Antecedentes de feito.

Primeiro. O 1 de agosto de 2011 a asociación O Carrual presentou os anexos I e II do Decreto 130/2011, debidamente cubertos, e solicitou que se estudase a viabilidade dun plan de aproveitamento de anguía presentado con anterioridade.

Segundo. O 24 de agosto de 2011 iniciouse o correspondente expediente administrativo e fíxose unha valoración inicial do plan presentado, e o Servizo Provincial de Conservación da Natureza de Lugo entendeu que carecía dalgúns elementos. Así, o 21 de setembro de 2011 solicitóuselle á asociación O Carrual que completase a documentación no prazo de dez días, o que realizou de xeito satisfactorio o 26 de setembro de 2011.

Terceiro. O expediente sométese a trámite de información pública durante un prazo de 15 días segundo o disposto no Decreto 130/2011, do 9 de xuño, polo que se regula a pesca profesional da anguía nas augas continentais competencia da Comunidade Autónoma de Galicia. Esta resolución foi publicada no DOG núm. 184, do 26 de setembro de 2011, polo que o prazo de información pública remataba o 14 de outubro de 2011, sen que se teña constancia da presentación de ningunha alegación ata a data da sinatura deste documento.

Cuarto. O artigo 7.3 do Decreto 130/2011 establece a necesidade de que o plan que se aprobe sexa sometido a informe do Comité Provincial de Pesca. Para executar este trámite incluíuse na orde do día dun comité ordinario, que tivo lugar o 17 de outubro de 2011, a proposta para emitir informe sobre o plan, e na invitación os membros do comité eran informados da existencia do plan e da posibilidade de consultalo no Servizo Provincial de Conservación da Natureza de Lugo. A reunión ordinaria do Comité Provincial de Pesca tivo lugar na data prevista, e tras a exposición do plan por parte de membros do Servizo Provincial de Conservación da Natureza de Lugo, procedeuse á súa valoración e á consulta das dúbidas existentes. Tras estes trámites, o presidente fixo a proposta de emitir informe favorable sobre o plan, o que os membros do comité resolveron en votación coa aprobación desta moción por unanimidade.

Quinto. Segundo establece o artigo 7.5 do Decreto 130/2011 cómpre ter en conta para a aprobación de calquera plan de aproveitamento específico os criterios establecidos pola Decisión da Comisión Europea do 1 de outubro de 2010, os cales cumpre segundo informe técnico do Servizo Provincial de Conservación da Natureza de Lugo.

Fundamentos de dereito.

Primeiro. O disposto no Decreto 130/2011, do 9 de xuño, polo que se regula a pesca profesional da anguía nas augas continentais competencia da Comunidade Autónoma de Galicia.

Resolución:

Visto o exposto nos antecedentes e no informe emitido polo técnico do Servizo Provincial de Conservación da Natureza de Lugo acórdase a aprobación do Plan de Aproveitamento Específico de Anguía no Río Miño nos concellos de Portomarín, O Páramo, Paradela e Guntín.

O ámbito desta proposta de resolución é o seguinte:

Condicións xerais de aproveitamento: segundo o plan de explotación e o anexo presentados e aprobados.

Especie obxecto de captura: Anguía (Anguilla anguilla) en fase amarela.

Período autorizado: desde a aprobación ata febreiro. É posible o peche anticipado se non se dan as condicións adecuadas para a pesca e o ecosistema.

Vixencia: un ano, renovable, segundo establece o Decreto 130/2011.

Santiago de Compostela, 27 de outubro de 2011.

Ricardo García-Borregón Millán
Director xeral de Conservación da Natureza