DOG 67 do 6/04/2018 - ANUNCIO do 5 de abril de 2018, da Dirección Xeral de Ordenación Forestal, polo que se publica a resolución das axudas concedidas ao abeiro da Orde do 11 de decembro de 2017 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2018.

VI. Anuncios

a) Administración autonómica

Consellería do Medio Rural

ANUNCIO do 5 de abril de 2018, da Dirección Xeral de Ordenación Forestal, polo que se publica a resolución das axudas concedidas ao abeiro da Orde do 11 de decembro de 2017 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2018.

O día 19 de decembro de 2017 publicouse no DOG a Orde do 11 de decembro de 2017 pola que se establecían as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocaban para o ano 2018.

De conformidade co establecido no artigo 15 da Lei 9/2007, do 13 de xuño, de subvencións de Galicia, e no artigo 13, número 4, da Lei 4/2006, do 20 de xuño, de transparencia e de boas prácticas na Administración pública galega, os órganos administrativos concedentes publicarán no Diario Oficial de Galicia as subvencións concedidas, con expresión da convocatoria, programa e crédito orzamentario a que se imputen, finalidade da subvención, beneficiario e cantidade concedida.

Segundo o establecido no número 3 do artigo 10 da citada orde, todas as resolucións serán notificadas de acordo co establecido no artigo 41 da Lei 39/2015, do 1 de outubro, do procedemento administrativo común das administracións públicas. Nesta notificación serán informados os beneficiarios de que se subvenciona en virtude dun programa cofinanciado polo Feader, medida 8.3 do PDR de Galicia 2014-2020, e da súa selección segundo os criterios establecidos nos artigos 34 e 37.

De conformidade co establecido no artigo 45.1.b) da Lei 39/2015, a notificación realizarase mediante a publicación no Diario Oficial de Galicia, no taboleiro de anuncios e na páxina web da Consellería do Medio Rural. Nesta publicación especificarase a data da convocatoria, o beneficiario, a cantidade concedida, a finalidade da subvención outorgada, así como a indicación das causas da desestimación, e expresaranse, ademais, os recursos que procedan contra a resolución, órgano administrativo ou xudicial ante o cal deben presentarse e prazo para interpoñelos.

En virtude do artigo 2 da Orde do 17 de novembro de 2015, sobre delegación de competencias en diversos órganos da Consellería do Medio Rural (DOG núm. 223, do 23 de novembro), o director xeral de Ordenación e Produción Forestal.

1. Acorda a publicación do contido do Anuncio do 5 de abril de 2018 das axudas concedidas con cargo á aplicación orzamentaria 13.02.551B.770.0, ao abeiro da Orde do 11 de decembro de 2017 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2018.

Estas axudas sométense ao Regulamento (UE) 702/2014 da Comisión, do 25 de xuño de 2014, polo que se declaran determinadas categorías de axudas nos sectores agrícola e forestal e nas zonas rurais compatibles co mercado interior en aplicación dos artigos 107 e 108 do Tratado de funcionamento da Unión Europea. Esta medida foi comunicada polo Estado co número de axuda SA.43021, ao abeiro do Regulamento (UE) 702/2014, e cumpre co Programa de desenvolvemento rural (PDR) de Galicia para a etapa 2014-2020, onde se inclúe a medida 8.3. «Prevención de danos causados por incendios forestais, desastres naturais e catástrofes». O PDR 2014-2020 foi aprobado pola Decisión de execución da Comisión C (2015) 8144, do 18 de novembro de 2015.

A orde estableceu dúas finalidades de subvencións:

a) Liña I: subvencións para o control selectivo de combustible (código de procedemento MR651A).

b) Liña II: subvencións para a construción de puntos de auga (código de procedemento MR651B).

O anexo I inclúe a listaxe daquelas axudas solicitadas da liña I que foron concedidas e o anexo II, aquelas pertencentes á liña II. Estas listaxes están publicadas na páxina web da Xunta de Galicia.

2. En relación coas axudas concedidas, dispostas nos anexo I e II:

a) Deberán presentar, no prazo de 10 días hábiles contados a partir do día seguinte á publicación deste anuncio e de forma electrónica, a documentación descrita no artigo 14, incluíndo un documento descritivo das actuacións que se axuste aos contidos mínimos que se indican no artigo 14.

b) De ser a súa vontade, tamén poderán presentar a súa renuncia no mesmo prazo estipulado no parágrafo anterior, concretamente 10 días hábiles. Se o último día do prazo de presentación fose inhábil, entenderase prorrogado ao primeiro día hábil seguinte.

c) Tras presentaren a documentación complementaria, funcionarios da Consellería do Medio Rural poderán realizar unha inspección previa para verificar as localizacións e superficies propostas de traballo e a súa viabilidade, en particular, a súa elixibilidade consonte os criterios establecidos na medida 8.3 do PDR de Galicia 2014-2020.

d) Serán motivo de perda de dereito da subvención as causas recollidas no artigo 15, concretamente: os informes desfavorables do Servizo de Conservación da Natureza, do Servizo Provincial de Montes ou do SPDCIF da xefatura territorial correspondente, a notificación da resolución pola que se dea por transcorrido o prazo do requirimento de emenda da documentación ou a existencia de discrepancias entre as actuacións reflectidas no documento descritivo e as recollidas na resolución de aprobación.

e) A superficie mínima viable para todas as actuacións, tras informe de admisibilidade, deberá chegar cando menos ás 5 hectáreas.

f) Os traballos comezarán unha vez que sexa comprobado o documento descritivo, que se acade a superficie mínima e que sexan favorables os informes preceptivos, se son necesarios, o que será comunicado polos SPDCIF da xefatura territorial correspondente aos beneficiarios.

g) No caso de que, durante o prazo de execución, haxa modificación das parcelas Sixpac ou de distribución de superficies de actuación presentadas na documentación complementaria, solicitarase unha modificación mediante unha memoria tecnicamente xustificada, que deberá obter un informe favorable do SPDCIF da xefatura territorial da Consellería do Medio Rural correspondente. O beneficiario non poderá en ningún caso comezar os traballos nas parcelas obxecto de modificación ata que non obteña o informe favorable sobre os ditos cambios. As modificacións presentadas non poderán alterar a información e condicións contidas na presente notificación de resolución.

h) O beneficiario deberá comunicar electronicamente aos SPDCIF das xefaturas territoriais da Consellería do Medio Rural o remate das obras. O prazo máximo para finalizar e xustificar os traballos será de 4 meses desde o día seguinte a esta notificación da resolución de aprobación da subvención e, como máximo, ata o 31 de outubro do ano 2018, no caso de solicitarse e serlle concedida prórroga.

i) Lémbrase que, entre outra documentación, a xustificación da axuda e solicitude de pagamento deberá conter as facturas e xustificantes de pagamento efectivos da actividade subvencionada. Os xustificantes de gasto consistirán, de forma xeral, nas facturas orixinais acreditativas dos investimentos, que cumprirán as exixencias que establece a Axencia Tributaria. As facturas presentaranse en orixinal e marcaranse cun selo, onde se indicará a subvención para cuxa xustificación foron presentadas e se o importe do xustificante se imputa total ou parcialmente á subvención; neste último caso reflectirase a contía exacta que resulte afectada pola subvención. Unha vez marcadas, devolveranse ao beneficiario. No xustificante bancario do pagamento por parte do beneficiario (xustificante de transferencia bancaria, xustificante bancario de ingreso de efectivo na entidade, certificación bancaria, etc.) constará o número da factura obxecto de pagamento, a identificación do beneficiario que paga e do destinatario do pagamento, que deberá coincidir coa persoa, empresa ou entidade que emitiu a factura. No caso de que o xustificante bancario sexa transferencia bancaria, deberá ser orixinal ou copia compulsada e estará selado pola entidade bancaria.

3. Contra a resolución que se publica cabe interpor recurso potestativo de reposición ante a conselleira do Medio Rural no prazo dun mes, contado a partir do día seguinte ao da súa notificación, ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados a partir do día seguinte ao da súa publicación no Diario Oficial de Galicia.

Santiago de Compostela, 5 de abril de 2018

Tomás Fernández-Couto Juanas
Dirección xeral de Ordenación Forestal

ANEXO I

Listaxe de solicitudes de axuda da liña I, subvencións para o control selectivo de combustible, concedidas ao abeiro da Orde do 11 de decembro de 2017 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2018

Expediente: 02150010/2018. NIF: V70224639. Subvención aprobada: 2.440.20 euros.

Descrición	Uds.	Investimento	% sub.	Subvención
Áreas cortalumes (roza mecanizada con rozadora de cadeas ou similar)	4.12	1.685.49	100.00	1.685.49
Faixas auxiliares (roza mecanizada con rozadora de brazo ou similar)	1.54	754.71	100.00	754.71