O Consello da Xerencia Municipal de Urbanismo, en sesión do 15 de febreiro de 2001, adoptou, entre outros, o seguinte acordo:
«Primeiro.-Aprobar definitivamente o proxecto de urbanización da UE IND. II-04 Santo André de Comesaña, presentado pola Comunidade de Bens Santo André, redactado por Fraga Arquitectos, C.B. e con visados do COAG do 10 de marzo, 28 de xuño de 11 de xullo de 2000, coas seguintes condicións suspensivas:
a) Corrixi-la instalación da tubaxe de pluviais que figura no camiño de Caramuxo e que deberá instalarse no interior do ámbito da UE conectándose nun punto bueiro que se usará como desaugadoiro, ou ben baixo a beirarrúa que se constrúa paralela á calzada tal e como se advertiu ó interesado no acordo de aprobación inicial.
b) Prestar aval de acordo co establecido no punto 3.8.1.2.i) das vixentes normas urbanísticas polo importe do 100% do orzamento de execución material das obras que ascende á cantidade de 77.045.881 pesetas.
Segundo.-Publica-lo presente acordo de aprobación definitiva do proxecto de urbanización no DOG e BOP así como notificación individual ó interesado».
Contra o devandito acordo, que pon fin á vía administrativa, poderán interpoñerse os seguintes recursos:
a) Potestativo de reposición ante o Consello da Xerencia Municipal de Urbanismo de Vigo no prazo dun mes a partir do día seguinte ó da publicación do presente anuncio.
b) Contencioso-administrativo ante o Tribunal Superior de Xustiza de Galicia, no prazo de dous meses contados desde o día seguinte ó da publicación deste anuncio.
De conformidade co artigo 59 da Lei 30/1992, do 26 de novembro, LRXAP-PAC, por medio do presente anuncio, notifícase o acordo que nel se contén a tódolos propietarios afectados descoñecidos, de ignorado enderezo, respecto dos cales non se puido practica-la notificación tentada.
Vigo, 8 de marzo de 2001.
Lois Pérez Castrillo
Alcalde-presidente da Xerencia Municipal
de Urbanismo