O Concello de Noia, en sesión do día vinteoito de xuño de dous mil dous, aprobou o proxecto de expropiación de terreos para a construcción da estación depuradora de augas residuais de Noia, e na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa, ó abeiro do disposto no artigo 52 da Lei de expropiación forzosa.
Por parte do concello foi remitida a documentación complementaria para a correcta tramitación do expediente, con data de entrada no rexistro xeral da Consellería de Xustiza, Interior e Relacións Laborais o día dez de setembro de dous mil dous.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. Este informe tivo entrada no rexistro xeral da Consellería de Xustiza, Interior e Relacións Laborais o día cinco de setembro de dous mil dous.
O organismo autónomo Augas de Galicia ratificouse no informe elaborado sobre a localización da estación depuradora de Noia. Esta ratificación tivo entrada no rexistro da Consellería de Xustiza, Interior e Relacións Laborais, o día trece de setembro de dous mil dous.
A Dirección Xeral de Recursos Mariños da Consellería de Pesca e Asuntos Marítimos, emitiu informe favorable sobre a situación. Este informe tivo entrada no rexistro da Consellería de Xustiza, Interior e Relacións Laborais o día dezaseis de outubro de dous mil dous.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, xa que, segundo sinala o concello, a actuación vén dada pola imperiosa necesidade de poder contar cunhas instalacións desa natureza, co fin de poder garanti-la saúde pública dos cidadáns e como medio de conserva-lo ambiente e o hábitat da ría de Noia, posto que a explotación marisqueira constitúe a base económica da maior parte da poboación da vila.
A competencia para a declaración da urxente ocupación correspóndelle ó Consello da Xunta de Galicia, segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia, na súa
reunión do día trinta e un de outubro de dous mil dous,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Noia, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución do proxecto de construcción da estación depuradora de augas residuais de Noia.
Santiago de Compostela, treinta e un de outubro de dos mil dous
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais
