Por resolución da Axencia Galega de Infraestruturas do 16 de outubro de 2013 aprobouse provisionalmente o estudo informativo e estudo de impacto ambiental da obra de variante da estrada AC-550 no núcleo de Portosín. Clave AC/12/060.01.
Con esta actuación preténdense estudar as alternativas posibles que permitan mellorar as comunicacións na comarca de Noia, polo suroeste, no concello de Porto do Son, permitindo así a conexión e continuidade coa vía de alta prestación da variante de Noia e esta, pola súa vez, co corredor Brión-Noia.
Na actualidade, a rede viaria que comunica os núcleos da serra da Barbanza pola ría de Noia apóiase na estrada AC-550, pertencente á rede primaria básica da Comunidade Autónoma de Galicia; a dita estrada está formada por diversas travesías de poboación desde Taramancos ata Porto do Son, cun importante volume de tráfico local de longo percorrido.
É por isto que a Xunta de Galicia ten como obxectivo a construción dunha vía de novo trazado que reduza os tempos de percorrido e dea continuidade á nova variante de Noia, actualmente en execución.
Esta proposta baséase na dificultade de mellorar a capacidade da AC-550 por motivos xeométricos e de dispoñibilidade de espazo, e por iso, a solución máis axeitada co obxecto de diminuír as retencións nos centros urbanos polos que discorre a AC-550 é proxectar una vía de nova execución, que minore a duración dos traxectos, mellore o transporte de mercadorías, favoreza o desenvolvemento da zona, sirva para unha circulación máis segura e incremente a mobilidade e o nivel de servizo da actualidade.
De acordo co establecido no artigo 21.1 da Lei 8/2013, do 28 de xuño, de estradas de Galicia, o mencionado estudo informativo sométese ao trámite de información pública, durante un período de trinta días hábiles, contados a partir do seguinte ao da publicación deste anuncio no Diario Oficial de Galicia, para que as persoas que o consideren oportuno poidan formular por escrito, ante as oficinas da Axencia Galega de Infraestruturas en Santiago de Compostela, as observacións que crean convenientes, relativas á concepción global do trazado da estrada.
Así mesmo, durante este período sométese ao trámite de información pública o estudo de impacto ambiental contido no estudo informativo, segundo o Decreto 442/1990, do 13 de setembro, de avaliación de impacto ambiental para Galicia, e o Real decreto lexislativo 1/2008, do 11 de xaneiro, polo que se aproba o texto refundido da Lei de avaliación de impacto ambiental de proxectos.
A exposición ao público, para os efectos da presente resolución, realízase na Axencia Galega de Infraestruturas en Santiago de Compostela, no Servizo de Infraestruturas da Coruña e nos concellos de Noia, Porto do Son e Lousame. Así mesmo, na páxina web da Consellería de Medio Ambiente, Territorio e Infraestruturas (http://www.cmati.xunta.es/tema/c/Infraestruturas_Estradas) atópase á disposición dos interesados o documento do estudo.
Santiago de Compostela, 22 de outubro de 2013
Ethel Vázquez Mourelle
Directora da Axencia Galega de Infraestruturas