Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 98 Mércores, 27 de maio de 2015 Páx. 20720

III. Outras disposicións

Escola Galega de Administración Pública

RESOLUCIÓN do 15 de maio de 2015 pola que se convoca unha xornada sobre sustentabilidade financeira e reforma das entidades locais.

Dentro do plan de actividades da Escola Galega de Administración Pública para o ano 2015 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, convócase unha xornada sobre sustentabilidade financeira e reforma das entidades locais, conforme as seguintes bases:

1. Obxectivos.

O obxectivo principal desta xornada é formular posibles liñas de reforma das entidades locais, desde unha perspectiva financeira.

2. Contidos.

Serán tratados, entre outros, os seguintes temas:

– Sustentabilidade financeira e Administración local, en especial o problema da planta local.

– Situación financeira e proxectos de reforma das entidades locais.

– Marco constitucional do control financeiro sobre as entidades locais.

– Estado e comunidades autónomas ante a Administración local: desenvolvemento autonómico da Lei 27/2013, do 27 de decembro, de racionalización e sustentabilidade da Administración local.

– Situación financeira e proxectos de reforma local en Alemaña.

3. Destinatarios.

Empregados das administracións públicas de Galicia, tanto autonómica coma local e de xustiza, das universidades do Sistema universitario de Galicia, persoal das entidades do sector público, xuristas, profesionais e interesados en xeral.

4. Desenvolvemento.

Lugar: EGAP, rúa Madrid, 2-4, Santiago de Compostela.

Data: 11 de xuño de 2015.

Horario: mañá e tarde.

Duración: 7 horas lectivas.

5. Número de prazas.

Limitado pola capacidade do local.

6. Inscrición.

As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/

O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o día 9 de xuño de 2015.

Poderá obterse calquera outra información, das 8.30 ás 14.30 horas, nos teléfonos:

981 54 62 41 / 981 54 62 39

7. Modificacións.

A EGAP reserva para si a facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustifica a súa realización.

8. Certificado de asistencia oficial.

Ao final da xornada entregarase un certificado de asistencia a aquelas persoas inscritas que tivesen participado asiduamente e sempre que a súa asistencia fose igual ou superior ao 90 % das horas lectivas programadas; para estes efectos, todos os alumnos deberán identificarse nos preceptivos controis de asistencia. Neste documento aparecerán, de forma expresa, o contido, a carga lectiva, a data, o lugar de realización e o selo oficial da institución.

Santiago de Compostela, 15 de maio de 2015

Sonia Rodríguez-Campos González
Directora da Escola Galega de Administración Pública