O director da Axencia de Protección da Legalidade Urbanística ditou, o 24 de xaneiro de 2017, resolución pola que se impón unha terceira multa coercitiva, derivada do expediente de reposición da legalidade urbanística IU1/96/2011 como consecuencia de incumprir o ordenado na Resolución do 26 de novembro de 2012, na cal se ordena a demolición dunha nave industrial e o cesamento inmediato e definitivo da actividade de explotación de canteira e de acumulación de materiais, realizadas sen autorización autonómica, no lugar de Ballote de Abaixo, parroquia de Herbón, no concello de Padrón, por resultar incompatibles co ordenamento urbanístico vixente.

Ao non se poder realizar a notificación persoal da resolución a Materiales de Construcción O Pedrón, S.L., mediante esta cédula, e ao abeiro do disposto no artigo 44 da Lei 39/2015, do 1 de outubro, do procedemento administrativo común das administracións públicas, notifícaselle a interesada a dita resolución por medio dun anuncio no Boletín Oficial do Estado e a súa data de publicación é a que determina a eficacia do acto notificado.

Tendo en conta que, en atención ao previsto no artigo 46 da Lei 39/2015, do 1 de outubro, do procedemento administrativo común das administracións públicas, o acto non se publica na súa integridade, comunícaselle á interesada que o texto íntegro da resolución que se notifica está ao seu dispor nas dependencias da Axencia de Protección da Legalidade Urbanística, sita no Edificio Witland-Salgueiriños, en Santiago de Compostela, para a súa consulta no prazo de 10 días hábiles, que se contarán desde o día seguinte ao da publicación desta cédula. Transcorrido o devandito prazo a notificación entenderase producida.

Contra esta resolución, que pon fin á vía administrativa, a interesada pode interpoñer recurso de reposición no prazo dun mes, contado a partir do día seguinte a aquel en que se produza a notificación, ante o director da Axencia de Protección da Legalidade Urbanística, ou ben, se non exerce o seu dereito a presentar recurso potestativo de reposición, pode interpoñer directamente recurso contencioso-administrativo, no prazo de dous meses, ante o xulgado do contencioso-administrativo en cuxa circunscrición se sitúe o inmoble afectado, conforme o disposto no artigo 14.1, regra terceira da Lei 29/1998, reguladora da xurisdición contencioso-administrativa.

Para que conste, e lle sirva de notificación á citada interesada en cumprimento do disposto no artigo 44 da Lei 39/2015, do 1 de outubro, do procedemento administrativo común das administracións públicas, expido e asino esta cédula.

Santiago de Compostela, 15 de febreiro de 2017

José Antonio Cerdeira Pérez
Director da Axencia de Protección da Legalidade Urbanística