Primeiro. O artigo 91 da Lei 3/2012, do 2 de abril, do deporte de Galicia, configura o Comité Galego de Xustiza Deportiva como o órgano administrativo superior da xurisdición deportiva no ámbito territorial da Comunidade Autónoma de Galicia. Está adscrito ao órgano da Administración autonómica competente en materia de deporte e actúa con independencia funcional deste e da Administración xeral da Comunidade Autónoma.

Segundo. A composición do Comité Galego de Xustiza Deportiva atópase regulada tanto no artigo 92 da Lei 3/2012, do 2 de abril, do deporte de Galicia, como no artigo 4 do Decreto 120/2013, do 24 de xullo, polo que se aproba o Regulamento do Comité Galego de Xustiza Deportiva. De conformidade con estes preceptos, o Comité Galego de Xustiza Deportiva está integrado por unha presidenta ou por un presidente e catro vogais, todos eles licenciados/as en Dereito. Designaranse, igualmente, dous suplentes para os supostos de vacantes, enfermidade ou ausencia dos membros titulares ou por calquera outra causa legal.

Terceiro. A competencia para o nomeamento dos membros do Comité Galego de Xustiza Deportiva, titulares e suplentes, correspóndelle ao órgano da Administración autonómica competente en materia deportiva.

Cuarto. A duración do mandato dos integrantes do Comité Galego de Xustiza Deportiva será de catro anos. Mediante Resolución do 4 de xullo de 2012, da Secretaría Xeral para o Deporte (DOG núm.132, do 11 de xullo) procedeuse a nomear os membros titulares e suplentes do Comité Galego de Xustiza Deportiva.

Deste xeito, expirado o prazo do seu mandato, faise necesario ditar a presente resolución para proceder á renovación do nomeamento dos membros do Comité Galego de Xustiza Deportiva.

Por todo o exposto, e en uso das competencias atribuídas polo Decreto 88/2013, do 30 de maio, de estrutura orgánica dos órganos superiores e de dirección dependentes da Presidencia da Xunta de Galicia, modificado polo Decreto 66/2015, do 16 de abril,

RESOLVO:

Primeiro. Nomear como membros titulares do Comité Galego de Xustiza Deportiva a:

Miguel Juane Sánchez

Cristina Pedrosa Leis

Mª Dolores Rodríguez Rodríguez

Ángel Luís Rebolledo Varela

Rafael Tena Núñez

Segundo. Nomear como membros suplentes do Comité Galego de Xustiza Deportiva a:

Carlos Bueno Rey

Marta Gándara Moure

Terceiro. Ordenar a publicación desta resolución no Diario Oficial de Galicia.

Contra esta resolución poderase interpoñer potestativamente recurso de reposición no prazo dun mes ou ben directamente recurso contencioso-administrativo ante o Tribunal Superior de Xustiza de Galicia no prazo de dous meses contados desde o día seguinte ao da súa publicación, de conformidade co establecido no artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 31 de agosto de 2016

José Ramón Lete Lasa
Secretario xeral para o Deporte