O Pleno da Corporación, na sesión ordinaria que tivo lugar o día 16 de marzo de 2017, adoptou entre outros, o seguinte acordo:

– Aprobar definitivamente o estudo de detalle nas parcelas EU-7, EU-2 e grupo de vivendas de San Ignacio de Loyola (SUP-5 Choupana-Campus Sur), coas seguintes condicións:

1. No ámbito delimitado como fase 1, que se corresponde co do equipamento universitario EU-7, rúa Eira da Palleira e zona verde lindante -terreos todos eles incluídos no ámbito do Plan parcial do SUP-5-, as determinacións do estudo de detalle aplicaranse directamente, a partires da súa aprobación definitiva e entrada en vigor.

2. No ámbito delimitado como fase 2 -que se corresponde co equipamento universitario EU-2 e grupo de vivendas de San Ignacio de Loyola-, a ordenación pormenorizada que se establece no estudo de detalle queda condicionada ao que resulte da aprobación definitiva da modificación puntual do Plan xeral e do Plan especial do Campus Universitario no ámbito da reserva de equipamento universitario EU-2, actualmente en trámite.

O presente acordo de aprobación definitiva notificarase persoalmente aos interesados e publicarase no Diario Oficial de Galicia. Unha vez publicado o acordo, remitirase á Consellería de Medio Ambiente e Ordenación do Territorio a documentación exixida polo artigo 88.3 da LSG, para os efectos de inscribir o estudo de detalle no Rexistro de Planeamento Urbanístico de Galicia.

Logo de que conste a inscrición no Rexistro, procederase a publicar a normativa no Boletín Oficial da provincia.

Contra o acordo da aprobación definitiva do citado estudo de detalle, poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ao da publicación deste anuncio.

Santiago de Compostela, 22 de marzo de 2017

O alcalde
P.D. (Decreto 3997/2015, do 16 de xuño)
Jorge Duarte Vázquez
Concelleiro delegado de Espazos Cidadáns, Dereito á Vivenda e Mobilidade