O artigo 17 da Lei 15/1991, do 28 de decembro, de orzamentos xerais da Comunidade Autónoma galega para o ano 1992, ao abeiro do disposto no artigo 20 da Lei 4/1988, da función pública de Galicia, creou a escala técnica de finanzas, que se estrutura nas especialidades técnicas de inspección financeira e tributaria, de xestión tributaria e de contabilidade e intervención.
Pola súa parte, o artigo 16 da Lei 3/2002, do 29 de abril, de medidas de réxime fiscal e administrativo unificou as especialidades técnicas de inspección financeira e tributaria e de xestión tributaria nunha única especialidade de inspección e xestión financeira e tributaria, asumindo as funcións que anteriormente tiñan asignadas aquelas.
O Decreto 369/1992, do 17 de decembro, establece no seu artigo 5 a posibilidade de que os funcionarios que pertenzan a algunha das especialidades da escala técnica de finanzas poderán obter os diplomas que os habiliten para ocupar postos de traballo reservados á outra especialidade da dita escala.
Por Orde da Consellería de Economía e Facenda do 22 de outubro de 2003 convocáronse probas específicas para a obtención dos diplomas das especialidades da escala técnica de finanzas. Polo tanto, considérase necesario proceder á nova convocatoria das mencionadas probas para permitir a cobertura ordinaria dos postos de traballo reservados á escala polo persoal funcionario que acredite a súa pertenza ás especialidades dela, mediante a posesión dos correspondentes diplomas.
En virtude do exposto, e facendo uso da autorización prevista no artigo 5 do Decreto 369/1992, do 17 de decembro,
DISPOÑO:
Artigo 1. Obxecto.
1. Convócanse as probas específicas para a obtención dos diplomas das especialidades da escala técnica de finanzas co obxecto de que o persoal funcionario que as supere poida acceder, se é o caso, aos postos de traballo correspondentes ás ditas especialidades.
As probas desenvolveranse en dúas modalidades, na forma en que se establece nos anexos I e II desta orde, e consistirán na superación dunha proba escrita ou ben na realización dun curso, relacionados coas materias recollidas no anexo III.
2. A obtención, como consecuencia da superación das probas establecidas nesta orde, da especialidade adicional da escala técnica de finanzas non suporá cambio de situación administrativa nin, se é o caso, do posto de traballo desempeñado.
Artigo 2. Solicitantes.
Poderá solicitar a súa participación nas probas o persoal funcionario que, con referencia ao último día do prazo de presentación de solicitudes, pertenza a algunha especialidade da escala técnica de finanzas da Xunta de Galicia e desexe obter o correspondente diploma que o habilite para ocupar postos de traballo reservados á outra especialidade da escala.
Artigo 3. Solicitudes.
O persoal funcionario que reúna os requisitos exixidos e desexe participar nas probas deberá presentar a súa solicitude conforme o modelo do anexo IV desta orde, facendo constar nela a modalidade de proba que desexa realizar. As solicitudes, dirixidas á persoa titular da Consellería de Facenda, presentaranse nas oficinas de rexistro da Xunta de Galicia, oficinas de correos e demais lugares previstos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común. Á instancia unirase a certificación a que fai referencia o anexo V.
O prazo de presentación de instancias será de dez (10) días hábiles a partir do día seguinte ao da publicación desta orde no Diario Oficial de Galicia.
Artigo 4. Relación de admitidos.
Unha vez expirado o prazo de presentación de solicitudes, a persoa titular da Consellería de Facenda aprobará as listaxes provisionais do persoal funcionario admitido e excluído a través dunha resolución que será publicada no Diario Oficial de Galicia e nos lugares determinados pola normativa vixente, con indicación dos apelidos, nome e número de documento nacional de identidade, das causas da súa exclusión e do lugar en que estarán expostas.
O persoal funcionario excluído disporá dun prazo de dez (10) días hábiles, contados a partir do seguinte ao da publicación da resolución, para poderen emendar, de ser o caso, o defecto que motivou a exclusión.
A estimación ou desestimación das ditas peticións de correccións entenderase implícita na resolución pola que se publique a listaxe definitiva do persoal funcionario admitido e excluído.
Unha vez transcorrido o dito prazo, a persoa titular da Consellería de Facenda ditará unha nova resolución que aprobe as listaxes definitivas do persoal funcionario admitido e excluído, contra a cal se poderá interpoñer recurso potestativo de reposición no prazo dun mes contado desde o día seguinte ao da dita publicación, de acordo co disposto na Lei 30/1992, do 26 de novembro, ou directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde a mesma data, de conformidade co disposto na Lei 29/1998, do 13 de xullo, reguladora da xurisdición contencioso-administrativa.
Artigo 5. Convocatoria dos aspirantes.
O persoal funcionario admitido, no prazo de tres meses desde a publicación da lista de admitidos, será emprazado para a realización do exame ou ben para o inicio do curso, segundo a modalidade elixida por eles, nos cales se determinará o grao de coñecemento das materias correspondentes á especialidade que pretenden obter.
Artigo 6. Cualificacións.
As probas cualificaranse como apto ou non apto.
Finalizado o exame ou o curso, segundo proceda, a persoa titular da Consellería de Facenda ditará resolución definitiva coa relación do persoal funcionario que as superaron. A dita resolución será publicada no Diario Oficial de Galicia.
A cualificación de apto orixinará a expedición do correspondente documento acreditativo da superación das probas e da pertenza á especialidade correspondente da escala técnica de finanzas.
Disposición derradeira única.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 16 de febreiro de 2012.
Elena Muñoz Fonteriz
Conselleira de Facenda
ANEXO I
Modalidade A: realización dunha proba escrita
I. Realización da proba.
O persoal funcionario que opte por esta modalidade será convocado para a realización dunha proba escrita, nun tempo máximo de catro horas, que consistirá na resolución dun cuestionario teórico e un suposto práctico que versará sobre as materias que para cada especialidade da escala técnica de finanzas están relacionadas no anexo III desta orde.
II. Comisión de avaliación.
Para a avaliación das probas establécese una comisión para cada unha das especialidades, que será designada por resolución da persoa titular da Consellería de Facenda.
III. Cualificación.
Tras a cualificación das probas por parte da comisión de avaliación anteriormente citada, elevarase a relación do persoal funcionario que as superarou á persoa titular da Consellería de Facenda para que dite resolución para o efecto.
ANEXO II
Modalidade B: realización dun curso
I. Realización do curso.
O persoal funcionario que opte por esta modalidade será convocado para a realización dun curso en que se impartirán as materias que para cada especialidade da escala técnica de finanzas están relacionadas no anexo III desta orde.
II. Comisión de avaliación.
Para a avaliación das probas establécese una comisión para cada unha das especialidades, que será designada por resolución da persoa titular da Consellería de Facenda.
III. Duración e horarios.
O curso articúlase como mixto de 100 horas, combinando a formación presencial (50 horas lectivas) coa formación a distancia ou non presencial (50 horas). A persoa titular da Consellería de Facenda poderá modificar a duración, datas e horarios dos cursos, para adaptalos ás necesidades administrativas e ás continxencias que xurdan no desenvolvemento do curso.
IV. Asistencia.
É obrigatoria a asistencia e puntualidade a todas as actividades do curso. A ausencia xustificada deberá ser autorizada pola persoa designada para a dirección do curso. A inasistencia, aínda que sexa xustificada, en máis do 10% das horas lectivas da formación presencial determinará a cualificación de non apto do curso.
V. Avaliación do curso.
Ao longo do curso efectuarase unha avaliación do traballo realizado considerando, para tal efecto, o grao de dedicación e o aproveitamento obtido no contido dos diversos módulos mediante a realización, se é o caso, das oportunas probas.
Ao remate do curso realizarase, nun tempo máximo de catro horas, unha proba escrita, que consistirá na resolución dun cuestionario teórico e un suposto práctico sobre as materias obxecto do curso, a cualificación do cal será apto ou non apto.
Finalizado o curso, a persoa designada para a dirección do curso trasladará á comisión citada no punto II a proposta de cualificacións obtidas polo persoal funcionario participante nel. Efectuada a avaliación pola dita comisión, esta elevaralle á persoa titular da Consellería de Facenda a relación do persoal funcionario que o superou, para que dite resolución para o efecto.
ANEXO III
Materias correspondentes a cada unha das especialidades da
escala técnica de finanzas
1. Especialidade técnica de inspección e xestión financeira e tributaria.
– Política financeira.
– Tributos xestionados pola Comunidade Autónoma.
– Tributos xestionados polo Estado.
– Procedementos de xestión, inspección, recadación, sancionador e de revisión.
2. Especialidade técnica de contabilidade e intervención.
– Contabilidade pública.
– Función interventora.
– Auditoría e control financeiro.
– Xestión orzamentaria.
ANEXO IV
Solicitude de participación nas probas para a obtención dos diplomas
das especialidades da escala técnica de finanzas convocadas pola
Orde do 16 de febreiro de 2012
SOLICITANTE:
Apelidos e nome:
DNI:
Especialidade da escala técnica de finanzas:
Antigüidade na escala:
SOLICITA: ser admitido á realización das probas convocadas pola dita orde para a obtención dos diplomas da especialidade que a continuación se sinala:
□ Especialidade técnica de inspección e xestión financeira e tributaria
□ Especialidade técnica de contabilidade e intervención
MODALIDADE ELIXIDA:
□ Proba específica
□ Curso
..., ... de ... de ...
CONSELLEIRA DE FACENDA
ANEXO V
Nome do/a funcionario/a que certifica:
Cargo:
CERTIFICO: que segundo os antecedentes que constan neste centro directivo, e á vista da documentación achegada polo/a funcionario/a:
D./D.ª ..................................................................................................... ten acreditados os seguintes datos administrativos:
NRP |
CORPO/ESCALA |
GRUPO |
|
SITUACIÓN ADMINISTRATIVA |
DATA DO PASE Á SITUACIÓN ADMINISTRATIVA |
||
POSTO DE TRABALLO |
DATA DA TOMA DE POSESIÓN |
FORMA DE PROVISIÓN |
CÓDIGO DO POSTO |
UNIDADE ORGÁNICA DE QUE DEPENDE |
|
CONSELLERÍA |
LOCALIDADE |
PROVINCIA |