Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 69 Mércores, 11 de abril de 2012 Páx. 12918

IV. Oposicións e concursos

Consellería do Medio Rural e do Mar

RESOLUCIÓN do 3 de abril de 2012, da Secretaría Xeral Técnica da Consellería do Medio Rural e do Mar, pola que se convoca a realización das probas físicas e de agudeza visual aos integrantes das listas reguladas polo Decreto 5/2007, do 25 de xaneiro, polo que se modifica o Decreto 37/2006, do 2 de marzo, correspondentes a determinadas categorías de persoal laboral dos servizos de prevención e defensa contra incendios forestais e de persoal do Pladiga.

A base 9.ª da Resolución da Dirección Xeral da Función Pública, do 30 de xaneiro de 2007, establece que para poder ser contratados nas categorías de técnico superior de defensa contra incendios forestais, técnico forestal de defensa contra incendios forestais, xefe de cuadrilla, condutor de motobomba, peón condutor e peón de defensa contra incendios forestais, é requisito imprescindible a superación dunha proba de aptitude física: proba do banco, que consistirá en subir e baixar dun banco de 40 cm de altura para os homes e 33 cm para as mulleres, a razón de 90 movementos por minuto (22,5 veces por minuto) durante un período de 5 minutos. Será necesario para ser considerado apto obter como mínimo os parámetros de capacidade aeróbica pola aplicación dos resultados da idade, peso e pulsacións segundo as táboas propias desta proba: 38 puntos, agás no caso dos condutores de motobomba, que será de 35 puntos. E para poder ser contratado nas categorías de vixilante fixo e vixilante móbil é requisito imprescindible a superación dunha proba de agudeza visual na que tamén o resultado é apto ou non apto.

Por outro lado o Acordo do 23 de marzo de 2012, entre a Consellería de Facenda e a Consellería do Medio Rural e do Mar, polo que se encomenda a xestión de determinadas materias relacionadas coas listas de contratación temporal de persoal laboral dedicado ás tarefas de prevención e extinción de incendios forestais e do Plan de Prevención e Defensa contra Incendios Forestais de Galicia (Pladiga) derivadas do Decreto 37/2006, do 2 de marzo, á Consellería do Medio Rural e do Mar, establece na cláusula 1.a) que a organización e realización da proba física, e, de ser o caso, da de agudeza visual, á cal deben someterse os distintos integrantes das listas, corresponde á Consellería do Medio Rural e do Mar.

Con base no anterior, esta secretaría xeral técnica

RESOLVE:

1.º As probas físicas e de agudeza visual dos aspirantes das listas reguladas polo Decreto 5/2007, do 25 de xaneiro, polo que se modifica o Decreto 37/2006, do 2 de marzo, correspondentes a determinadas categorías de persoal laboral dos servizos de prevención e defensa contra incendios forestais e de persoal do Pladiga, iniciaranse ás 8.30 horas do 23 de abril de 2012 nas capitais das catro provincias galegas, nos seguintes lugares:

A Coruña: Pavillón Polideportivo Monte Alto; rúa Alcalde Sanjurjo, s/n, A Coruña.

Lugo: pistas deportivas Gregorio Pérez Rivera (As Pedreiras); rúa Filarmónica Lucense, s/n, Lugo.

Ourense: Pavillón Polideportivo da Comisaría de Policía. As Lagoas, s/n, Ourense.

Pontevedra: Pavillón Municipal dos Deportes; r/ Juan Manuel Pintos, s/n, Pontevedra

2.º A data de realización das probas será determinada pola orde alfabética dos apelidos dos aspirantes e será a seguinte para cada provincia:

Data

Letra apelido

23 de abril de 2012

A-B-C-D

24 de abril de 2012

E-F-G-H-I

25 de abril de 2012

J-K-L-M-N-Ñ

26 de abril de 2012

O-P-Q-R

27 de abril de 2012

S-T-V-W-X-Y-Z

Os aspirantes poderán consultar o día e o lugar de realización das probas na páxina web da Consellería do Medio Rural e do Mar: http://medioruralemar.xunta.es

A partir do día de inicio das probas, exporase nos lugares de realización das probas, así como nos distritos forestais de cada provincia, a relación de aspirantes con indicación da data de realización correspondente.

3.º Os aspirantes realizarán as probas na provincia do domicilio indicado na súa solicitude de inscrición nas listas. Os que teñan o domicilio fóra de Galicia poderán realizar as probas en calquera das provincias en que pretendan traballar.

4.º Dado que a vixencia das probas é anual, están obrigados a realizar estas probas todos os aspirantes.

5.º Os aspirantes deberán acudir á realización da proba provistos do DNI e dun certificado médico oficial ou informe sobre o estado de saúde, asinado por un colexiado en exercicio en que se faga constar que non presenta enfermidade ou discapacidade que impida o correcto desenvolvemento dunha proba de esforzo físico. O dito certificado haberá de ter unha antigüidade máxima de 3 meses respecto da data de realización da proba.

6.º A realización das probas estará coordinada por unha comisión provincial composta por dous representantes da Consellería do Medio Rural e do Mar e un representante das organizacións sindicais. Así mesmo, poderase nomear persoal colaborador das comisións.

Santiago de Compostela, 3 de abril de 2012.

Francisco José Vidal-Pardo Pardo
Secretario xeral técnico da Consellería do Medio Rural e do Mar