Con data do 9 de agosto de 2017 publicase no Diario Oficial de Galicia a Orde do 21 de xullo de 2017 pola que se establecen as bases reguladoras para a concesión de subvencións aos concellos galegos, destinadas á mellora da accesibilidade nos edificios e espazos de uso público, cofinanciadas polo programa operativo do Fondo Europeo de Desenvolvemento Rexional Galicia 2014-2020, e se procede á súa convocatoria para os anos 2017 e 2018.
No artigo 6.1.b) da dita Orde do 21 de xullo de 2017 está disposto, como obriga para os solicitantes, que deben prever o inicio e o remate da execución material da actuación no prazo que determinen, incluído dentro do correspondente intervalo alternativo.
Respecto do que abrangue desde o 1 de decembro de 2017 e ata o 31 de outubro de 2018, gastos con imputación á anualidade 2018, reflíctese a limitación de que a execución material se inicie, en todo caso, antes do 31 de decembro de 2017.
Tendo en conta a data actual, considérase conveniente reaxustar o prazo de execución material das actuacións subvencionadas por parte dos concellos beneficiarios das axudas.
Por iso, e facendo uso das facultades que teño atribuídas pola Lei 1/1983, do 22 de febreiro, de normas reguladoras da Xunta e da súa Presidencia,
RESOLVO:
Artigo único. Modificación da Orde do 21 de xullo de 2017 pola que se establecen as bases reguladoras para a concesión de subvencións aos concellos galegos, destinadas á mellora da accesibilidade nos edificios e espazos de uso público, cofinanciadas polo programa operativo do Fondo Europeo de Desenvolvemento Rexional Galicia 2014-2020, e se procede á súa convocatoria para os anos 2017 e 2018
A alínea b) 2º do punto 1 do artigo 6 da Orde do 21 de xullo de 2017 pola que se establecen as bases reguladoras para a concesión de subvencións aos concellos galegos, destinadas á mellora da accesibilidade nos edificios e espazos de uso público, cofinanciadas polo programa operativo do Fondo Europeo de Desenvolvemento Rexional Galicia 2014-2020, e se procede á súa convocatoria para os anos 2017 e 2018, queda redactada como segue:
«2º. Desde o 1 de decembro de 2017 e ata o 31 de outubro de 2018: o gasto imputarase á anualidade 2018».
Disposición adicional
1. Esta modificación non afecta o prazo establecido para a presentación de solicitudes.
2. Todas as referencias contidas na orde modificada e na documentación dos solicitantes relativas ao prazo concreto de execución se entenderán realizadas ao sinalado no artigo anterior.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de decembro de 2017
José Manuel Rey Varela
Conselleiro de Política Social