Dentro do plan de actividades da Escola Galega de Administración Pública para o ano 2015 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, a EGAP, en colaboración coa Dirección Xeral de Relacións Exteriores e coa UE, convoca unha xornada sobre elixibilidade, simplificación e avaliación dos fondos estruturais e de investimento europeos 2014-2020, conforme as seguintes bases:
1. Obxectivos.
Dentro do ámbito de xestión dos fondos estruturais e de inversión europeos para o período 2014-2020, proponse esta acción formativa cuxo obxecto principal é tratar de facilitar aos xestores públicos dos fondos europeos as claves necesarias para unha boa xestión e execución destes.
2. Contidos.
Serán tratados, entre outros, os seguintes temas:
– Novas regras de elixibilidade dos fondos estruturais e de investimento europeos.
– Custos simplificados.
– Marco de rendemento e reserva de eficacia.
– Aspectos prácticos da avaliación dun proxecto.
3. Destinatarios.
Xestores de fondos europeos ao servizo da Administración da Xunta de Galicia, de entidades dependentes desta e persoal ao servizo das entidades locais galegas.
4. Desenvolvemento.
Lugar: Santiago de Compostela. Salón de actos da Escola Galega de Administración Pública (rúa Madrid, 2-4).
Data: 14 de decembro.
Horario: mañá e tarde, das 9.30 ás 13.45 e das 16.00 ás 18.00 horas.
Duración: 6 horas lectivas.
5. Número de prazas.
75 prazas.
6. Inscrición.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/.
A orde de admisión virá determinada pola data de presentación das solicitudes.
O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o 11 de decembro de 2015.
Poderá obterse calquera outra información, desde as 8.30 ata as 14.30 horas, nos teléfonos: 981 54 62 41-981 54 62 39.
7. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento deste curso, así como a facultade de cancelalo se o escaso número de solicitudes non xustifica a súa realización.
8. Certificado de asistencia oficial.
Ao final do curso entregarase un certificado de asistencia a aquelas persoas inscritas que participasen asiduamente e sempre que a súa asistencia fose igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización do curso e o selo oficial da institución.
Santiago de Compostela, 17 de novembro de 2015
Sonia Rodríguez-Campos González
Directora da Escola Galega de Administración Pública