De acordo co artigo 29 da Lei 3/2014, do 24 de abril, do Consello Consultivo de Galicia, e cos artigos 52 e 53 do seu Regulamento de organización e funcionamento, aprobado polo Decreto 91/2015, do 18 de xuño; e de conformidade co establecido nos artigos 92 da Lei 2/2015, do 29 de abril, do emprego público de Galicia, e no Decreto 93/1991, do 20 de marzo, polo que se aproba o Regulamento de provisión de postos de traballo, promoción profesional e promoción interna, este consello

DISPÓN:

Primeiro. Anunciar a convocatoria para a provisión, polo sistema de libre designación, do posto de traballo que se detalla no anexo I desta resolución.

Segundo. Poderá concorrer a ela o persoal funcionario que reúna as condicións que para o posto de traballo se sinalan.

Terceiro. As solicitudes para participar nesta convocatoria presentaranse no Rexistro Xeral do Consello Consultivo de Galicia (rúa Algalia de Abaixo, 24, 2º andar, Santiago de Compostela) ou nas oficinas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común, no prazo de quince (15) días contados a partir do día seguinte ao da publicación da convocatoria no Diario Oficial de Galicia, conforme o modelo que se inclúe como anexo II.

Cuarto. Os/as aspirantes deberán achegar coa petición un curriculum vitae e xustificar mediante certificación ou copia compulsada dos documentos acreditativos os méritos que aleguen.

Os méritos alegados e non probados segundo se indica no parágrafo anterior non se terán en conta.

Quinto. No caso de que resulte seleccionado/a para ocupar o posto de traballo que se anuncia no anexo I desta resolución un/unha funcionario/a con destino noutras administracións públicas distinta da Administración xeral da Comunidade Autónoma de Galicia, tramitarase o seu traslado a esta comunidade autónoma conforme o artigo 67 do Real decreto 364/1995, do 10 de marzo, e demais disposicións concordantes.

Sexto. Esta convocatoria será resolta polo Consello Consultivo de Galicia.

Sétimo. A resolución desta convocatoria farase pública no Diario Oficial de Galicia e poderá, de considerarse oportuno, declararse deserta.

Oitavo. O prazo de toma de posesión será de tres días hábiles se non implica cambio de residencia, de sete días hábiles se comporta cambio de residencia, ou de vinte días hábiles se comporta o reingreso ao servizo activo, conforme o establecido no artigo 14 do Decreto 93/1991, do 20 de marzo, modificado polo Decreto 166/2013, do 14 de novembro.

O prazo de toma de posesión empezará a contarse a partir do día seguinte ao do cesamento, que deberá producirse dentro dos tres días seguintes ao da publicación da resolución no Diario Oficial de Galicia, ou desde a data en que se comunique a resolución do traslado á Comunidade Autónoma, para o caso de funcionarios/as doutras administracións públicas.

Se a resolución comporta o reingreso ao servizo activo, o prazo de toma de posesión empezará a contarse a partir do día seguinte ao da publicación da resolución no Diario Oficial de Galicia.

Noveno. Contra esta resolución, que esgota a vía administrativa, os/as interesados poderán interpoñer recurso potestativo de reposición perante o Consello Consultivo de Galicia, no prazo dun mes contado a partir do día seguinte ao da súa publicación no Diario Oficial de Galicia, de conformidade co disposto no artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, ou directamente recurso contencioso-administrativo no prazo de dous meses desde a mesma data, perante o xulgado do contencioso-administrativo competente, segundo o establecido nos artigos 8 e 14 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 29 de agosto de 2016

Jose Luis Costa Pillado
Presidente do Consello Consultivo de Galicia

ANEXO I

Denominación: secretario/a do/a conselleiro/a.

Código do posto: CCG 040.

Nivel: 20.

Complemento específico: 6.144,36 €.

Subgrupo: C1/C2.

Corpo ou escala: xeral.

Tipo de adscrición: A11.

Formación específica: 020/640.

Centro directivo ou dependencia: Consello Consultivo de Galicia.

Localidade: Santiago de Compostela.

A11: adscrición indistinta a persoal funcionario da Xunta de Galicia, doutras comunidades autónomas e do Estado.

020: coñecemento de informática nivel usuario (mérito).

640: para persoal doutra Administración, curso de perfeccionamento de galego (requisito imprescindible).