A exposición de motivos da Lei 10/1998, do 21 de abril, de residuos, seguindo o criterio da normativa comunitaria sinala que, como complemento da regulación de carácter xeral, se poderán dictar normas para os diferentes tipos de residuos coa finalidade de establecer disposicións particulares sobre a súa producción ou xestión. Así, tamén a disposición adicional primeira da devandita norma permite que regulamentariamente se estableza un réxime menos severo para os pequenos productores de residuos perigosos ou de productos do uso dos cales puidesen derivar tales residuos. Por último, a disposición derradeira terceira da Lei 10/1998 recoñece as competencias das comunidades autónomas no desenvolvemento e na execución da devandita lexislación básica.
Neste sentido, púidose constatar que certas actividades industriais ou de servicios, tales como as tinturerías, os laboratorios fotográficos, os talleres mecánicos, as imprentas, as realizadas por profesionais sanitarios, poden chegar a xerar residuos perigosos en pequenas cantidades que, de acordo coa normativa vixente, deben ser entregados a xestores autorizados. Non obstante, a práctica demostrou que o uso e a aplicación ás devanditas entregas dos documentos oficiais de control e seguimento establecidos con carácter xeral polo Real decreto 833/1988, do 20 de xullo, polo que se aproba o Regulamento para a execución da Lei 20/1986, básica de residuos tóxicos e perigosos, resultan desproporcionados.
Por iso se considerou conveniente establecer, no ámbito da Comunidade Autónoma de Galicia, un réxime simplificado de control na recollida e traslado de residuos procedentes de pequenos productores de residuos perigosos, nunha dobre dirección: por unha parte, facilitando o control nas recollidas itinerantes de residuos perigosos en pequenas cantidades realizadas por un xestor a varios productores e, por outra, permitindo que as recollidas de distintos residuos dun mesmo productor realizadas por un xestor, se poidan documentar nun só protocolo.
Deste xeito, a diferencia do actual sistema de control de traslados de residuos perigosos, este procedemento non esixirá que por cada traslado e por cada residuo se teña que realizar un documento de control e seguimento, contendo tamén unha simplificación o sistema de cotexo de datos entre o pequeno productor e o xestor de residuos.
Este réxime simplificado pretende incidir exclusivamente na tramitación e documentación dos traslados de residuos perigosos, sen afecta-lo réxime xeral das obrigas establecidas na actual normativa
respecto das dos productores e xestores de residuos perigosos.
Por todo iso, por proposta do conselleiro de Medio Ambiente, de acordo co dictame do Consello Consultivo de Galicia e logo de deliberación do Consello da Xunta de Galicia na súa reunión do vintesete de marzo de dous mil tres,
DISPOÑO:
Capítulo I
Disposicións xerais
Artigo 1º.-Obxecto e ámbito de aplicación.
1. O obxecto deste decreto é establecer un réxime simplificado de control da recollida de residuos perigosos no ámbito da Comunidade Autónoma de Galicia e simplifica-lo control do transporte de residuos perigosos xerados polos pequenos productores destes residuos, entendendo por pequenos productores aqueles que xeran ou importan menos de 10.000 kg ó ano de residuos tóxicos e perigosos e están inscritos no Rexistro Xeral de Xestores e Productores de Residuos de Galicia.
2. Neste réxime simplificado, o control da xestión dos residuos levarase a cabo mediante os modelos de documentos de control dos residuos que se regulan neste decreto nos artigos 3º, 4º e 8º, en concreto:
a) Documento de control e seguimento itinerante de residuos perigosos (modelo SXCR 1).
b) Xustificante de entrega (modelo SXCR 2).
c) Documento de control e seguimento de varios residuos recollidos a un mesmo pequeno productor (modelo SXCR 3).
3. O procedemento regulado nesta norma aplicarase ós traslados de residuos perigosos que se orixinen entre os pequenos productores de residuos perigosos e os xestores destes residuos dentro da Comunidade Autónoma galega e non será aplicable ós traslados que se orixinen entre productores de residuos perigosos de máis de 10.000 quilogramos anuais e xestores de residuos perigosos, nin entre os xestores entre si.
Capítulo II
Actuacións previas ó traslado de residuos
perigosos
Artigo 2º.-Documento de aceptación.
1. Con carácter previo á entrega e transporte de residuos perigosos, o pequeno productor do residuo deberá obte-lo documento de aceptación por parte do xestor destinatario destes. No dito documento deberá consta-lo consentimento do xestor, a súa sinatura e os datos do residuo aceptado relativos á identificación con código CER e do Real decreto 952/1997, do 20 de xuño, polo que se modifica o Regulamento para a execución da Lei 20/1986, do 14 de maio.
2. O pequeno productor dos residuos deberá efectuar un aviso previo do traslado á dirección xeral competente en materia de calidade ambiental, cunha antelación de polo menos 10 días á data do traslado.
Neste aviso previo identificarase o pequeno productor que vai efectua-la entrega e expresarase o lugar de recollida, a matrícula do vehículo e o transportista que se utilizará, a data e o itinerario previsto de recollida e o tipo de residuo que se vaian trasladar, con identificación do CER e do xestor do residuo.
3. O pequeno productor poderá convir co xestor que sexa este quen efectúe o aviso previo de traslado. Este acordo deberá formalizarse por escrito e será comunicado á dirección xeral competente en materia de calidade ambiental.
Capítulo III
Documentos para o control de traslados
dos residuos perigosos
Artigo 3º.-Documento de control e seguimento itinerante.
1. O documento de control e seguimento itinerante (anexo I. Modelo SXCR-1) é o documento normalizado que se debe utilizar cando un xestor de residuos perigosos ou un transportista de residuos que non asume a súa titularidade recollen un mesmo tipo de residuo de varios productores nun itinerario.
2. En cada documento só se poden reflecti-los traslados dun mesmo tipo de residuo.
3. O documento de control e seguimento itinerante constará de tres exemplares en papel autocopiativo, de cor branca, verde e azul:
a) O exemplar branco é para o xestor.
b) O exemplar verde é para o transportista.
c) O exemplar azul é para a dirección xeral competente en materia de calidade ambiental.
4. O documento de control e seguimento itinerante constará, así mesmo, dun talonario con 20 xustificantes de entrega de residuos que permiten a recollida en 20 centros productores de residuos, cunha numeración que se corresponderá coa correlativa do documento de control e seguimento itinerante.
Artigo 4º.-Xustificante de entrega.
1. O xustificante de entrega (anexo II. Modelo SXCR-2) é o documento de control da recollida e entrega do residuo do pequeno productor no que só poderán consta-las entregas de residuos perigosos. O devandito documento serviralle ó pequeno productor como comprobante do destino dado ó residuo.
2. Nos supostos de recollida itinerante de residuos efectuada por un xestor de residuos perigosos, este documento servirá para acredita-la asunción de responsabilidade das cantidades de residuo recollidas polo xestor. A partir da súa entrega ó xestor, o productor do residuo non asume ningunha responsabilidade polo transporte e xestión deste.
3. Nos supostos de recollida itinerante de residuos efectuada por un transportista que non asume a titularidade do residuo para a súa posterior entrega a un xestor, o dito xustificante terá carácter provisional ata a efectiva recepción e aceptación dos residuos polo xestor.
4. Cada xustificante de entrega constará de dous exemplares en papel autocopiativo, de cor amarela e rosa, no que se recollerán os datos do productor, do transportista e do xestor:
a) O exemplar amarelo é o xustificante de entrega para o productor do residuo. O devandito xustificante terá carácter provisional no caso de que a entrega non se efectúe a un xestor que asume a titularidade do residuo.
O uso deste exemplar non será preciso no suposto de que a entrega se realice directamente a un xestor.
b) O exemplar rosa é o xustificante de entrega definitiva que o xestor lle remitirá ó productor que, previamente, efectuase a entrega a un transportista.
Artigo 5º.-Entrega de residuos a xestor autorizado no procedemento de control e seguimento itinerante.
1. No acto de recollida dos residuos, o xestor ou o transportista deberá cubrir por completo e asina-lo documento de control e seguimento itinerante cos datos correspondentes a cada entrega. En todo caso, no documento de control e seguimento itinerante tamén deberá figura-la sinatura do productor, o selo do centro onde se retira o residuo perigoso e a sinatura e selo do xestor que amose a súa conformidade para a recollida do residuo.
2. No suposto de que a entrega se efectúe directamente a un xestor autorizado este deberá, en caso de aceptalo, proporciona-la copia de cor rosa do xustificante de entrega debidamente asinada e selada ó pequeno productor do residuo.
Artigo 6º.-Entrega de residuos a transportista que non asume a súa titularidade no procedemento de control e seguimento itinerante.
O procedemento simplificado de control e seguimento de residuos, a entrega dos cales se efectúe a un transportista que non asume a titularidade do residuo para a súa ulterior entrega a un xestor, é o seguinte:
a) No acto de recollida de residuos, o transportista deberá entregar debidamente asinada e selada a copia de cor amarela do xustificante de entrega ó productor, na que fará constar que vai realiza-lo transporte e a entrega ó xestor nas condicións e forma axeitadas.
b) Unha vez efectuada a entrega do residuo ó xestor, este comprobará que os datos que constan no documento de control e seguimento itinerante son correctos e procederá a aceptar, se é o caso, o residuo mediante a devolución da copia de cor verde da folla de seguimento ó transportista. Así mesmo, enviará a copia de cor rosa do xustificante de entrega debidamente asinada e selada ó productor nun prazo máximo de quince días, contados desde a data da entrega do residuo polo transportista, e a copia de cor azul á dirección xeral competente en materia de calidade ambiental.
c) Se o xestor aprecia que o residuo non concorda coas características do que foi aceptado por el, deberá rexeitalo reflectindo esta circunstancia no correspondente documento de control e seguimento itinerante e serán por conta dos productores os gastos ocasionados como consecuencia da devandita devo
lución. O prazo para rexeitar e devolve-lo residuo poderá ser de ata cinco días se o xestor tivese que tomar mostras do residuo non identificable visualmente.
d) Os resultados destas mostras deberán conservarse polo menos durante 6 meses desde que se puxo en coñecemento da Administración o rexeitamento do residuo.
e) Neste caso, nas copias de cor azul e rosa dirixidas á dirección xeral competente en materia de calidade ambiental e ó productor reflectiranse as circunstancias do rexeitamento.
Artigo 7º.-Obrigas de conservación.
1. O productor deberá conserva-la copia rosa do xustificante de entrega durante un período non inferior a cinco anos e a copia amarela ata que lle sexa entregada a de cor rosa e, en todo caso, non máis de cinco anos.
2. O transportista deberá conserva-la copia de cor verde do documento de control e seguimento itinerante durante un período non inferior a cinco anos.
3. O xestor deberá conserva-la copia de cor branca do documento de control e seguimento itinerante durante un período non inferior a cinco anos.
Artigo 8º.-Documento de control e seguimento de varios residuos perigosos recollidos a un mesmo pequeno productor.
1. Este documento (anexo III-modelo SXCR.3) é o documento normalizado que se utilizará cando un xestor de residuos perigosos ou un transportista destes residuos que non asume a titularidade recollen varios tipos de residuos dun mesmo productor.
2. En cada documento reflectiranse os datos de ata un máximo de 18 residuos perigosos.
3. O documento constará de cinco exemplares en papel autocopiativo, de cor branca, amarela, rosa, azul e verde:
-O exemplar de cor branca é para o xestor.
-Os de cor amarela e rosa para o productor.
-O exemplar de cor azul é para a dirección xeral competente en materia de calidade ambiental.
-O exemplar verde é para o transportista.
4. No acto de entrega dos residuos, o xestor ou transportista deberá cubrir este documento de control e seguimento de varios residuos perigosos (anexo III), que lle facilitará ó productor para a súa sinatura e conformidade coa entrega e cos datos que constan no documento.
No documento deberá figura-lo selo e sinatura do productor, do xestor e, se é o caso, do transportista que non asume a titularidade do residuo.
Artigo 9º.-Entrega dos residuos a xestor autorizado no procedemento de control das recollidas de varios residuos dun mesmo productor.
Se a entrega se efectúa directamente a un xestor autorizado, este asumirá a titularidade e a responsabilidade do residuo unha vez subscrito o documento de conformidade por el e polo productor.
Neste caso, o xestor quedará coa copia de cor branca, entregándolle a copia de cor rosa ó productor, e enviará a de cor azul á dirección xeral competente en materia de calidade ambiental.
Artigo 10º.-Entrega dos residuos a transportista que non asuma a súa titularidade no procedemento de control das recollidas de varios residuos dun mesmo productor.
1. Se a entrega se efectúa a un transportista de residuos que non asume a titularidade, unha vez subscrito o documento por el e polo productor, entregará a copia amarela ó productor que lle servirá como xustificante da entrega do residuo ó transportista, pero non suporá a transmisión da titularidade do residuo ó xestor.
2. En canto ó resto das copias, a verde manteraa no seu poder e deberá conservala durante un mínimo de cinco anos e as demais entregarallas ó xestor de residuos:
a) O xestor, unha vez aceptado o residuo, subscribirá o documento de control, asumindo nese momento a titularidade do residuo e enviará a copia rosa, debidamente dilixenciada, ó productor, que deberá conservala durante un mínimo de cinco anos, e remitirá a azul á dirección xeral competente en materia de calidade ambiental.
b) Se o xestor apreciase que as características de residuo non concordan coas características do que foi aceptado por el, deberá rexeita-lo residuo. Neste caso, devolveralle o residuo ó productor e serán por conta deste os gastos ocasionados. O prazo para rexeitar e devolve-lo residuo poderá ser de ata cinco días se o xestor tivese que tomar mostras do residuo non identificable visualmente.
3. O resultado destas mostras deberá conservarse polo menos durante 6 meses desde que se puxo en coñecemento da Administración o rexeitamento do residuo.
Neste caso, nas copias de cor azul e rosa dirixidas á dirección xeral competente en materia de calidade ambiental e ó productor reflectiranse as circunstancias do rexeitamento.
Disposicións derradeiras
Primeira.-Autorízase o conselleiro de Medio Ambiente para dictar, no ámbito das súas competencias, cantas disposicións resulten necesarias para a aplicación e o desenvolvemento deste decreto.
Segunda.-Este decreto entrará en vigor ós dous meses da súa publicación no Diario Oficial de Galicia.
Santiago de Compostela, vintesete de marzo de dous mil tres.
Manuel Fraga Iribarne
Presidente
José Manuel Barreiro Fernández
Conselleiro de Medio Ambiente
