Antecedentes:
Primeiro. Con data do 31 de xullo de 2017 publicouse no Diario Oficial de Galicia nú. 144 o Anuncio do 19 de xullo de 2017 polo que se somete ao trámite de información pública, en materia de expropiacións, a relación de bens e dereitos necesarios para a execución do proxecto de construción Mellora da seguridade viaria na OU-105-Seixalbo, de clave OU/16/247.06.
Segundo. Durante todo o trámite de información pública presentáronse alegacións e certificados e procedeuse á súa valoración.
Terceiro. Despois da análise das alegacións e certificados presentados, o 15 de decembro de 2017 apróbase o expediente de información pública e definitivamente o proxecto de construción Mellora da seguridade viaria na OU-105-Seixalbo, de clave OU/16/247.06.
Este proxecto ten por obxecto realizar as actuacións necesarias de mellora da seguridade viaria na estrada OU-105, no concello de Ourense, na zona de Seixalbo, mediante a reordención da sección transversal, para unha optimización da circulación de peóns, bicicletas e tráfico rodado.
A competencia para a execución da expropiación forzosa no ámbito das estradas non incorporadas á rede do Estado con itinerarios que se desenvolvan integramente no seu territorio corresponde á Comunidade Autónoma de Galicia, ao abeiro do número dous do artigo 28 do Estatuto de autonomía de Galicia, aprobado pola Lei orgánica 1/1981, do 6 de abril.
Corresponde ao Consello da Xunta de Galicia, como órgano equivalente ao Consello de Ministros no ámbito da Administración autonómica, o recoñecemento concreto da utilidade pública e a declaración da urxente ocupación dos bens afectados pola expropiación a que dá lugar a realización da obra, segundo o previsto nos artigos 10 e 52 da Lei do 16 de decembro de 1954, de expropiación forzosa.
Na súa virtude, por proposta da conselleira de Infraestruturas e Vivenda e logo da deliberación do Consello da Xunta de Galicia, na súa reunión do día dezaoito de xaneiro de dous mil dezaoito,
DISPOÑO:
Artigo único. Declarar, en concreto, a utilidade pública e a necesidade de urxente ocupación para os efectos de expropiación forzosa dos bens e dereitos que se concretan no expediente administrativo instruído, así como en calquera das modificacións que sexa necesario realizar para a execución do proxecto de construción Mellora da seguridade viaria na OU-105-Seixalbo, de clave OU/16/247.06.
Santiago de Compostela, dezaoito de xaneiro de dous mil dezaoito
Alberto Núñez Feijóo
Presidente
Ethel Mª Vázquez Mourelle
Conselleira de Infraestruturas e Vivenda