Dentro do programa de actividades que a Academia Galega de Seguridade Pública ten previsto realizar no ano 2013, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase o desenvolvemento dun curso de capacitación para a escala executiva, na categoría de inspector principal dos corpos de policía local, segundo o previsto nos artigos 32.4 e 45 da Lei 4/2007, do 20 de abril, de coordinación das policías locais, e nos artigos 38 e 39 do Decreto 243/2008, do 16 de outubro, que deberá desenvolverse conforme as seguintes bases:
Obxectivos.
Mellorar o compromiso profesional de servizo público aos cidadáns, baixo parámetros actitudinais de eficacia e de ética policial.
Facilitarlles aos alumnos unha actualización xurídico-normativa e de operativa profesional que lles permita un mellor exercicio da súa función.
Dotalos das ferramentas de coñecemento necesarias para a xestión directiva e para a organización e estruturación adecuada dos recursos humanos e dos medios materiais de que dispoñan.
Destinatarios/as.
Persoal dos corpos de policía local que superaron o proceso selectivo para a categoría de inspector principal e que non realizasen este curso.
Inscrición.
A inscrición dos participantes será totalmente gratuíta.
Prazas.
Sen límite.
Solicitudes.
1. Os concellos deberán remitir un escrito á Academia Galega de Seguridade Pública en que soliciten a participación no curso da/s persoa/s que se atopen nesta situación, para efectuar a correspondente reserva de praza para a realización do dito curso.
2. O prazo para a remisión de escritos rematará o día 17 de abril de 2013.
3. Os escritos deberán enviarse á Academia Galega de Seguridade Pública, sita na avenida da Cultura, s/n, 36680 A Estrada. Remitiranse previamente por fax, ao número 886 20 61 22, para axilizar os correspondentes trámites.
Duración e contido.
O curso terá unha duración de 250 horas lectivas e desenvolverase de modo semipresencial. Parte presencial na Agasp, do 22 de abril ao 24 de maio de 2013 (200 horas) e parte en liña, do 27 de maio ao 21 de xuño (50 horas).
O deseño deste curso inclúe as seguintes áreas e módulos:
– Módulo I: módulo operativo.
– Módulo II: módulo xurídico.
– Módulo III: módulo técnico.
– Módulo IV: módulo administrativo.
– Módulo V: módulo xestión directiva.
– Módulo VI: estratexia e técnicas de mando.
– Módulo VII: módulo práctico.
Datas.
A data definitiva de comezo do curso será o día 22 de abril de 2013, ás 9.00 horas.
Desenvolvemento do curso.
Os alumnos da Academia Galega de Seguridade Pública, durante o seu período de permanencia nesta, rexeranse polo seu regulamento de réxime interior, publicado por Orde do 4 de febreiro de 2009, da Consellería de Presidencia, Administracións Públicas e Xustiza, no DOG número 30, do 12 de febreiro.
Certificado.
Para obter o correspondente diploma será requisito indispensable superar todas as materias que figuren no programa. Unha vez superado este curso, a Agasp emitirá un informe no cal certifique a dita superación, de modo que o concello de pertenza poida proceder ao nomeamento como persoal funcionario de carreira e á toma de posesión como inspector do corpo de policía local.
Modificacións.
A Academia Galega de Seguridade Pública poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 12 de marzo de 2013
Santiago Villanueva Álvarez
Director xeral da Academia Galega de Seguridade Pública
