Para os efectos previstos no artigo 73 da Lei 34/1998, do 7 de outubro, do sector de hidrocarburos, no artigo 78 do Real decreto 1434/2002, do 27 de decembro, polo que se regulan as actividades de transporte, distribución, comercialización, subministración e procedementos de autorización de instalacións de gas natural, e no artigo 1 do Decreto 62/2010, do 15 de abril, polo que se regula o trámite de competencia e os criterios de valoración no suposto de concorrencia de dúas ou máis solicitudes de autorización administrativa de instalacións de transporte secundario e distribución de gas natural e redes de distribución de gases licuados do petróleo (GLP), sométese ao trámite de información pública a solicitude de autorización administrativa e aprobación do proxecto de execución da infraestrutura gasista consistente nunha estación de regulación e medida (ERM) MOP 16/4 e na extensión de rede en MOP 4 bar para subministración de gas natural a Cervo (Lugo), que promove a empresa Gas Galicia SDG, S.A.
Peticionario:
Gas Galicia SDG, S.A., con CIF nº A15383284 e con enderezo para os efectos de notificación na rúa Lisboa, s/n, Edificio Área Central, local 31-HIJ, 15707 Santiago de Compostela (A Coruña).
Antecedentes:
O 4.3.2008 a Dirección Xeral de Industria, Enerxía e Minas ditou resolución pola que se outorgou a Gas Galicia SDG, S.A. a autorización administrativa para a distribución de gas natural canalizado no termo municipal de Cervo (Lugo), que se publicou no Diario Oficial de Galicia (7.4.2008) e no Boletín Oficial da provincia (2.4.2008).
O 11.9.2009 a Dirección Xeral de Industria, Enerxía e Minas ditou resolución pola que se aprobou o proxecto de execución de instalacións da rede de distribución de gas natural en Cervo, promovido por Gas Galicia SDG, S.A. Segundo consta neste proxecto de execución, a subministración de gas natural realizarase desde unha planta de gas natural licuado (GNL) que se situará no parque empresarial de Cuíña (no concello de San Cibrao), desde a cal partirá a rede de distribución cara ao núcleo urbano de Cervo, cunha lonxitude de 8.416 m.
O 14.9.2009 a Dirección Xeral de Industria, Enerxía e Minas ditou resolución pola que se outorgou a Gas Galicia SDG, S.A. a autorización administrativa e se aprobou o proxecto de execución da planta satélite de GNL para subministración á rede de distribución de gas natural do termo municipal de Cervo (Lugo), que se publicou no Diario Oficial de Galicia (16.10.2009) e no Boletín Oficial da provincia (10.10.2009).
O 7.9.2010 a Dirección Xeral de Industria, Enerxía e Minas ditou resolución pola que se outorgou a Gas Galicia SDG, S.A. a autorización administrativa e se aprobou a addenda I ao proxecto de execución de instalacións da rede de distribución de gas natural en Cervo, que se publicou no Diario Oficial de Galicia (18.10.2010) e no Boletín Oficial da provincia (8.10.2010). Segundo consta nesta addenda I, a rede de distribución no núcleo urbano de Cervo ampliarase en 2.470 m.
O 7.5.2012 a Dirección Xeral de Industria, Enerxía e Minas ditou resolución pola que se aprobou a addenda II ao proxecto de execución de instalacións da rede de distribución de gas natural en Cervo. Segundo consta nesta addenda II, a rede de distribución no núcleo urbano de Cervo ampliarase en 283 m.
Obxecto da petición:
O 12.6.2015 a empresa Gas Galicia SDG, S.A. presentou a solicitude de autorización administrativa e aprobación do proxecto de execución da infraestrutura gasista, cuxo proxecto leva por título «Estación de regulación e medida (ERM) MOP 16/4 e extensión de rede en MOP 14 bar para subministración de gas natural a Cervo (Lugo)».
Con esta infraestrutura gasista, a subministración de gas natural á rede de distribución do núcleo urbano de Cervo, inicialmente proxectada desde unha planta satélite de GNL, pasará a realizarse desde o gasoduto de transporte básico da Mariña lucense.
Descrición das instalacións:
O proxecto «Estación de regulación e medida (ERM) MOP 16/4 e extensión de rede en MOP 14 bar para subministración de gas natural a Cervo (Lugo)» prevé a instalación dunha estación de regulación e medida (ERM) para a subministración de gas natural á rede de distribución de Cervo e a extensión de rede necesaria para levar o gas desde esta ERM ata o futuro punto de conexión coa rede existente no núcleo urbano.
As instalacións de gas obxecto deste proxecto resúmense nun total de 396 m de tubaxe de polietileno e aceiro de diferentes diámetros e o seu alcance resúmese nos seguintes puntos:
– Instalación dunha ERM MOP 16/4 bar Q 2500 D, que se instalará no interior da posición 06 do gasoduto de transporte básico da Mariña lucense.
– Execución dunha extensión de rede en MOP 4 bar, dende a saída da ERM ata o punto de conexión coa rede de distribución existente en Cervo, na estrada da Deputación LU-P1510 no seu p.q. 1+200.
– Instalación de válvulas de corte para a regulación e control do fluxo de gas á entrada e saída da ERM.
Termo municipal afectado:
A solicitude afecta o termo municipal de Cervo, na provincia de Lugo.
Orzamento:
O orzamento das instalacións ascende á cantidade de cincuenta e seis mil cento corenta e sete euros con oitenta e dous céntimos (56.147,82 €).
O que se fai público para coñecemento xeral e para que todas aquelas persoas, naturais ou xurídicas, que se consideren prexudicadas nos seus dereitos poidan presentar as súas alegacións, no prazo de 20 días a partir da data de publicación deste anuncio, podendo examinar o correspondente proxecto na Dirección Xeral de Enerxía e Minas, Edificio Administrativo San Caetano, bloque 5, 4º andar, 15781 Santiago de Compostela, así como na Xefatura Territorial de Lugo da Consellería de Economía e Industria, rolda da Muralla, 70, 27021 Lugo.
Santiago de Compostela, 14 de xullo de 2015
Ángel Bernardo Tahoces
Director xeral de Enerxía e Minas