O pleno do Concello de Muros en sesión celebrada o 25 de xaneiro de 2002 acordou ceder gratuitamente ó Servicio Galego de Saúde, a parcela A, sita na Agra de Sorribas, na parroquia de Serres, propiedade do Concello, con destino á construcción do novo centro de saúde.
Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia para a adquisición de bens a título gratuíto. Por outra banda, o artigo 23.1º da mesma lei establece que non se poderán adquirir bens ou dereitos a título lucrativo cando o valor global dos gravames, cargas e afectacións impostas sobre eles sobrepase o seu valor intrínseco. Non se considerará carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e presidente do Servicio Galego de Saú
de, despois da deliberación do Consello da Xunta na súa reunión do día seis de xuño de dous mil dous,
DISPOÑO:
Artigo 1º
1. Acéptase a cesión a título gratuíto feita polo Concello de Muros a favor do Servicio Galego de Saúde, con destino á construcción do novo centro de saúde.
2. O predio cedido, parcela A, está sito na Agra de Sorribas, na parroquia de Serres, e ten unha superficie de 5.061 metros e 64 centímetros cadrados, sendo as súas estremas as seguintes:
-Norte: terreo destinado á vía pública e despois muro que separa as agras de Sorribas e Foxo.
-Sur: terreo destinado a vía pública (camiño dos defuntos).
-Leste: terreo edificable B da Agra de Sorribas cedido polo concello ó Estado para construí-lo cuartel da garda civil.
Oeste: Terreo destinado a vía pública e despois muro que separa as agras de Sorribas e das Brañas.
Artigo 2º
O inmoble acéptase segundo o establecido nos artigos 23.1º da Lei 3/1985, do 12 de abril, do patrimonio da Comunidade Autónoma e 38 do seu regulamento e destinarase á construcción do novo centro de saúde na vila de Muros.
Artigo 3º
O Servicio Galego de Saúde, a través do seu órgano competente, procederá á formalización da aceptación no correspondente documento público integrándose no seu patrimonio propio.
Disposición derradeira
O Servicio Galego de Saúde, a través do seu órgano competente, levará a cabo os trámites necesarios para a efectividade de canto se dispón neste decreto.
Santiago de Compostela, seis de xuño de dous mil dous.
Manuel Fraga Iribarne
Presidente
José María Hernández Cochón
Conselleiro de Sanidade
