Dentro do plan de actividades da Escola Galega de Administración Pública para o ano 2013 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase o Curso monográfico sobre publicidade institucional conforme as seguintes bases:
1. Obxectivos.
O presente curso monográfico ten como finalidade formar os empregados públicos sobre a publicidade institucional, concretamente, a publicidade que realizan os diferentes entes (autonómicos e locais) no ámbito da Comunidade Autónoma de Galicia.
2. Contidos.
Serán tratados, entre outros, os seguintes temas:
– A comunicación e a publicidade na Administración.
– A publicidade institucional e figuras afíns.
– Os principios reitores da publicidade institucional.
– A publicidade institucional na xurisprudencia.
– A publicidade institucional e os suxeitos publicitarios.
– As disposicións xerais da Lei de publicidade institucional.
– O control da publicidade institucional.
– As leis autonómicas sobre publicidade institucional.
– A contratación administrativa da publicidade institucional.
– O contrato de creación publicitaria.
– O contrato de difusión publicitaria.
3. Destinatarios.
Empregados públicos ao servizo das administracións públicas galegas, directivos e axentes de publicidade, directivos de medios de comunicación, representantes de axencias e medios, profesores universitarios, profesionais, estudantes de publicidade, universitarios e interesados en xeral.
4. Desenvolvemento.
Lugar: Escola Galega de Administración Pública (EGAP), rúa Madrid, 2-4, As Fontiñas, Santiago de Compostela.
Datas: 14, 15, 21 e 22 de outubro de 2013.
Horario: das 16.15 ás 20.00 horas.
Duración: 15 horas lectivas.
5. Número de prazas.
O limitado pola capacidade do local.
6. Solicitudes.
As solicitudes irán dirixidas á directora da Escola Galega de Administración Pública (As Fontiñas, rúa Madrid, 2-4, 15707 Santiago de Compostela), segundo o modelo que figura como anexo a esta convocatoria, e serán presentadas no Rexistro Xeral da EGAP, ou ben de calquera das formas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es
As persoas solicitantes poderán obter a confirmación da súa admisión chamando por teléfono, das 8.30 ás 14.30 horas, aos seguintes números: 981 54 62 41-881 99 70 14.
7. Prazo.
O prazo de presentación de solicitudes finalizará o venres 11 de outubro de 2013.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento deste curso, así como a de cancelalo se o escaso número de solicitudes non xustifica a súa realización.
9. Certificado de aproveitamento.
Ao final do curso, entregaráselles un certificado de aproveitamento a aquelas persoas inscritas que participasen asiduamente, e sempre que a súa asistencia sexa igual ou superior ao 90 % das horas lectivas programadas. Neste documento aparecerán de forma expresa o contido, a data e o lugar de realización deste curso.
Santiago de Compostela, 16 de setembro de 2013
Sonia Rodríguez-Campos González
Directora da Escola Galega de Administración Pública
