 de marzo de 2001.

José Carlos del Álamo Jiménez

Conselleiro de Medio Ambiente