O Concello de San Cibrao das Viñas solicita a aprobación definitiva da modificación referida, ao abeiro do disposto no artigo 85.7 da Lei 9/2002, do 30 de decembro, de ordenación urbanística e protección do medio rural de Galicia (LOUG), en relación coa disposición transitoria segunda da Lei 2/2016, do 10 de febreiro, do solo de Galicia.

Analizado o expediente remitido polo Concello, e vista a proposta literal que nesta mesma data eleva a Dirección Xeral de Ordenación do Territorio e Urbanismo, resulta:

I. Antecedentes.

I.1. O Concello de San Cibrao das Viñas dispón actualmente de Plan xeral de ordenación municipal (PXOM), aprobado definitivamente o 30.12.2004.

I.2. A tramitación da modificación puntual foi a seguinte:

– O 23.6.2015 a Secretaría Xeral de Calidade e Avaliación Ambiental emitiu o informe ambiental estratéxico da modificación puntual, publicado no Diario Oficial de Galicia nº 139, do 24.7.2015, acompañado dos informes emitidos no trámite de consultas.

– Constan informes xurídicos municipais, do 16.7.2015 e do 1.10.2015; e técnico, do 23.9.2015.

– Consta informe sen obxeccións, de agosto de 2015, da Subdirección Xeral de Planificación Ferroviaria.

– O 2.12.2015 a Secretaría Xeral de Ordenación do Territorio e Urbanismo emitiu informe previo á aprobación inicial da modificación puntual.

– O Pleno do Concello, en sesión do 16.12.2015, aprobou inicialmente a modificación puntual do PXOM de San Cibrao das Viñas no ámbito do polígono industrial David Ferrer Garrido e das normas urbanísticas do plan xeral e someteuna a información pública durante dous meses mediante anuncios nos diarios La Región, do 26.1.2016, con corrección de erros do 20.2.2016, e La Voz de Galicia, do 27.1.2016, con corrección de erros do 20.2.2016, e no Diario Oficial de Galicia nº 19, do 29.1.2016, con corrección de erros no Diario Oficial de Galicia nº 38, do 25.2.2016.

Durante o período de exposición pública presentáronse dez alegacións.

– Deuse audiencia aos municipios limítrofes de Barbadás, O Pereiro de Aguiar, Ourense, Paderne de Allariz, Taboadela e A Merca. O Concello de Ourense presentou unha alegación en que sinala que na modificación puntual non se tivo en conta o Plan sectorial da rede viaria de Ourense do 21.11.2014.

– Consta informe favorable, do 15.7.2016, do Servizo Municipal de Augas.

– Constan informes, do 17.2.2016 e do 22.4.2016, favorables, da Dirección Xeral de Telecomunicacións e Tecnoloxías da Información.

– Constan informes, desfavorable do 10.3.2016, e favorable do 23.8.2016, da Axencia Galega de Infraestruturas (AGI).

– Constan informes, desfavorable do 11.4.2016, e favorable, do 10.10.2016, da Confederación Hidrográfica do Miño-Sil.

– Constan informes, desfavorable do 12.9.2016, e favorable do 16.11.2016, da Deputación Provincial de Ourense.

– Constan informes, desfavorable do 31.3.2016, e favorable, do 21.2.2017, da Subdirección Xeral de Planificación Ferroviaria do Ministerio de Fomento.

– Constan informes favorables do 17.11.2016 e 22.2.2017, da Dirección Xeral de Patrimonio Cultural.

– Constan informes municipais técnico, do 20.12.2016, e xurídico, do 22.12.2016.

– O Pleno do Concello, o 29.12.2016, aprobou provisionalmente a modificación puntual do PXOM de San Cibrao das Viñas no ámbito do polígono industrial.

– O 8.3.2017 o Servizo de Urbanismo de Ourense da Consellería de Medio Ambiente e Ordenación do Territorio ditou requirimento ao Concello para completar os informes sectoriais solicitados.

– Consta informe, do 18.4.2017, da Dirección Xeral de Emerxencias e Interior.

– Consta informe, do 9.5.2017, da Demarcación de Estradas do Estado en Galicia, en que se sinala a non afección ás estradas do Ministerio de Fomento.

– Consta informe favorable, do 9.6.2017, do Instituto de Estudos do Territorio.

– Constan solicitudes de informe, do 14.3.2017, á Delegación do Goberno en Galicia, a Augas de Galicia e á Dirección Xeral de Calidade e Avaliación Ambiental, sen que conste contestación.

II. Análise e consideracións.

II.1. O ámbito da actuación comprende o polígono industrial David Ferrer Garrido, clasificado como solo urbano consolidado, e o seu contorno inmediato: sector de solo urbanizable SUR-I1; núcleo rural de San Clodio; parcela ao sur, que se exclúe do polígono e se reclasifica como solo rústico de especial protección agropecuaria pola vinculación a unha vivenda tradicional; Sistema xeral de espazos libres existente SE-P7 e sector SUR-I4.

II.2. O alcance da modificación puntual acada a redelimitación do ámbito da Ordenanza O-7 de solo urbano consolidado no polígono industrial David Ferrer Garrido; a modificación, redelimitación e/ou obtención de solos dotacionais (viario, espazos libres públicos e equipamentos); a remisión do ámbito do solo urbano consolidado do polígono industrial á aprobación dun plan especial de infraestruturas e dotacións; e a modificación da Ordenanza O-7 do PXOM no ámbito do polígono industrial, e doutros artigos de carácter xeral de aplicación en todo o termo municipal.

II.3. O 19.3.2016 entrou en vigor a Lei 2/2016, do 10 de febreiro, do solo de Galicia, que establece no punto 2 da disposición transitoria segunda que os plans en tramitación que nesa data xa tivesen aprobación inicial poderán continuar a súa tramitación a teor da Lei 9/2002, do 30 de decembro, aínda que as súas determinacións deberán adaptarse á Lei 2/2016, do 10 de febreiro. O documento aprobado provisionalmente en data posterior á entrada en vigor desa lei adaptou as súas determinacións á Lei 2/2016, do 10 de febreiro, continuando a súa tramitación conforme a Lei 9/2002, do 30 de decembro.

II.4. A modificación axústase ao establecido no artigo 83.1 da Lei 2/2016, do 10 de febreiro, ao ordenar as dotacións, espazos libres e equipamentos, procurar a maior dotación de aparcadoiros e crear o escenario normativo apropiado para a aplicación dos seus obxectivos.

II.5. Consta xustificación das determinacións do artigo 59 da Lei 2/2016, do 10 de febreiro, cunha avaliación do custo de execución dos sistemas xerais e das actuacións previstas, con indicación do carácter público ou privado da iniciativa de financiamento, xustificando as previsións.

II.6. No documento aprobado provisionalmente corrixiuse o erro material no plano correspondente á folla 5 do plano V.1 do plan xeral, grafándose os espazos libres. Ademais, nos planos de ordenación O-002 e O-003 grafáronse as zonas Z1 e Z2.

Porén, detectouse un erro material no plano correspondente á folla 5 do plano V.1 do plan xeral e no punto 2.2 da memoria de información, canto á parcela de 425 m2 que segue incluída no solo urbano industrial, en contradición co grafado no plano O-003, en que aparece correctamente como solo rústico de especial protección agropecuaria.

Tamén hai un erro material no título do plano de ordenación O-001 que fai referencia a un plan especial de infraestruturas e dotacións, en vez de á modificación puntual.

A competencia para resolver sobre a aprobación definitiva do planeamento xeral corresponde á conselleira de Medio Ambiente e Ordenación do Territorio, de conformidade co disposto nos artigos 61 e 83.5 da Lei 2/2016, do 10 de febreiro, do solo de Galicia; e nos artigos 1 e 4 do Decreto 167/2015, do 13 de novembro, polo que se establece a estrutura orgánica da Consellería de Medio Ambiente e Ordenación do Territorio, en relación co Decreto 177/2016, do 15 de decembro, polo que se fixa a estrutura orgánica da Vicepresidencia e das consellerías da Xunta de Galicia.

III. Resolución.

Visto o que antecede, e de acordo co artigo 85.7.a) da Lei 9/2002, do 30 de decembro, de ordenación urbanística e de protección do medio rural de Galicia,

RESOLVO:

1. Outorgar a aprobación definitiva á modificación puntual do Plan xeral de ordenación municipal de San Cibrao das Viñas no ámbito do polígono industrial David Ferrer Garrido, con suxeición á corrección dos erros materiais observados sinalados na epígrafe II.6 anterior.

2. De conformidade co artigo 88 da Lei 2/2016, do 10 de febreiro, do solo de Galicia e o artigo 212.1 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, a Dirección Xeral de Ordenación do Territorio e Urbanismo inscribirá de oficio a modificación puntual no Rexistro de Planeamento Urbanístico de Galicia.

3. De conformidade co disposto polos artigos 82 e 88.4 da Lei 2/2016, do 10 de febreiro, do solo de Galicia e 70 da Lei 7/1985, do 2 de abril, reguladora das bases de réxime local, o concello deberá publicar no Boletín Oficial da provincia a normativa e ordenanzas da modificación puntual do Plan xeral de ordenación municipal aprobado definitivamente, unha vez inscrita aquela no Rexistro de Planeamento Urbanístico.

4. Notifíquese esta orde ao Concello; e publíquese no Diario Oficial de Galicia, de conformidade co disposto no artigo 199.2 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro.

5. Contra esta orde cabe interpoñer recurso contencioso-administrativo ante a Sala do Tribunal Superior de Xustiza de Galicia, no prazo de dous meses, contado desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 23 de novembro de 2017

Beatriz Mato Otero
Conselleira de Medio Ambiente e Ordenación do Territorio