A Lei orgánica 15/1999, do 13 de decembro, de protección de datos de carácter persoal (BOE núm. 298, do 14 de decembro) regula o tratamento de datos de carácter persoal rexistrados en soporte físico, que os faga susceptibles de tratamento, así como toda modalidade de uso posterior destes datos polos sectores público e privado. A finalidade desta regulación é garantir e protexer as liberdades públicas e os dereitos fundamentais das persoas físicas e, especialmente, a súa honra e intimidade persoal e familiar.
No artigo 20 da devandita lei disponse que a creación, modificación ou supresión dos ficheiros das administracións públicas só poderá facerse por medio de disposición xeral publicada no BOE ou diario oficial correspondente, e no seu punto segundo establece as indicacións concretas que deben constar nas disposicións de creación e modificación daqueles.
Polo exposto e en uso das facultades que me confiren os artigos 34.6 e 38 da Lei 1/1983, do 22 de febreiro, reguladora da Xunta e da súa Presidencia,
DISPOÑO:
Artigo 1. Obxecto
Mediante a presente orde da persoa titular de Vicepresidencia e Consellería de Presidencia, Administracións Públicas e Xustiza, créase o ficheiro de carácter persoal dependente da Escola Galega de Administración Pública que figura no anexo desta orde.
Artigo 2. Contido
A información exixida no artigo 20 da Lei orgánica 15/1999, do 13 de decembro, de protección de datos de carácter persoal, e no artigo 54 do seu regulamento asociado, o Real decreto 1720/2007, do 21 de decembro, para as disposicións de creación de ficheiros está contida no anexo desta orde.
Artigo 3. Finalidade e uso dos ficheiros
Os datos de carácter persoal, incluídos no ficheiro da Escola Galega de Administración Pública creado por esta orde, só serán utilizados para os fins expresamente previstos e declarados no anexo e polo persoal debidamente autorizado.
Artigo 4. Cesión de datos
Os datos só serán cedidos nos supostos expresamente previstos pola lei e os declarados no anexo. No suposto de cesión de datos ás administracións públicas haberá que aterse ao disposto na normativa vixente respecto a esta materia.
Artigo 5. Órgano responsable dos ficheiros
A responsabilidade sobre o ficheiro creado por esta orde correspóndelle á Escola Galega de Administración Pública, encadrada na Vicepresidencia e Consellería de Presidencia, Administracións Públicas e Xustiza.
No anexo detállase a unidade ante a que se exercerán os dereitos de acceso, rectificación, cancelación e oposición dos datos que constan nos ficheiros.
Artigo 6. Nivel de protección e medidas de seguridade
Os ficheiros creados por esta orde atópanse clasificados atendendo ao disposto no artigo 80 e seguintes do Real decreto 1720/2007, do 21 de decembro. No anexo aparece a clasificación (nivel básico, medio ou alto) dos ficheiros creados baixo esta orde.
A persoa titular do órgano responsable destes ficheiros adoptará as medidas técnicas, de xestión e organización que sexan conducentes a facer efectivas as garantías, obrigas e dereitos recoñecidos na Lei orgánica 15/1999 e nas súas normas de desenvolvemento.
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 5 de marzo de 2015
Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza
ANEXO
Ficheiros de nova creación baixo a responsabilidade da Escola
Galega de Administración Pública (EGAP)
Denominación do ficheiro |
Subvencións |
Descrición da súa finalidade e usos previstos |
Xestión das relacións administrativas coa cidadanía e organismos públicos ou privados para a concesión de axudas e subvencións |
Colectivos sobre os que se pretende obter datos ou que resulten obrigados a subministralos |
Organismos públicos ou privados |
Procedemento de recollida de datos |
Formularios en papel ou electrónicos |
Procedencia dos datos |
Organismos públicos ou privados |
Estrutura básica do ficheiro. Tipos de datos de carácter persoal (categoría de datos) |
Datos de carácter identificativo (DNI, nome e apelidos, enderezo postal e electrónico, teléfono) datos de circunstancias sociais, datos académicos e profesionais, datos de detalle de emprego, datos económicos, datos de transacción de bens e servizos |
Sistema de tratamento |
Mixto |
Comunicacións ou cesión de datos |
Outros órganos da comunidade autónoma |
Transferencias internacionais de datos a terceiros países |
Non están previstas |
Órgano responsable do ficheiro |
Escola Galega de Administración Pública (EGAP) Rúa Madrid, 2-4 15707 Santiago de Compostela |
Servizos ou unidades ante os cales poden exercer os dereitos de acceso, rectificación, cancelación e oposición |
Escola Galega de Administración Pública (EGAP) |
Nivel do ficheiro |
Nivel básico |