No Diario Oficial de Galicia núm. 39, do 26 de febreiro de 2014, publicouse a Resolución do 19 de febreiro de 2014, pola que se aproban as bases reguladoras para a concesión, en réxime de concorrencia non competitiva, de subvencións para promover o autoemprego e a actividade emprendedora na Comunidade Autónoma galega das persoas galegas retornadas e se procede á súa convocatoria para o ano 2014.
No artigo 8 da devandita resolución establécese que o prazo de presentación de solicitudes finalizará o 30 de setembro de 2014.
Pola súa parte, no artigo 16 establécese que a actividade subvencionada deberá ser xustificada antes do 30 de outubro de 2014.
Próximo a rematar o prazo de presentación de solicitudes, á vista de que aínda resta crédito nunha contía que permite atender un número superior de proxectos subvencionables, e co fin de garantir a maior eficacia posible das referidas axudas, considérase oportuno ampliar o prazo de presentación de solicitudes e, consecuentemente, o prazo de xustificación das subvencións solicitadas de acordo co novo prazo.
En consecuencia, de conformidade co disposto no artigo 49 da Lei 30/1992, do 26 de novembro, de réxime xurídico das administracións públicas e do procedemento administrativo común, e dado que non se causan prexuízos a terceiros por tratarse de subvencións en réxime de concorrencia non competitiva,
RESOLVO:
Artigo 1. Ampliación do prazo de presentación de solicitudes
Ampliar ata o 15 de novembro de 2014, inclusive, o prazo de presentación de solicitudes previsto no artigo 8 da Resolución do 19 de febreiro de 2014, pola que se aproban as bases reguladoras para a concesión, en réxime de concorrencia non competitiva, de subvencións para promover o autoemprego e a actividade emprendedora na Comunidade Autónoma galega das persoas galegas retornadas e se procede á súa convocatoria para o ano 2014.
Artigo 2. Ampliación do prazo de xustificación
Ampliar ata o 15 de decembro de 2014, inclusive, o prazo de xustificación previsto no artigo 16 da devandita resolución.
Disposición derradeira
Esta resolución entrará en vigor o día da súa publicación no Diario Oficial de Galicia.
Santiago de Compostela, 25 de agosto de 2014
Antonio Rodríguez Miranda
Secretario xeral da Emigración