BDNS (Identif.): 329619.
De conformidade co previsto nos artigos 17.3.b) y 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo pode consultarse na Base de datos nacional de subvencións:
(http://www.pap.minhap.gob.es/bdnstrans/index).
Primeiro. Beneficiarios
Poderán ser beneficiarios das subvencións as organizacións de produtores pesqueiros e as asociacións de organizacións de produtores do ámbito da Comunidade Autónoma de Galicia, inscritas no Rexistro de Organizacións de Produtores Pesqueiros e Asociacións de Organizacións de Produtores Pesqueiros, establecido no artigo 6 do Real decreto 277/2016, do 24 de xuño.
Segundo. Finalidade
Esta orde ten por obxecto establecer as bases reguladoras para a concesión, en réxime de concorrencia competitiva, de axudas destinadas á preparación e aplicación dos plans de produción e comercialización das organizacións de produtores pesqueiros e das asociacións de organizacións de produtores pesqueiros no ámbito autonómico galego, segundo establece a sección IV do capítulo II do Regulamento (UE) núm. 1379/2013 do Parlamento Europeo e do Consello, do 11 de decembro.
Por outra banda, tamén é obxecto desta orde convocar as axudas para o ano 2017 dos plans de produción e comercialización correspondentes ao ano 2016.
Terceiro. Bases reguladoras
Orde do 31 de decembro de 2016 pola que se establecen as bases reguladoras xerais e a convocatoria, tramitadas como expediente anticipado de gasto, para o ano 2017, para a concesión de subvencións, en réxime de concorrencia competitiva, a organizacións de produtores pesqueiros e de asociacións de organizacións de produtores pesqueiros do sector dos produtos da pesca e da acuicultura no ámbito exclusivo da Comunidade Autónoma de Galicia, para a preparación e aplicación dos plans de produción e comercialización, cofinanciadas co Fondo Europeo Marítimo e de Pesca (FEMP).
Cuarto. Importe
Para o ano 2017 as axudas concederanse con cargo á aplicación orzamentaria 14.02.723B.780.1 (proxecto 2016 00326) (plans de produción e comercialización) que figura dotada no proxecto de orzamento de gastos da Consellería do Mar para o ano 2017, cun importe total máximo das subvencións que se concedan no dito exercicio orzamentario de 572.863 euros.
Quinto. Prazo de presentación de solicitudes
Un mes contado a partir do día seguinte á publicación desta orde no Diario Oficial de Galicia.
Entenderase como último día do prazo o correspondente ao mesmo ordinal do día da publicación. Se o último día de prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicial do cómputo, entenderase que o prazo expira o último do mes.
Santiago de Compostela, 31 de decembro de 2016
Mª Isabel Concheiro Rodríguez-Segade
Secretaria xeral técnica da Consellería do Mar