Visto o texto do convenio colectivo da empresa Cervezas San Martín, S.A. de Ourense 2001 (código de convenio 3200102), con entrada nesta delegación provincial o día 11 de xullo de 2001, subscrito con data do 10 de xullo de 2001, dunha parte polo administrador único e o director da fábrica, en representación da parte empresarial, e doutra polo delegado de persoal, en representación dos traballadores desta.
Esta delegación provincial, de conformidade co disposto no artigo 90.2º e 3º do Estatuto dos traballadores, texto refundido aprobado polo Real decreto 1/1995, do 24 de marzo, Real decreto 1040/1981, do 22 de maio, sobre rexistro e depósito de convenios colectivos de traballo, e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo e demais normas aplicables de dereito común,
ACORDA:
Primeiro.-Ordena-la súa inscrición no libro de rexistro de convenios colectivos de traballo, existente nesta delegación provincial, e notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Ourense, 16 de xullo de 2001.
José Lage Lage
Delegado provincial de Ourense
Convenio colectivo 2001 da empresa
Cervezas San Martín, S.A.
Capítulo I
Disposicións xerais
Artigo 1º.-Ámbito territorial, funcional e persoal.
As estipulacións deste convenio colectivo afectarán a todo o persoal da empresa Cervezas San Martín, S.A. que preste os seus servicios no centro de traballo, sito no polígono industrial San Cibrao das Viñas (Ourense).
A súa aplicación será obrigatoria a todo o persoal que se encontre en alta no momento de ser asinado e que estea comprendido na Ordenanza laboral da industria cervexeira do 23 de xullo de 1971, tendo o carácter de complemento da lexislación vixente e, en particular, da citada ordenanza.
Artigo 2º.-Vixencia, duración e prórroga.
Este convenio colectivo, que entrará en vigor o día 1 de xaneiro de 2001, estará vixente ata o 31 de decembro de 2001. Poderá ser prorrogado de ano en ano se ningunha das partes o denunciase cunha antelación dun mes, como mínimo, respecto da data da súa expiración, conforme o disposto na Lei 8/1980, do 10 de marzo.
Capítulo II
Condicións económicas
Artigo 3º.-Retribucións.
Apróbase a táboa salarial anexa a este convenio. Establécese un incremento do 4% sobre a táboa de 2000.
Revisión salarial.
En caso de que o índice de prezos ó consumo (IPC) establecido polo INE rexistrase o 31 de decembro de 2001 un incremento superior ó 4%, efectuarase unha revisión salarial pola diferencia entre o incremento pactado (4%) e o real constatado. Esta revisión terá efectos desde o 1-1-2001 e para o seu cálculo tomarase como referencia a táboa salarial do ano 2000.
Artigo 4º.-Antigüidade.
Tódolos traballadores fixos de tódalas categorías, agás os aspirantes e aprendices, desfrutarán de aumentos periódicos nos seus haberes, consistentes en doce bienios do 5 por cento, como máximo, en razón da súa antigüidade na empresa.
Estas porcentaxes aplicaranse exclusivamente sobre o salario base que lle corresponda á última categoría laboral que posúa o productor de que se trate.
Artigo 5º.-Pagas extraordinarias.
Establécense tres pagas extraordinarias pagadas a razón do salario real (salario base+antigüidade+complemento de convenio), nos meses de xullo, setembro e decembro.
Artigo 6º.-Horas extraordinarias.
Cada hora de traballo que exceda da duración máxima da xornada semanal de traballo pactada no artigo 12º deste convenio, terá a consideración de hora extraordinaria.
O seu aboamento efectuarase cun incremento sobre a hora pactada do 75 por cento, as diarias, e do 100 por 100, as realizadas en domingos e festivos.
A base para o cálculo, así como os importantes resultados por aplicación das recargas sinaladas no parágrafo anterior, son os pactados e que figuran na táboa salarial anexa, que serán igual para tódolos traballadores da mesma categoría, sen distinción da antigüidade individual.
Artigo 7º.-Traballos en días festivos do persoal a quendas.
O persoal de traballo a quendas que polas especiais características do proceso non se pode interromper e que traballen en festas laborables, é dicir, festivos que non sexan domingos, percibirán, sen prexuízo da compensación do día de descanso correspondente, a gratificación que se detalla a seguir, a cal será incrementada co complemento de antigüidade que corresponda:
Oficial 1ª x.e.: 6.743 pesetas.
Oficial 1ª: 6.533 pesetas.
Oficial 2ª: 6.298 pesetas.
Axudante: 6.104 pesetas.
Auxiliar 1ª: 5.905 pesetas.
Auxiliar 2ª: 5.716 pesetas.
Auxiliar 3ª: 4.577 pesetas.
Esta gratificación será absorbida cando a retribución por traballo nestes días festivos teña distinta consideración á de xornada normal.
Durante os períodos de vacacións ou baixas de persoal, en caso de non se cubri-la quenda dos martes e mércores pola mañá, cubrirase necesariamente con quen corresponda, cunha compensación económica do 100% sobre o valor da hora pactada na táboa salarial para 2001, sen que exista ningunha obriga complementaria por parte da empresa.
Artigo 8º.-Complemento de transporte.
Establécese un complemento de transporte igual para todo o persoal da fábrica, de igual contía có custo dun billete de ida e volta, en autobús da empresa Cercanías de Ourense e polo traxecto Ourense-polígono.
Artigo 9º.-Nocturnidade e prima de actividade.
Nocturnidade. Os traballadores que realicen a súa xornada laboral nas horas consideradas como nocturnas, é dicir, entre as 22 e as 6 horas, percibirán un complemento do 25% do salario base.
Prima de actividade. Establécese un incremento do 4% sobre a prima de actividade de 2000 para tódolos traballadores, por mes realmente traballado, quedando fixada esta en 5.227 pesetas.
Artigo 10º.-Modificación de categoría profesional de implantación de novo sistema de traballo.
Tódalas seccións da empresa se consideran como integradas nun único proceso productivo.
Tódolos traballadores, calquera que sexa a súa categoría profesional, atenderán as áreas inherentes ó dito proceso, segundo as instruccións dos seus mandos e responsables, no sentido de optimización e mellora de rendementos e productividade do proceso. Para iso, promociónase á categoría de oficial de 1ª un máximo de catro oficiais de 2ª e a un mínimo dos que reúnan as condicións previstas no
artigo 24 do Estatuto dos traballadores; igualmente, promociónase á categoría de oficiais de 2ª un axudante, que igualmente reúna as condicións previstas.
Como consecuencia deste único proceso productivo, modifícase o sistema de traballo para o actual cadro de persoal de 12 traballadores, formándose 5 equipos de traballo, composto por dúas persoas cada equipo, das cales un deles terá necesariamente categoría de oficial de 1ª. As restantes persoas estarán en réxime de fóra de quenda de luns a venres, con carácter non definitivo e mentres as circunstancias do proceso o permitan.
As quendas serán de carácter rotativo coa seguinte orde:
1º Quenda de noite.
2º Quenda de mañá.
3º Quenda de tarde.
4º Fóra de quenda.
A reincorporación ó traballo, despois do desfrute das vacacións, farase en réxime de fóra de quenda, na vez de se incorporar á quenda que tiña anteriormente.
Despois dun período de baixa por enfermidade, o traballador reincorporarase ó traballo, na quenda que lle correspondería se non estivese de baixa.
En caso de dúas ou máis baixas por enfermidade, adaptaranse as quendas ás necesidades do proceso.
Cando por necesidades do proceso, coincidan dous oficiais de 2ª na mesma quenda, un deles farase cargo da quenda, como responsable dela e en funcións de oficial de 1ª, percibindo a diferencia de posto correspondente. A empresa designará o responsable da quenda, en caso necesario.
Como consecuencia desta implantación do novo sistema de traballo, establécense as compensacións económicas seguintes:
Oficial 2ª: 2.000 pesetas/mes realmente traballado.
Axudante: 3.000 pesetas/mes realmente traballado.
Esta compensación faise extensiva ó mes de vacacións.
Artigo 11º.-Impostos e cargas sociais.
Os impostos, cargas sociais e calquera deducción de tipo obrigatorio que gravan na actualidade ou que graven no futuro as condicións económicas pactadas neste convenio, serán satisfeitos por quen corresponda conforme a lei.
Capítulo III
Xornada de traballo
Artigo 12º.-Xornada.
Establécese unha xornada para tódolos traballadores de corenta horas semanais.
Artigo 13º.-Vacacións.
Todo o persoal, sen distinción de grupos e categorías profesionais, terán dereito a desfrutar anualmente un período de vacacións retribuído de 30 días naturais.
O calendario para desfrute das vacacións pactarase entre a empresa e os traballadores. Se non hai acordo, e tendo en consideración as características do proceso productivo, a empresa fixará as quendas de descanso do persoal de acordo co preceptuado no artigo 38 da Lei 8/1980, do Estatuto dos traballadores.
Como compensación para o persoal que desfrute das vacacións nos meses de fóra do período de verán (xuño, xullo, agosto e setembro), establécese unha compensación económica de 21.700 pesetas, que ten carácter graciable e non computable para efectos de sucesivos convenios, a non ser que haxa pacto en contrario. As quendas de vacacións sortearanse cada ano entre tódolos traballadores.
Tal período de vacacións será retribuído na súa totalidade polo salario real que se veña percibindo.
Artigo 14º.-Licencias con soldo.
A empresa concederá licencias con soldo nos casos seguintes e na duración que se indica:
a) Quince días naturais por matrimonio do traballador.
b) Tres días naturais por parto da esposa; esta licencia ampliarase en dous días máis, en caso de intervención cirúrxica.
c) Tres días naturais ou seis medias xornadas consecutivas, por enfermidade grave ou operación cirúrxica maior de cónxuxe, fillos, pais, irmáns, netos e avós.
d) Tres días naturais por falecemento dos familiares citados.
e) Un día natural por matrimonio de irmáns ou fillos.
f) Un día natural por falecemento de familiares indirectos.
g) Polo tempo indispensable para a consulta do traballador polo médico de cabeceira ou especialista, sen que en ningún caso esta licencia poida superar dúas horas.
h) En caso de que o feito causante se desenvolva fóra da provincia do domicilio habitual, estas licencias serán ampliadas un día natural.
i) Un día por traslado de domicilio do traballador.
O traballador estará obrigado a presentar, en calquera caso, documentos ou xustificantes legais ou médicos que acrediten a existencia das circunstancias alegadas pola obtención das licencias anteriores. Estas licencias terán que se desfrutar no momento de se produci-lo feito causante.
Artigo 15º.-Festividade da patroa.
Con independencia das festas nacionais e locais dispostas pola autoridade competente, os traballadores afectados por este convenio, festexarán a patroa da industria cervexeira, Virxe das Viñas, que normalmente cadra co 10 de setembro, que de ser laboral, haberase que ater ó disposto no artigo 7º deste convenio.
Capítulo IV
Prestacións e servicios sociais
Artigo 16º.-Axuda por incapacidade laboral transitoria.
Todo o persoal afectado por este convenio, en caso de incapacidade laboral transitoria derivada de enfermidade común, accidente non laboral, enfermidade profesional ou accidente laboral, percibirá un complemento ata acada-lo 100% do salario real, nos seguintes casos:
a) Enfermidade común, accidente non laboral con internamento en centros hospitalarios: en tódolos casos e desde o feito da baixa. Cando despois da alta clínica, o traballador debe continuar tratamento no seu domicilio poderá ser sometido a recoñecemento polo médico de empresa e outro que esta designe, e á vista do xuízo emitido reconsiderarase a concesión deste complemento.
b) Demais casos de enfermidade común: naqueles casos en que a empresa o considere conveniente logo dos pertinentes informes.
c) Accidente laboral: en tódolos casos, sen prexuízo de recoñecemento a que se fai referencia na letra a).
Artigo 17º.-Seguro de vida.
A empresa manterá un seguro de vida, para todo o persoal afectado por este convenio, sendo por conta dela a prima correspondente ata un máximo de catrocentas mil pesetas anuais. Se unha vez recoñecido o montante da prima, resultase superior á citada cantidade, o excedente correrá por conta do persoal, rateado en partes iguais.
A póliza cubrirá as seguintes continxencias:
a) Falecemento por morte natural: 3.000.000 de pesetas.
b) Invalidez permanente absoluta e derivada de enfermidade ou accidente: 3.000.000 de pesetas.
c) Morte por accidente: 6.000.000 de pesetas.
d) Morte por accidente de circulación: 9.000.000 de pesetas.
O condicionado para a eficacia deste seguro será o reflectido na póliza da compañía Winterthur.
Artigo 18º.-Economato.
A empresa comprométese a xestionar directamente cos almacéns de productos básicos (alimentación, vestiario, etc.) co fin de que o persoal poida efectuar compras, en condicións máis vantaxosas có mercado libre.
Artigo 19º.-Uniforme.
A empresa facilitaralle cada ano ó persoal operativo a roupa de uniforme que cumpra para o desenvolvemento das súas actividades.
Así mesmo, facilitaranse en casos de servicios ó exterior as pezas de roupa de auga e de abrigo adecuadas.
As demais pezas de roupa do equipo renovaranse cando se deterioren.
Artigo 20º.-Seguridade e hixiene.
Ámbalas partes manifestan a vontade de prove-los medios necesarios para unha mellora permanente
das condicións de traballo no tocante á seguridade e hixiene; para iso constitúese o Comité de Seguridade e Hixiene na empresa e estará composto por dous representantes da empresa e dous traballadores e presidido polo director da fábrica.
Reunirase, cando menos, unha vez ó mes. Estudiaranse os distintos aspectos para a mellora das condicións de seguridade e hixiene. De tódalas reunións, levantarase a acta correspondente.
Artigo 21º.-Fomento de contratación.
As partes contratantes deste convenio reiteran os seus desexos de fomentaren a contratación indefinida de traballadores.
Malia iso, e como fase previa á estabilidade no posto de traballo, e por estar encadrada a empresa nun sector no que non existe unha problemática específica, establécese a seguinte forma de contratación:
a) Contrato eventual por circunstancias de producción, acumulación de tarefas ou excesos de pedidos: as partes acordan que, de conformidade co establecido no artigo 15.1º ) do Estatuto dos traballadores, modificado pola Lei 63/1997, co obxecto de aproveitar ó máximo as posibilidades de emprego que ofrece a empresa, a duración máxima do contrato eventual por circunstancias de producción, acumulación de tarefas ou excesos de pedidos será de trece meses e medio dentro dun período de 18 meses.
Capítulo V
Garantías
Artigo 22º.-Garantías sindicais.
Os representantes dos traballadores desfrutarán, en todo momento, das garantías sindicais que estean establecidas pola lexislación vixente. Ningún traballador poderá ser discriminado por razón da súa afiliación política ou sindical.
Artigo 23º.-Reunións.
A empresa porá un taboleiro de anuncios á disposición do delegado de persoal, co fin de que poidan informar a todo o persoal sobre os asuntos que os poidan afectar.
O delegado de persoal celebrará unha reunión ordinaria cada mes cos traballadores, que terá carácter informativo e consultivo, fóra das horas de traballo e logo de comunicación á empresa. En tales reunións, calquera traballador poderá plantearlles ós seus representantes os problemas que o afecten persoalmente. Soamente en casos excepcionais de indubidable urxencia e importancia, poderá presenta-lo traballador os seus problemas ante os delegados, fóra das reunións antes citadas.
Así mesmo, poderase efectuar unha reunión extraordinaria, dentro das horas de traballo, cando o problema que hai que tratar teña a suficiente importancia e requira un tratamento de urxencia, logo de comunicación á empresa e conseguinte autorización dela, a quen se informará sobre os asuntos tratados e os acordos adoptados.
Capítulo VI
Disposicións adicionais
Artigo 24º.-Absorción e compensación.
Tódalas retribucións, tanto en concepto de salario base, complemento de convenio, como calquera clase de complementos, en canto fosen superiores ós mínimos establecidos con carácter xeral neste convenio, poden ser absorbidas e compensadas no seu conxunto e en cómputo anual, coas que se fixan no presente pacto. Tamén se compensarán ou absorberán as novas condicións que se poidan implantar, durante o período de vixencia deste acordo, por disposición legal de obrigado cumprimento.
Artigo 25º.-Liquidación de salarios.
A empresa liquidará os salarios de forma mensual, aboando o seu importe o último día de cada mes, mediante transferencia bancaria, talón bancario ou calquera outro sistema que garanta o movemento de fondos.
Artigo 26º.-Muller traballadora.
No concernente a dotes, descansos antes e despois do parto, excedencia por matrimonio, rescisión do contrato por matrimonio, excedencia por parto e reingreso da muller traballadora, haberá que aterse ó disposto legalmente sobre a materia.
Artigo 27º.-Dereito supletorio.
En todos aqueles aspectos non determinados concretamente no presente convenio, haberá que aterse ó establecido nas disposicións legais de carácter
xeral e de obrigado cumprimento, así como o disposto no Regulamento de réxime interior da empresa, que manterá plena vixencia en todas aquelas materias, que non se opoñan ó estipulado neste convenio ou non foran derrogadas por el.
Artigo 28º.
Dentro da estructura profesional da empresa créase a categoría de auxiliar 3ª obreiro que se define como operario maior de 18 anos que executa labores para a realización dos cales se require predominantemente achega de esforzo físico e en consecuencia a instrucción para a práctica operatoria será mínima.
Artigo 29ª.-Comisión paritaria.
Constitúese unha comisión paritaria integrada polos representantes do persoal e da empresa, que interviñeron na negociación do presente convenio, para a vixilancia do seu cumprimento e correcta interpretación, cando fose necesario, do texto aprobado por ámbalas dúas partes.
San Cibrao das Viñas, 10 de xullo de 2001.
Pola representación social:
O representante dos traballadores:
Carlos A. Serantes Gómez
Pola representación empresarial:
O administrador único:
Carlos Walter Schumacher
Director da fábrica:
Ricardo García Blanco
Táboa salarial 2001
Categoría Nivel Salario base P. convenio Total Base h. pactada 75% Mellorada
Titulados Superior A 270.798 94.726 365.524 1.423 2.489 3.306 Medio A 248.840 67.349 316.189 1.271 2.224 2.947 Medio A 218.769 67.349 286.118 1.100 1.925 2.575
Técnicos Xefe de 1ª A 225.661 62.797 288.458 1.100 1.925 2.575 Xefe de 2ª A 189.582 55.696 245.278 921 1.613 2.152 Oficial de 1ª A 157.240 55.247 212.487 790 1.383 1.836 Oficial de 2ª A 118.734 46.006 164.740 677 1.185 1.575 Auxiliar A 106.303 44.713 151.016 586 1.024 1.362 Encargado 157.240 55.247 212.487
Administrativo Xefe de 1ª A 225.661 62.797 288.458 1.100 1.925 2.575 Xefe de 1ª B 200.719 62.797 263.516 1.016 1.777 2.363 Xefe de 2ª A 189.582 55.696 245.278 921 1.613 2.152 Xefe de 2ª B 169.322 53.463 222.785 854 1.493 1.983 Oficial de 1ª A 157.240 55.247 212.487 790 1.383 1.836 Oficial de 1ª B 144.260 49.396 193.656 737 1.291 1.705 Oficial de 2ª A 128.393 46.944 175.337 677 1.185 1.575 Oficial de 2ª B 118.734 46.017 164.751 677 1.185 1.575 Auxiliar A 106.303 44.714 151.017 586 1.024 1.362
Subalternos Subalt. 1ª x.e. A 118.734 46.017 164.751 677 1.185 1.575 Subalterno 1ª A 111.533 45.316 156.849 627 1.098 1.459 Subalterno 2ª A 104.162 44.511 148.673 569 995 1.329
Obreiros Oficial 1ª x.e. 4.191 46.801 724 1.267 1.720 Oficial de 1ª 3.782 45.597 641 1.120 1.664 Oficial de 2ª 3.618 45.044 599 1.048 1.584 Axudante 3.472 44.614 569 995 1.502 Auxiliar de 1ª 3.406 44.377 551 965 Auxiliar de 2ª 3.321 44.177 540 945 Auxiliar de 3ª 2.604 33.460 426 746