Mediante decreto do presidente do 11 de maio de 2017, a Deputación Provincial de Ourense levou a cabo a aprobación da convocatoria para a cobertura polo sistema de libre designación do posto de tesoureiro/a, reservado a funcionarios/as de Administración local con habilitación de carácter nacional, así como as súas bases. Tras a tramitación do oportuno expediente ao abeiro do disposto no artigo 28 do Real decreto 1732/1994, do 29 de xullo, e o artigo 37 do Decreto 49/2009, do 26 de febreiro, remitíndoas á Dirección Xeral de Administración Local para a súa publicación no DOG e posterior remisión ao Ministerio de Facenda e Función Pública para os efectos da súa publicación no BOE.
O xefe do Servizo de Réxime Xurídico e Xestión de Funcionarios con Habilitación Nacional, tendo en conta a normativa aplicable (Real decreto 1732/1994, do 29 de xullo, en virtude do mandato recollido na disposición transitoria VII da Lei 27/2013, do 27 de decembro, así como polo Decreto 49/2009, do 26 de febreiro, sobre exercicio de competencias da Comunidade Autónoma de Galicia respecto dos funcionarios/as con habilitación de carácter nacional), tras o exame da solicitude emitiu o correspondente informe proposta que conta co visto e prace da subdirectora de Réxime Xurídico Local, favorable á publicación da convocatoria solicitada.
Con base no informe proposta sinalado e tendo en conta as competencias conferidas polo artigo 15 e) da Lei 2/2015, do 29 de abril, de emprego público de Galicia, e o artigo 1.6 da Orde do 14 maio de 2013, sobre delegación de competencias (DOG núm. 92, do 15 maio)
RESOLVO:
Primeiro. Dar publicidade á convocatoria e ás bases que rexerán esta, recollidas como anexo a esta resolución, para a provisión polo sistema de libre designación, do posto de tesoureiro/a, reservado a funcionarios/as de Administración local con habilitación de carácter nacional co seguinte extracto:
Corporación: Deputación Provincial de Ourense.
Posto: tesoureiro/a.
Subescala: intervención-tesouraría.
Nivel complemento de destino: 30.
Complemento específico anual: 36.579,06 euros.
Requisitos: os recollidos nas bases que figuran como anexo.
Coñecemento lingua galega: nos termos do Decreto 103/2008, do 8 de maio.
Segundo. Publicar esta resolución no DOG e remitila á Dirección Xeral de Función Pública do Ministerio de Facenda e Función Pública para os efectos da súa publicación no BOE.
Terceiro. A presente resolución, que pon fin á vía administrativa, poderá impugnarse directamente ante a xurisdición contencioso-administrativa, no prazo de dous meses contado desde o día seguinte ao da publicación, segundo a Lei 29/1998, do 13 de xullo, reguladora da xurisdición contencioso-administrativa. Poderá tamén potestativamente interpoñerse recurso de reposición perante a Vicepresidencia e Consellería de Presidencia, Administracións Públicas e Xustiza no prazo dun mes contado desde a mesma data, nos termos artigos 123 e 124 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 14 de xullo de 2017
Marta Fernández-Tapias Núñez
Directora xeral de Administración Local
ANEXO
1ª. Obxecto.
As presentes bases teñen por obxecto rexer a convocatoria para cubrir, polo procedemento de libre designación, regulado no artigo 92 bis, número 6, da Lei 7/1985, do 2 de abril, reguladora das bases do réxime local, e nos artigos 27 e 28 do Real decreto 1732/1994, do 29 de xullo, o seguinte posto:
Denominación: tesoureiro.
Subescala: intervención-tesouraría.
2ª. Características do posto e requisitos.
a) Corporación: Deputación Provincial de Ourense.
b) Denominación e clase do posto: tesoureiro, subescala intervención-tesouraría.
c) Nivel de complemento de destino: 30.
d) Complemento específico anual: 36.579,06 euros.
e) Requisitos para o seu desempeño conforme coa relación de postos de traballo: estar integrado na subescala de intervención-tesouraría.
f) Coñecemento de lingua galega: de conformidade co disposto no Decreto 103/2008, do 8 de maio, polo que se regula o coñecemento do galego nos procedementos de provisión de postos de traballo reservados a funcionarios con habilitación de carácter estatal no ámbito territorial da Comunidade Autónoma de Galicia, os aspirantes ao posto deberán acreditar o coñecemento da lingua galega por calquera dos seguintes medios alternativos:
f.1. Estar en posesión do certificado da lingua galega 4 (Celga 4) ou do seu equivalente debidamente homologado polo órgano competente en materia de política lingüística da Xunta de Galicia.
f.2. Na falta do anterior, mediante a superación dunha proba de carácter eliminatorio, que se valorará co resultado de apto ou non apto, destinada a avaliar un grao de coñecemento do galego equivalente ao exixido para a obtención do Celga 4 ou equivalente.
g) Requisitos adicionais para optar ao posto: non estar incurso en ningún dos supostos previstos no artigo 18.3.a), b) e c) do Real decreto 1732/1994, do 29 de xullo.
3ª. Convocatoria.
A convocatoria seralle remitida pola Presidencia ao órgano competente da Xunta de Galicia para a súa publicación no Diario Oficial de Galicia e remisión ao Ministerio de Facenda e Administracións Públicas para a súa publicación no Boletín Oficial del Estado.
4ª. Solicitudes.
1. As solicitudes dirixiránselle á Presidencia, dentro dos 15 días naturais seguintes ao da publicación da convocatoria no Boletín Oficial del Estado.
2. Ademais do contido mínimo previsto no artigo 66.1 da Lei 39/2015, do procedemento administrativo común das administracións públicas, na solicitude deberá indicarse o número de rexistro persoal, a situación Administrativa na que se atope o solicitante e o seu destino.
Xunto coa solicitude, os aspirantes achegarán o seu currículo, no cal constarán os títulos académicos, os anos de servizo, os postos de traballo desempeñados na Administración, os estudos e cursos realizados, outros méritos que consideren oportuno pór de manifesto e a indicación de se posúen o certificado de coñecemento da lingua galega Celga 4 ou equivalente.
3. Non será necesario achegar a documentación acreditativa dos méritos cando se trate de documentación que xa figure en poder da Deputación Provincial ou se trate de documentos emitidos por outras administracións públicas. Nestes casos, a Deputación obterá estes documentos por medios electrónicos, a través das plataformas de intermediación de datos coas administracións competentes ou mediante outros sistemas electrónicos habilitados para o efecto, sempre que non conste a oposición expresa do interesado. Para estes efectos, teñen a consideración de documentos elaborados por outras administracións públicas, os seguintes:
a) Titulacións académicas.
b) Certificacións de cursos de formación promovidos por administracións diferentes á Deputación.
c) Certificación de servizos prestados noutras administracións públicas.
d) Certificación de coñecemento da lingua galega Celga 4 ou equivalente.
De conformidade co establecido no artigo 28.2 da Lei 39/2015, do 1 de outubro, do procedemento administrativo común das administracións públicas (en diante, LPAC), presumirase que os solicitantes autorizan a Deputación de Ourense para que esta consulte ou obteña os documentos elaborados por outras administracións públicas a que se refiren os puntos anteriores, agás que manifesten expresamente o contrario nas súas solicitudes. Neste caso, os interesados deberán achegar copia auténtica dos documentos correspondentes.
4. No caso de que o interesado pretenda achegar documentos xa entregados ante outras administracións públicas, deberá indicar na solicitude en que momento e ante que órgano administrativo presentou os ditos documentos, para os efectos de que a Deputación poida obtelos mediante consulta ás plataformas de intermediación de datos ou outros sistemas electrónicos habilitados para o efecto. Se presumirá que esta consulta é autorizada polo interesado, agás que conste no procedemento a súa oposición expresa, suposto en que a documentación deberá ser achegada polo interesado.
5. Excepcionalmente, se a Deputación non pode obter os documentos conforme o previsto nos puntos anteriores, poderá solicitar ao interesado a súa achega, outorgándolle un prazo de quince días naturais.
6. En todo caso, os datos e documentos obtidos utilizaranse exclusivamente para as finalidades deste procedemento selectivo. Os interesados poderán exercer en calquera momento os seus dereitos de acceso, rectificación, cancelación e oposición ao tratamento deste datos, conforme o establecido na lexislación de protección de datos.
5ª. Realización de probas de aptitude de lingua galega.
Unha vez concluído o prazo de presentación de solicitudes e para o suposto de que existisen aspirantes que cumprindo os requisitos xerais exixidos nestas bases non acreditasen estar en posesión do certificado Celga 4 ou equivalente, a Presidencia fixará a data, lugar e hora para a realización da proba de aptitude correspondente, o cal se lles notificará oportunamente aos interesados.
A proba terá carácter eliminatorio e valorarase co resultado de apto ou non apto. A súa avaliación corresponderalles a dous técnicos especialistas en lingua galega designados polo órgano competente en materia de política lingüística da Xunta de Galicia, cuxa identidade se lles comunicará aos interesados, e que estarán suxeitos ao deber de abstención e poderán ser obxecto de recusación nos supostos previstos nos artigos 23 e 24 da Lei 40/2015, do 1 de outubro, do réxime xurídico do sector público.
6ª. Resolución do procedemento.
1. Unha vez concluído o prazo de presentación de solicitudes e, se é o caso, realizada a proba de aptitude de lingua galega prevista na base anterior, a Presidencia procederá a ditar a resolución correspondente na forma e cos requisitos previstos no artigo 28.3 do Real decreto 1732/1994, do 29 de xullo. En todo caso, a resolución motivarase por referencia aos principios de mérito e capacidade.
2. Da resolución daráselle conta ao Pleno da Corporación e trasladaráselles ao órgano competente da Xunta de Galicia e ao Ministerio de Facenda e Función Pública, para a anotación e publicación conxunta no Boletín Oficial del Estado.
7ª. Toma de posesión.
Os prazos para a toma de posesión serán os mesmos que os establecidos para os funcionarios con habilitación de carácter nacional nomeados en virtude do procedemento de concurso.