Mediante a Resolución do 23 de decembro de 2013, desta dirección referida no encabezamento, publicada no Diario Oficial de Galicia número 18, do 28 de xaneiro de 2014, acordouse a aprobación das bases reguladoras xunto coa convocatoria de subvencións, cuxo procedemento administrativo de concesión se tramitará en réxime de concorrencia competitiva, para a renovación das instalacións de iluminación pública exterior existentes (ILE) nos concellos de Galicia baseadas en tecnoloxías obsoletas por outras máis eficientes, co conseguinte aforro enerxético.

Tal e como consta na parte expositiva da citada resolución, a convocatoria de axudas tramitouse anticipadamente sobre a base do disposto no artigo 25 do Decreto 11/2009, do 8 de xaneiro, polo que se aproba o regulamento da Lei 9/2007, de subvencións de Galicia, e financiarase con cargo aos orzamentos do Instituto Enerxético de Galicia para o ano 2014, sendo a procedencia dos fondos de diversa natureza: fondos propios do Inega, fondos comunitarios derivados do programa operativo Feder-Galicia 2007-2013 e Fondos de Compensación Interterritorial (FCI) que cofinancian.

O artigo 3 das bases reguladoras relativo ao financiamento prevé unha dotación inicial de 2.966.956 euros con cargo á aplicación orzamentaria 08.A2.733A.761.0. Porén, no parágrafo segundo dese mesmo artigo establécese a posibilidade de incrementar o crédito coa condición dunha maior dispoñibilidade derivada dalgunha das circunstancias previstas no artigo 30.2 do Decreto 11/2009, logo da aprobación da modificación orzamentaria que proceda.

Unha das circunstancias que habilitan a ampliación do crédito é a recollida na letra c) do citado artigo 30.2, que remite directamente ao parágrafo 3º do artigo 25 xa comentado, en referencia á posibilidade de aumentar a contía máxima fixada na convocatoria como consecuencia de que o crédito orzamentario que resulte aprobado na Lei de orzamentos fose superior á contía estimada de inicio, podendo aplicarse o dito incremento a financiar a presente convocatoria.

Polo anteriormente exposto, esta dirección

RESOLVE:

Primeiro. Ampliar a dotación de fondos inicialmente prevista para esta convocatoria na contía de 1.625.000 euros, polo que o importe total asignado para estas axudas con cargo á aplicación orzamentaria 08.A2.733A.761.0 tras esta ampliación ascende a 4.591.956 euros, de acordo coas variacións recollidas na seguinte táboa:

Segundo. Esta ampliación, unha vez publicada no Diario Oficial de Galicia, non implicará apertura de prazo para presentar novas solicitudes nin o inicio de novo cómputo de prazo para resolver.

Santiago de Compostela, 24 de febreiro de 2014

Ángel Bernardo Tahoces
Director do Instituto Enerxético de Galicia