O Consello de Dirección do Igape, na súa xuntanza do 30 de xaneiro de 2014, acordou por unanimidade dos seus membros asistentes a aprobación das bases reguladoras do programa de apoio ao acceso ao financiamento operativo (activo corrente) das pequenas e medianas empresas, instrumentadas mediante convenio de colaboración entre o Instituto Galego de Promoción Económica (Igape), as sociedades de garantía recíproca e as entidades financeiras adheridas (Re-solve 2014). As ditas bases publicáronse mediante a Resolución do 9 de maio de 2014 (DOG nº 90, do 13 de maio).
Xunto co texto das devanditas bases publicouse a relación das entidades financeiras que se adheriron ao convenio.
Xa que con datas do 13 e 16 de maio de 2014, respectivamente, se ratificou a adhesión das entidades financeiras Banco Etcheverría, S.A. e Banco de Sabadell, S.A., cómpre facelo público.
Polo que antecede, en virtude das facultades que teño conferidas mediante o artigo 12.a) da Lei 5/1992, do 10 de xuño, de creación do Instituto Galego de Promoción Económica e do artigo 11.1.a) do Decreto 317/1992, do 12 de novembro, polo que se aproba o regulamento do Igape,
RESOLVO:
Único. Engadir as entidades financeiras Banco Etcheverría, S.A. e Banco de Sabadell, S.A., á relación de entidades financeiras adheridas ao convenio de colaboración para a habilitación dun programa de apoio ao acceso ao financiamento operativo (activo corrente) das pequenas e medianas empresas, asinado o 9 de maio de 2014.
Santiago de Compostela, 10 de xullo de 2014
Javier Aguilera Navarro
Director xeral do Instituto Galego de Promoción Económica