A teor do previsto no artigo 9.4 da Lei 8/2013, do 28 de xuño, de estradas de Galicia, os cambios de titularidade das estradas ou treitos delas, cando non se trate de travesías urbanas ou treitos delas que estean incluídos no inventario de travesías da súa administración titular, deberán ser aprobados por decreto da Xunta de Galicia, por proposta da consellaría competente en materia de estradas e logo do acordo entre as administracións afectadas.

Por outra parte, a citada Lei de estradas dispón no artigo 9.7 que os cambios de titularidade poderán abranguer estradas, treitos delas, elementos funcionais e/ou espazos da zona de dominio público adxacente.

O Concello de Malpica de Bergantiños solicitou á Consellería de Infraestruturas e Vivenda o cambio de titularidade de treitos de estradas autonómicas ao seu paso polo termo municipal.

A Axencia Galega de Infraestruturas, de acordo co informe emitido polos servizos competentes, formulou a proposta favorable á transferencia de titularidade de varios treitos de estradas da Rede Autonómica de Galicia a prol do Concello de Malpica de Bergantiños.

De conformidade co anteriormente exposto, por proposta da conselleira de Infraestruturas e Vivenda, logo de deliberación do Consello da Xunta de Galicia, na súa reunión do día trinta de xuño de dou mil dezaseis,

DISPOÑO:

Artigo 1

Apróbase o cambio de titularidade a prol do Concello de Malpica de Bergantiños de:

– Estrada AC-414:

• pp.qq. do 7+180 ao 9+190, lonxitude 2,01 km.

• pp.qq. do 11+220 ao 12+390, lonxitude 1,17 km.

• pp.qq. do 13+490 ao 14+730, lonxitude 1,24 km.

– Treito da estrada AC-422. pp.qq. 0+000 ao 0+840, lonxitude 0,84 km.

– Resto antigo situado entre o p.q. 1+610 da AC-422 e o p.q. 1+930 da AC-419, lonxitude 0,50 km.

– Elementos auxiliares da estrada AC-418 situados entre os pp.qq. 15+120 e 16+350 (zona delimitada entre a liña exterior de delimitación da calzada e o límite do dominio público).

Artigo 2

En aplicación dos puntos 4 e 6 do artigo 10 da Lei 8/2013, do 28 de xuño, de estradas de Galicia, o Concello de Malpica de Bergantiños deberá modificar o seu catálogo de estradas para incluír o cambio de titularidade ao que se refire o presente decreto.

Artigo 3

De acordo co establecido no artigo 9.6 da Lei 8/2013, do 28 de xuño, de estradas de Galicia, o cambio de titularidade será efectivo ao día seguinte da publicación deste decreto no Diario Oficial de Galicia. A entrega dos bens formalizarase no prazo dos dous meses seguintes a esta publicación mediante a sinatura da correspondente acta de entrega.

Artigo 4

Corresponderanlle ao Concello de Malpica de Bergantiños, a partir da formalización da entrega, todas as actividades de xestión, mantemento, conservación e explotación das vías, así como o exercicio das funcións de disciplina viaria e calquera outra que puidese corresponderlle como nova Administración titular das estradas.

Disposición derradeira

O presente decreto producirá efectos desde o día seguinte á súa publicación no Diario Oficial de Galicia.

Santiago de Compostela, trinta de xuño de dous mil dezaseis

Alberto Núñez Feijóo
Presidente

Ethel Mª Vázquez Mourelle
Conselleira de Infraestruturas e Vivenda