O Concello de Mos, Pontevedra, considerou conveniente organizar correctamente o seu emblema municipal para perpetualo coa simboloxía adecuada e conforme as normas de heráldica. Para iso, e de acordo coas facultades que lle confiren as disposicións legais vixentes, elevou o informe histórico-heráldico, coa correspondente proposta de representación gráfica da bandeira, para a súa aprobación definitiva.
A competencia exclusiva en materia de adopción, modificación ou rehabilitación dos emblemas heráldicos dos concellos e doutras entidades locais correspóndelle á Comunidade Autónoma galega, segundo o disposto polo artigo 27.2.º do Estatuto de autonomía de Galicia.
O expediente tramitouse conforme as normas de procedemento establecidas na Lei 7/1985, do 2 de abril, reguladora das bases de réxime local; Lei 5/1997, do 22 de xullo de Administración local de Galicia; no Decreto 19/2010, do 11 de febreiro, polo que se aproba o Regulamento de símbolos das entidades locais de Galicia e no Regulamento de organización, funcionamento e réxime xurídico das corporacións locais, aprobado polo Real decreto 2568/1986, do 10 de decembro.
Na súa virtude, visto o informe emitido pola Comisión de Heráldica da Xunta de Galicia e por proposta da persoa titular da Consellería de Presidencia, Administracións Públicas e Xustiza e logo da deliberación do Consello da Xunta de Galicia, na súa reunión do día catorce de xullo de dous mil once,
DISPOÑO:
Artigo único.
Aprobar a bandeira do Concello de Mos, que figura como anexo, organizado do seguinte xeito:
Pano partido ao centro. Amarelo á hasta cunha rosa de vermello tallada de verde; ao batente pano de branco con tres faixas xaqueladas de catro ordes de vermello e amarelo, separadas cada dúas por un filete de negro.
A rosa en pano amarelo, presente na simboloxía matricial e na sixilografía local desde o ano 1847, representa a actividade agrícola, o cultivo ornamental e a vinculación do termo municipal co río Louro. As faixas xaqueladas en pano de branco representan as armas dos Sotomayor, liñaxe señorial que desde o medievo exerceu unha grande influencia e da que descenderon distinguidas familias históricas establecidas no termo municipal, como a dos propios marqueses de Mos.
Santiago de Compostela, catorce de xullo de dous mil once.
Alberto Núñez Feijóo
Presidente
Alfonso Rueda Valenzuela
Conselleiro de Presidencia, Administracións Públicas e Xustiza
ANEXO