Mediante Resolución do 21 de maio de 2010 publicouse o acordo do Consello de Dirección do Instituto Galego de Promoción Económica que aprobou as bases reguladoras das axudas do Igape ao Programa de apoio á innovación das pequenas e medianas empresas en Galicia (Programa Innoempresa), cofinanciado polo Fondo Europeo de Desenvolvemento Rexional (DOG n.º 100, do 28 de maio), e mediante Resolución do 10 de marzo de 2011 convocáronse para o exercicio 2011 as ditas axudas (DOG n.º 63, do 30 de marzo).

Na dita Resolución do 10 de marzo de 2011, no seu punto terceiro, establécese a súa dotación orzamentaria, así como que o director xeral do Igape poderá ampliar os créditos e modificar as partidas orzamentarias, logo de declaración de dispoñibilidade dos créditos nos termos referidos no artigo 30.2 do Decreto 11/2009, mediante resolución publicada para o efecto.

Tendo en conta o volume de solicitudes recibidas e tratando de dar resposta á ampla demanda de axuda, semella oportuno incrementar o importe aprobado para as axudas establecidas nestas bases.

Na súa virtude e de conformidade coas facultades que teño conferidas,

RESOLVO:

Único. Amplíase en 2.000.000 € para o exercicio 2011 e en 1.000.000 € para o exercicio 2012 o crédito establecido na partida orzamentaria 20.02-E4/10/02-656 para as bases reguladoras das axudas do Igape ao Programa de apoio á innovación das pequenas e medianas empresas en Galicia (Programa Innoempresa), cofinanciado polo Fondo Europeo de Desenvolvemento Rexional (DOG n.º 100, do 28 de maio de 2010) convocadas mediante Resolución do 10 de marzo de 2011 (DOG n.º 63, do 30 de marzo).

Santiago de Compostela, 20 de xullo de 2011.

P.D. (Acordo 1.6.2011, DOG n.º 113, do 14 de xuño)
Francisco Javier Álvarez Barbeito
Secretario xeral do Instituto Galego de Promoción Económica